Шәһид Һаҹы Гасим Сүлејманинин вәсијјәтнамәси

Әһли Бејт (әлејһимус сәлам) Хәбәр Аҝентлијинин- АБНА: Мәлум олдуғу кими, шәһид гәһрәман Һаҹы Гасим Сүлејманинин вәсијјәтнамәси ишыг үзү ҝөрүб. Сосиал шәбәкәләрдә бу вәсијјәтин тәрҹүмәси тәгдим едилмишдир ки, ону диггәтинизә чатдырырыг.

(Дәјәрли тәшәббүскарлар тәрәфиндән сосиал шәбәкәләрдә јајымланан тәрҹүмә әсасында)

 

1-ҹи һиссә


Бисмилләһир-Раһмәнир-Раһим.

Усулид-динә шәһадәт верирәм:

Шәһадәт верирәм ки, Аллаһдан башга ибадәтә лајиг олан мәбуд јохдур. Шәһадәт верирәм ки, Һәзрәт Муһәммәд (с) - Онун рәсулудур. Шәһадәт верирәм ки, Әли (ә) – Аллаһын вәлисидир о Һәзрәтин (ә) мәсум өвладлары Аллаһын һүҹҹәтидир.

Шәһадәт верирәм ки, Гијамәт, Гуран, Ҹәннәт вә Ҹәһәннәм һәгигәтдир. Суал-ҹаваб, мәад, әдл, имамәт вә нүбуввәт һәгигәт вә һаггдыр.

 

Илаһи, Сәнә немәтләринә ҝөрә шүкүр едирәм.

Илаһи, Сәнә шүкүр едирәм ки, мәни сүлбдән сүлбә, гәрнләрдән гәрнләрә, бир сүлбдән диҝәр бир сүлбә интигал верәрәк (өтүрәрәк), елә бир заманда ашкара чыхмаға (јаранмаға) иҹазә вериб, мәнә вүҹуд бәхш етдин ки, Сәнин ән уҹа өвлијаларындан олан вә мәсумијјәт мәгамына јахын олан бир шәхси, јәни, салеһ бәндә олан Имам Хомејнини ҝөрә билим вә онун әсҝәри ола билим.

Һәзрәт Муһәммәд Мустафанын сәһабәси олмаг тофигинә чатмадымса, Әли ибн Әбу Талиб вә мәсум өвладларына зүлм олунан заман, онларын јанында олмаг немәтинә јетишмәдимсә, мәни елә бир јолда гәрар вердин ки, онлар бу јолда өз ҹанларыны (һансы ки, ҹаһанын вә хилгәтин ҹаны иди) гурбан етдиләр.

Илаһи, Сәнә шүкүр олсун ки, салеһ бәндә олан әзиз Хомејнидән сонра, мәни диҝәр бир салеһ бәндәнин јолунда гәрар вердин. Онун мәзлумлуғу салеһлијиндән даһа бөјүк олан, Исламын, шиәлијин, Иранын вә бүтүн сијаси Ислам дүнјасынын мүдрүк бир инсаны, әзиз Хаменеинин (ҹаным онун ҹанына фәда олсун) јолунда гәрар вердин.

 

Сәнә шүкүрләр олсун ки, мәни ән ҝөзәл бәндәләринә јахын олмағы нәсиб етдин. Мәнә онларын беһиштә лајиг үзләриндән өпүб, Илаһи әтирләрини дујмағы нәсиб етдин. Јәни бу јолун мүҹаһидләрини вә шәһидләрини ҝөрмәји гисмәт етдин.

Илаһи! Еј Гадир вә Әзиз! Еј Рәһман Вә Рәззаг! (даим рузи верән) Илаһи! Алнымы шүкүр вә хәҹаләт әламәти олараг аситанына вә дәрҝаһына сүртүрәм ки, мәни Фатимәји-Әтһәрин вә өвладларынын јолунда шиә (һәгиги Ислам әтирли) гәрар вердин. Бу, ән уҹа вә ән дәјәрли немәтләриндәндир. Елә бир немәтдир ки, онда нур, мәнәвијјат вә дахилиндә ән али гәрарлылыг олан гәрарсызлыг вар. Елә бир гәм ки, дахилиндә арамлыг вә мәнәвијјат вар.

