АБНА24 Хәбәр Верир, базар ҝүнү Иран Ислам Республикасы Президентинин Администрасијасынын рәһбәри Маһмуд Ваези илә Азәрбајҹан Республикасы Баш назиринин мүавини Шаһин Мустафајев арасында телефон данышығы олуб. Бу мәлумата ҝөрә, телефон данышығы заманы тәрәфләр Азәрбајҹан илә Иран арасында мүхтәлиф саһәләрдә, хүсусилә игтисади, тиҹарәт, сәнаје транзит вә дашынмалар саһәсиндә әлагәләрин инкишафындан мәмнунлугларыны дилә ҝәтириб вә бу әлагәләрин даһа да ҝенишләндирилмәси јолларыны мүзакирә едибләр. Тәрәфләр пандемија илә бағлы вәзијјәти дә мүзакирә едәрәк бу истигамәтдә сәјләрин бирләшдирилмәсинин өнәмини вурғулајыблар вә бунунла бағлы һәр ики өлкәнин мүвафиг гурумлары арасында тәҹрүбә мүбадиләсинин апарылмасынын ваҹиблијинә тохунублар. Гејд олунуб ки, ики өлкә арасында игтисади вә тиҹарәт әлагәләринин сәһијјә протоколларына әмәл олунмагла давам етдирилмәсиндә һеч бир манеә јохдур. Пандемијанын мөвҹудлуғуна бахмајараг, ики өлкәнин тиҹарәт вә транзит мүбадиләси горунуб, һәтта артым да вар. Вурғуланыб ки, идхал вә транзит дашымалары үчүн сәрһәдләрин ачыг сахланылмасы сон ајларда ики өлкә арасында дашынмаларын һәҹминин артмасына сәбәб олуб. Бирҝә сәјләр илә тиҹарәт әлагәләринин тезликлә пандемијадан әввәлки вәзијјәтә гајтарылмасына әминлик ифадә олунуб. Сөһбәт заманы “Шимал-Ҹәнуб Бејнәлхалг Нәглијјат Дәһлизи”нин тәкмилләшдирилмәси дә мүзакирә едилиб. Һәр ики тәрәф бу лајиһәнин стратежи әһәмијјәтини вурғулајыб, бу саһәдә һәјата кечирилән тәдбирләрә даир фикир мүбадиләси апарыблар. Һәјата кечирилән бирҝә лајиһәләрин, хүсусилә автомобил вә дәмир јолу әлагәләринин ҝенишләндирилмәсинин һәр ики өлкә илә јанашы, ејни заманда реҝион үчүн әһәмијјәти гејд олунуб. Телефон данышығы заманы һәмчинин, өлкәләр арасында игтисади, сәнаје, транзит, мүштәрәк мәһсул истеһсалы вә диҝәр саһәләрдәки әмәкдашлығын бундан сонра да уғурла инкишаф едәҹәјинә әминлик ифадә олунуб. Дөвләт башчыларынын тапшырыгларына ујғун олараг, һәр ики өлкә рәсмиләринин тәмасларынын давам етдирилмәси вә һәртәрәфли әлагәләрин инкишафы үчүн давамлы сәјләр ҝөстәрилмәсинин ваҹиблији вурғуланыб.
342/
