АБНА24 Хәбәр Верир, Февралын 16-да Азәрбајҹан Милли Мәҹлисинин Бејнәлхалг мүнасибәтләр вә парламентләрарасы әлагәләр комитәсинин сәдри Сәмәд Сејидов Иран Ислам Шурасы Мәҹлисинин Милли Тәһлүкәсизлик вә Хариҹи Сијасәт Комиссијасынын сәдри Мүҹтаба Зүннурин башчылыг етдији нүмајәндә һејәти илә ҝөрүшүб. Бу мәлумата әсасән, өлкәләримиз арасындакы сых мүнасибәтләрдән сөз ачан Сәмәд Сејидов хүсусилә 44 ҝүнлүк Вәтән мүһарибәси дөврүндә вә мүһарибәдән сонра Иран Ислам Республикасынын Азәрбајҹанын һагг ишини вә өз әрази бүтөвлүјүнү бәрпа етмәсини дәстәкләдијини гејд едәрәк бунун өлкәмиз үчүн тарихи әһәмијјәтә малик олдуғуну вурғулајыб. Билдириб ки, Иран тәрәфдән Азәрбајҹанын әрази бүтөвлүјүнү дәстәкләјән чыхышлар вә бәјанатлар һәм мүһарибәдән өнҹә, һәм дә мүһарибә заманы вә сонра тәкрар-тәкрар верилиб. Хүсусилә, нојабрын 3-дә вә 4-дә Иран лидерләринин вердикләри бәјанатлар Азәрбајҹан халгы арасында јүксәк рәғбәт газаныб вә Азәрбајҹан-Иран мүнасибәтләринә ҹидди тәсир ҝөстәриб. Сәмәд Сејидов билдириб ки, һазырда бөлҝәдә јени реаллыг формалашыб вә һәмин реаллыг парламентләр арасындакы әлагәләрин ҝенишләнмәсинә имкан јарадаҹаг. Ҝөрүшдә нүмајәндә һејәтинин башчысы, Иран Ислам Шурасы Мәҹлисинин Милли Тәһлүкәсизлик вә Хариҹи Сијасәт Комиссијасынын сәдри Мүҹтаба Зүннур Иран парламентинин рәһбәрлији вә бүтүн депутатлар, Иран халгы адындан Азәрбајҹан халгына бөјүк Зәфәр мүнасибәтилә тәбрикләрини чатдырыб. Зүннур Азәрбајҹанла һәр саһәдә даһа сых әмәкдашлыг әлагәләри гурмаг нијјәтиндә олдугларыны билдириб. Гарабағын јенидән гурулмасында Иран ширкәтләринин мүһүм лајиһәләрлә иштирак етмәк арзусуну, ишғал дөврүндә ермәниләр тәрәфиндән дағыдылмыш Азәрбајҹан мәсҹидләринин бәрпасыны тәмәннасыз һәјата кечирмәк истәдикләрини вурғулајыб. Тикинти-гуруҹулуг ишләри үчүн бөјүк потенсиала малик олдугларыны дејиб.
342/