Илаһи, шүкүр олсун Сәнә ки, мәнә касыб, амма диндар, Әһли-Бејти (ә) севән вә һәмишә пак јолда олан ата-ана вердин. Аҹиз һалда Сәнә јалварырам, онлары беһиштдә өвлијаларына јахын едәсән. Мәнә ахирәт аләминдә онлары ҝөрмәји нәсиб едәсән…

 

 

2-ҹи һиссә

 

...Илаһи, әфвинә үмүдүм вар!

Еј, Әзиз вә тајы-бәрабәри олмајан һикмәтли Халиг! Әлим бошдур. Сәфәр үчүн ҝөтүрдүјүм чанта бошдур. Мән азугәсиз вә тәдарүксүз, Сәнин әфв зијафәтинә вә кәрәминә үмүдлү һалда ҝәлирәм.

Мән азугә ҝөтүрмәмишәм. Чүнки фәгир, Кәрәм Саһибинин һүзуруна ҝедәндә азугәјә еһтијаҹы олмур. Бүтүн ҹаным Сәнин фәзл вә кәрәминә үмүдлә долудур.

 

Өзүмлә ики бағлы ҝөз ҝәтирмишәм вә онда олан сәрвәт – бүтүн напаклыгларын јанында дәјәрли бир гәнимәт һесаб олунан, Фатимәнин (с.ә) Һүсејни (ә) үчүн ахыдылан ҝөз јашыдыр...

О ҝөвһәр, Әһли-Бејтә (ә) ахыдылан ҝөз јашыдыр. Бу ҝөз јашы – мәзлумларын вә јетимләрин мүдафиәсидир. Залымын савашында мәзлумун мүһасирәдән азад олмасыдыр…

Илаһи! Әлләримдә һеч нә јохдур. Әлләрим нә бир шеј тәгдим едә биләр, нә өзүнү мүдафиә етмәк гүдрәти вар онларда. Амма, әлимдә бирҹә үмүд етдијим шеј вар – о да даим Сәнә тәрәф истигамәтләнмәләридир. Онлары Сәнә тәрәф галдырдығымда, онлары Сәнә хатир јерә вә дизә гојдуғумда, силаһы Сәнин динини горумаг үчүн әлимә алдыгда – бунлар мәним сәрвәтим олуб. Үмүд едирәм гәбул етмиш оларсан…

Илаһи! Ајагларым сүстдүр (мөһкәм дејил), онларын тагәти јохдур, ҹәһәннәмдән кечән көрпүдән кечмәјә ҹүрәти јохдур. Ади көрпүдә ајагларым әсир. Вај олсун мәнә! Сәнин көрпүн түкдән назик вә гылынҹдан итидир. Бир шеј мәнә үмүд верир ки, бәлкә она ҝөрә әсмәјим вә ниҹат тапа билим. Мән бу ајагларымла Сәнин евинә ҝәлмишәм вә тәваф етмишәм. Бу ајагларымла өвлијаларынын һәрәмләринә ҝетмишәм. Һүсејнинин (ә) вә Аббасынын (ә) Бејнүл-һәрәминдә ајагларымы јалын һалда гачыртмышам. Бу ајагларымы узун вә әјри сәнҝәрләрдә јығараг, динини горумаг үчүн гачмышам, сычрамышам, сүрүнмүшәм, ҝүлмүшәм-ҝүлдүрмүшәм, ағламышам-ағлатмышам. Јыхылыб галхмышам. Үмүд едирәм ки, бу сычрамагларыма вә сүрүнмәклијимә ҝөрә, бир дә о һәрәмләрә ҝөрә онлары (ајагларымы) бағышлајасан…

Илаһи башым, ағлым, додағым, бурнум, гулағым, гәлбим – бир сөзлә бүтүн бәдән үзвләрим бу үмүдлә кечинирләр…

Еј рәһимлиләрин ән Рәһимлиси! Мәни гәбул ет! Пак гәбул ет! Елә гәбул ет ки, ҝөрүшүнә лајиг олум. Ҝөрүшүндән башга һеч нә истәмирәм. Беһиштим дә Сәнин јанында олмагдыр мәнә, ја Аллаһ!

 

3-ҹү һиссә

 

...Илаһи! Достларын карванындан ҝери галмышам.

Илаһи! Еј Әзиз! Илләрдир бир карвандан ҝери галмшам вә давамлы олараг бәзиләринин о карвана тәрәф ҝетмәләринә көмәк едирәм. Амма, өзүм ҝери галмышам. Сән Өзүн билирсән, онлары һеч вахт унуда билмәмишәм. Һәмишә онларын хатирәси вә адлары тәкҹә зеһнимдә дејил, гәлбимдә вә ҝөзләримдә, ҝөз јашы вә аһла јад олублар.

