АБНА24 Хәбәр Верир, буну президент Илһам Әлијев августун 24-дә Фаиг Гүрбәтову Биләсувар Рајон Иҹра Һакимијјәтинин, Елмир Бағырову исә Саатлы Рајон Иҹра Һакимијјәтинин башчысы вәзифәләринә тәјин олунмалары илә әлагәдар видеоформатда гәбул едәркән дејиб. Азәрбајҹан Республикасы презденти Илһам Әлијев билдириб: "Мән дәфәләрлә демишәм ки, Президент башда олмагла, бүтүн дөвләт мәмурлары халгын хидмәтчисидир. Мәһз буна ҝөрә биз бу вәзифәдәјик. Буна ҝөрә халг мәнә етибар едиб вә мән тәјин етдијим бүтүн кадрлардан буну тәләб едирәм. Анҹаг әфсуслар олсун ки, бир чох һалларда, бәзи һалларда јох, бир чох һалларда дөвләт мәмурлары өзләрини апара билмирләр. Онлар һесаб едирләр ки, онлара һансыса хүсуси имтијаз верилиб. Онлар ганунлары позурлар, бәзи һалларда чох ҹидди позурлар. Ҹәмијјәтимиздә формалашмыш әнәнәви давраныш гајдаларыны позурлар. Өзүнү халгдан јухарыда һисс едирләр, тәкәббүрлә јанашырлар. Она ҝөрә белә һаллар мәнә мәрузә едиләндә дәрһал мүвафиг ҝөстәришләр верилир вә бу инсанлар ја инзибати гајдада ҹәзаландырылыр, ја да ки, ҹинајәт мәсулијјәтинә ҹәлб едилир. Она ҝөрә рәһбәрин тәвазөкарлығы рәһбәрин јарашығыдыр, бу биринҹиси. Икинҹиси, рәһбәрин мәнәви һаггы олмалыдыр ки, өз табелијиндә олан инсанлардан нәјисә тәләб етсин. Әҝәр бу мәнәви һагг јохдурса, нә истәјирсиниз дејин, нә истәјирсиниз един, сизә нә һөрмәт, нә дә ки, рәғбәт олаҹаг. Она ҝөрә, сиз мәишәтдә дә, ишдә дә нүмунә олмалысыныз вә өзүнүзү тәвазөкар апармалысыныз. Бу, бүтүн мәмурлара, иҹтимаи ишләрдә чалышан бүтүн инсанлара аиддир. Бизим бу мәсәлә илә бағлы сијасәтимиз, ејни заманда, конкрет ишләрдә дә өзүнү ҝөстәрир. Һесаб едирәм ки, һәр кәс артыг буну өзү үчүн јәгин едиб. Гајдаларын позулмасы вә бунун аҹы нәтиҹәләри һәр кәс үчүн дәрс олмалыдыр".
342/