Әзизим! Ҹисмим артыг нагисләшир. Неҹә ола биләр ки, 40 ил гапында дураны гәбул етмәјәсән?! Халигим! Севдијим! Ешгим! Мән һәмишә Сәндән истәмишәм ки, ҹанымы ешгинлә долдурасан вә мәни Өзүндән ајры олдуғумда, јандырыб өлдүрәсән.

Әзизим! Мән бу гәрарсызлығымдан вә карвандан ҝери галмаг рүсвајчылығындан ҹана ҝәлмишәм. Мән бу үмүдлә, гышда вә јајда бир шәһәрдән башга шәһәрә, бу сәһрадан о сәһраја ҝедирәм. Еј Кәрим! Еј Һәбиб! Кәрәминә үрәк бағламышам. Өзүн билирсән ки, Сәни севирәм. Јахшы билирсән ки, Сәндән башга һеч нә истәмирәм. Мәни өзүнә вәсл ет (бирләшдир).

Илаһи! Бүтүн вүҹудуму вәһшәт бүрүјүб. Мән өз нәфсими рам етмәјә гадир дејиләм. Мәни рүсвај етмә. Һөрмәтини өзүнә ваҹиб билдијин кәсләрин һөрмәтинә, һөрмәтләринә хәләл ҝәтирәҹәјим бир иш ҝөрмәмиш, мәни онларын карванына гош.

Еј мәним Мәбудум! Еј мәним ешгим вә мәшугум, Сәни севирәм. Дәфәләрлә Сәни ҝөрмүшәм (гәлблә) вә Сәни һисс етмишәм. Сәндән ајры гала билмәрәм. Даһа бәсдир, бәс мәни гәбул ет. Елә гәбул ет ки, Сәнә лајигли олум.

 

Мүҹаһид гардаш вә баҹыларыма хитабән:

Еј, бу аләмдә јашајан мүҹаһид баҹы вә гардашларым!

Еј, башларыны Аллаһ јанында сәрмајә гојанлар!

Еј, ҹанларыны ҝөтүрүб ешг базарына, ешг мүгабилиндә дәјишмәјә ҝәләнләр!

Диггәт един, Ислам Ҹүмһуријјәти – Исламын вә шиә мәктәбинин мәркәзидир. Бу ҝүн Һүсејн ибн Әлинин (ә) гәрарҝаһыдыр. Билин ки, Ислам Ҹүмһуријјәти һәрәмдир вә бу һәрәм саламат галарса, диҝәр һәрәмләр дә тохунулмаз галар. Әҝәр дүшмән бу һәрәми мәһв едәрсә, һеч бир һәрәм галмајаҹагдыр. Нә Ибраһими, нә Муһәммәди һәрәмләр галмајаҹаг.

Еј гардаш вә баҹыларым! Ислам дүнјасынын һәмишә бир рәһбәрә еһтијаҹы вар. Мәсума (ә) бағлы олан, шәри вә фигһи јолла сечилмиш бир рәһбәрә еһтијаҹы вар. Јахшы билирсиниз дүнјаны титрәдән вә Исламы дирилдән, дүнјанын ән мүнәззәһ дин алими олан пак вә уҹа Хомејнимиз, Вилајәти-фәгиһи үммәтин јеҝанә ниҹат јолу гәрар верди. Истәр буну дини етигад олараг гәбул едән шиәләр, истәрсә дә буну әгли дәлиллә гәбул едән сүннүләр, ихтилафлардан узаг олмалы вә Исламын ниҹаты үчүн вилајәт хејмәсини (чадырыны) тәрк етмәмәлидирләр.

Бу хејмә – Рәсулуллаһын (ә) хејмәсидир. Дүнјанын Ислам Ҹүмһуријјәтијлә дүшмәнлик етмәсинин әсас сәбәби – бу хејмәни јандырмаг истәмәләридир. Онун башына доланын. Анд олсун Аллаһа, әҝәр бу хејмә хәсарәт аларса, Бејтуллаһ (Кәбә), Мәдинәдә Рәсулуллаһын (ә) һәрәми, Нәҹәф, Кәрбәла, Казимејн, Самира вә Мәшһәд артыг олмајаҹаг. Гуран тәһриф олаҹаг.

 

Иранлы баҹы вә гардашларыма хитабән.

Еј мәним иранлы әзиз баҹы вә гардашларым. Еј ифтихарлы вә башы уҹа халгым. Мәним вә мәним кимиләрин ҹаны мин дәфәләрлә сизә фәда олсун. Неҹә ки, сиз Ислама вә Ирана, јүзминләрлә ҹан фәда етмисиниз. Усула риајәт един. Усул јәни Вилајәти-Фәгиһ. Хүсуси илә бу мүдрүк, мәзлум, дини, фигһи, ирфаны вә мәрифәти дәриндән билән, әзиз Хаменеини, ҹанынызын әзизи билин. Онун һөрмәтини мүгәддәсләрин һөрмәти билин.

 

Мәним әзиз гардаш-баҹыларым, ата-аналарым.

Ислам ҹүмһуријјәти бу ҝүн өзүнүн ән башыуҹа мәрһәләсиндәдир. Билин ки, дүшмәнин сизә неҹә бахмасы өнәмли дејил. Дүшмәнләр сизин Пејғәмбәринизә (с) вә Аллаһын өвлијаларына неҹә бахырдылар?! Пејғәмбәр (с) вә Аллаһ өвлијалары илә неҹә рәфтар едирдиләр?! Она нә төһмәтләр вуруб, мәзлум өвладлары илә неҹә даврандылар?! Дүшмәнин мәзәммәти, истеһзасы вә басгысы сизи тәфригәјә вә ајрылыға салмасын.

 

Билин вә билирәм ки, билирсиниз. Әзиз Хомејни әввәл Исламы Иранын дајағы етди. Сонра Ираны, Исламын хидмәтинә верди. Әҝәр Ислам вә ислами руһијјә олмасајды, Сәддам јыртыҹы ҹанавар кими бу өлкәни парчалајарды. Һәмчинин Америка да гудуз ит кими бу иши ҝөрәрди. Рәһмәтлик Имамын мәһарәти – Исламы дајаг олараг ҝәтирмәси иди. Ашура вә Мәһәррәми, Сәфәр вә Фатимијјәни бу милләтин дајағы етди. Ингилаб ичиндә ингилаблар иҹад етди. Буна ҝөрә дә һәр мәрһәләдә минләрлә фәдакар, ҹанларыны Иран милләтинә, торпағына вә Ислама сипәр етди. Ән бөјүк мадди ҝүҹләри өз гаршыларында зәлил етдиләр.

Әзизләр, үсулда ихтилаф етмәјин…

Шәһидләр – һамымыза иззәт вә кәрамәт мејарыдыр. Тәкҹә бу ҝүн дејил, онлар һәмишәлик олараг Сүбһан олан Аллаһын ҝениш дәрјасына говушублар. Онлары олдуглары кими, ҝөзүнүз, үрәјиниз вә дилиниздә бөјүк тутун. Өвладларынызы онларын ады вә шәкилләри илә таныш един. Сизин һамыныз, јетим сајылан шәһид өвладларына еһтирам вә әдәблә нәзәр един. Онларын јолдашларына, ата-аналарына еһтирам един. Неҹә ки, өз өвладларынызын тәгсириндән тез кечирсиниз, онларын да атасыз, анасыз, јолдашсыз, өвладсыз олмаларына ҝөрә, онлара хүсуси диггәт един.

Вәлијји-фәгиһин башчылыг етдији вә ҹанынызы, мәзһәбинизи, Исламынызы вә өлкәнизи горујан силаһлы гүввәләрә һөрмәт един. Онлар да һәмчинин евләрини горудуглары кими, милләти, милләтин намусуну вә торпағыны горусун. Милләтә еһтирам вә һөрмәтлә јанашсын. Неҹә ки, Әмирәл-мөминин (ә) бујурур: Силаһлы гүввәләр милләтин иззәт мәнбәји олмалыдыр. Зәифләрин вә милләтин сығынаҹағы, галасы вә зинәти олмалыдыр.

 

 

4-ҹү һиссә (сонунҹу)

 

Әзиз Кирман әһалисинә...

Әзиз Кирман әһалисинә бир мәгамы хатырладаҹағам. Онлар севимли инсанлардыр, сәккизиллик мүгәддәс мүдафиә заманы ән бөјүк фәдакарлыглары ҝөстәрмиш, Ислама чох дәјәрли командир вә мүҹаһидләр тәгдим етмишләр. Мән һәмишә онлардан хәҹаләтли галдым. Онлар Ислама ҝөрә сәккиз ил мәнә инаныб өвладларыны “Кәрбәла-5”, “Вәлфәҹр-8”, “Гүдс јолу”, “Фәтһүл-мүбин”, “Бејтүл-мүгәддәс” вә диҝәр ағыр дөјүшләрә јолламышлар, мәзлум Имам Һүсејн ибн Әлинин ешги илә “Сарәллаһ” адлы бөјүк вә дәјәрли бир дивизија јаратмышлар. Бу дивизија кәсәрли гылынҹ кими дәфәләрлә халгымызын вә мүсәлманларын гәлбини севиндирмиш, кәдәрини арадан галдырмышдыр.

Әзизләрим! Мән артыг Илаһи тәгдирлә сизин араныздан ҝетмишәм. Мән сизи өз ата-анамдан, өвладларымдан, баҹы вә гардашларымдан чох севирәм. Чүнки онлардан чох сизинлә бир јердә олмушам. Үстәлик, мән онларын, онлар да мәним үрәк парчам олсалар да, варлығымы сизә вә Иран халгына нәзир етдијими гәбул етмишләр.

Кирманын һәмишә, сонадәк вилајәтә садиг галмасыны истәјирәм. Бу вилајәт Әли ибн Әбу Талибин (ә) вилајәти, бу чадыр – Фатимә (с.ә) Һүсејнинин (ә) чадырыдыр. Онун башына доланын. Сизин һамынызлајам. Билирсиниз ки, һәјатда сијаси рәнҝләрдән чох инсанлыға, дујғу вә фитрәтләрә фикир вермишәм. Мәни өзүнүздән билдијинизә, гардашыныз вә өвладыныз сајдығыныза ҝөрә, һамыныза мүраҹиәт едирәм.

Вәсијјәт едирәм ки, бу дөнәмдә Ислам ингилабы вә Ислам республикасында тәрәннүм олунмуш Исламы тәнһа гојмајын. Исламы мүдафиә етмәк үчүн хүсуси диггәт вә сајыглыға еһтијаҹ вар. Сијаси мәсәләләрдә мөвзу Ислам, Ислам Республикасы, мүгәддәсләр вә вилајәти-фәгиһ олдугда билин ки, бунлар – Илаһи рәнҝләрдир вә Илаһи рәнҝи һәр бир рәнҝдән үстүн тутун.

 

Шәһид аиләләринә мүраҹиәт

Өвладларым! Гыз вә оғулларым! Шәһид өвладлары! Шәһидләрин ата вә аналары! Еј өлкәмизин нурлу чыраглары! Шәһидләрин вәфалы вә диндар баҹы-гардашлары вә һәјат јолдашлары! Бу дүнјада Гуран сәси кими раһатлыг тапдығым, өзүмә ән бөјүк мәнәви дајаг билдијим сәс – бәзән һәр ҝүн үнсијјәтдә олдуғум шәһид өвладларынын, вүҹудларында ата-анамы һисс етдијим шәһид валидејнләринин сәси иди.

 

Әзизләрим! Нә гәдәр ки, бу халгын өнҹүлләрисиниз, өз гәдринизи билин, шәһидинизи өзүнүз дә јашадын. Гој сизи ҝөрән һәр кәс шәһидин өзүнү – мәнәвијјатыны, мөһкәмлијини вә диҝәр хүсусијјәтләрини һисс етсин!

Хаһиш едирәм һаггынызы һалал един вә мәни бағышлајын. Мән чохунузун, һәтта шәһид өвладларынызын да һаггыны там өдәјә билмәдим. Төвбә едир вә әфв диләјирәм.

Истәјирәм ки, ҹәназәми шәһид өвладлары чијинләринә ҝөтүрсүнләр. Бәлкә онларын пак әлләри сајәсиндә Аллаһ Өз лүтфүнү мәнә шамил едәр.

 

Өлкә сијасиләринә мүраҹиәт

Өлкә сијасиләринә гыса бир сөзүм вар; һәм өзләрини ислаһатчы адландыранлара, һәм дә мүһафизәкар адландыранлара. Һәмишә әзијјәт чәкмишәм ки, биз үмумиликдә бәзән Аллаһы, Гураны, дәјәрләри унудур, һәтта гурбан веририк.

Әзизләрим! Бир-биринизлә рәгабәт апараркән, мүбаһисә едәркән әмәлиниз, сөзүнүз, дискуссијаныз һәр һансы шәкилдә дини вә ингилабы зәифләтсә, билин ки, әзиз Ислам Пејғәмбәринин (с) вә бу јолун шәһидләринин гәзәбинә ҝәлмисиниз. Сәрһәдләри ајырын. Бир олмаг истәјирсинизсә, бирлијин шәрти принсипләр үзәриндә ачыг консенсуса ҝәлмәкдир. Принсипләр чох дејил, бир нечә әсас мәсәләдән ибарәтдир:

1. Онларын бири – вилајәти-фәгиһә әмәли етигаддыр; јәни онун нәсиһәтләрини ешидин, әсил дини вә елми һәким (мүдрик) кими төвсијә вә тапшырыгларына үрәкдән әмәл един. Ислам Республикасында вәзифә гәбул етмәнин әсас шәрти – вилајәти-фәгигә етигад вә әмәлдир. Мән нә тәндир вилајәти дејирәм, нә дә гануни вилајәт. Бунларын һеч бири вәһдәти һәлл етмир. Гануни вилајәт, мүсәлман вә гејри-мүсәлман олан бүтүн халга аиддир. Әмәли вилајәт исә өлкәнин, өзү дә шәһид вермиш бир Ислам өлкәсинин мүһүм бир јүкүнүн алтына ҝирмәк истәјән мәсул шәхсләрә аиддир.

2. Ислам Республикасына, онун әхлаг вә дәјәрләрдән тутмуш, халг вә Ислам гаршысында мәсулијјәтләрә гәдәр бүтүн әсасларына һәгиги етигад.

3. Бир кәндә башчы тәјин олунан кими кечмиш мүлкәдарларын хатирәсини ҹанландыранлары јох, әлитәмиз, инанҹлы вә халга хидмәтчи шәхсләри ишә ҝөтүрмәк;

4. Фәсадла мүбаризәни, коррупсија вә дәбдәбәдән узаг дурмағы һәјат тәрзинә чевирмәк;

5. Вәзифәсиндән асылы олмајараг, халга һөрмәт вә хидмәти ибадәт билмәк, өзүнү әсил хидмәтчи, дәјәрләрин тәблиғатчысы сајмаг, әсассыз бәһанәләрлә дәјәрләри бојкот етмәмәк.

Мәсул шәхсләр ҹәмијјәти ата кими тәрбијә вә мүһафизә вәзифәләринә диггәт јетирсинләр, лагејдликлә, һиссләрә ҝөрә вә сәс газанмагдан өтрү ҹәмијјәтдә тәлаг вә фәсады јајмасынлар, аиләләри дағыдан характерләри дәстәкләмәсинләр. Һөкумәтләр аиләләрин мөһкәнмәсиндә вә дағылмасында мүһүм амилдирләр. Әҝәр принсипләрә әмәл олунса – һамы рәһбәр, ингилаб вә Ислам республикасы јолунда олар, даһа лајиглини сечмәк үчүн һәмин принсипләр әтрафында сағлам рәгабәт баш тутар.

 

Корпусдакы гардашлара мүраҹиәт

Корпусдакы әзиз вә фәдакар гардашлара вә ордудакы пасдарлара гыса хатырлатмам вар: Командир сечәркән бөһраны идарәетмә ҹәсарәтини вә гүввәсини мејар сечин. Тәбии ки, вилајәт мәсәләсинә тохунмурам. Чүнки силаһлы гүввәләрдә вилајәт мәсәләси – хырда мәсәлә дејил, онун варлығынын әсасы вә тохунулмаз шәртдир.

Башга бир мәсәлә – дүшмәни, онун мәгсәд вә сијасәтләрини вахтында танымаг, вахтында гәрар гәбул едиб, вахтында һәрәкәтә кечмәкдир. Бунларын һәр һансы бири вахтында баш тутмаса, гәләбәнизә ҹидди тәсир едәҹәк.

 

Дин алимләринә вә бөјүк тәглид мүҹтәһидләринә мүраҹиәт

Ҹәбһәләрин гырх иллик әсҝәриндән бөјүк дин алимләринә, ҹәмијјәтин маарифләнмәсинә, гаранлыгларын ајдына чыхмасына сәбәб олан дәјәрли тәглид мүҹтәһидләринә гыса бир месаж вар. Әсҝәриниз мүшаһидә гүлләсиндән ҝөрдү ки, бу гурулуша хәсарәт тохунса, бүтүн дин вә елм һөвзәләриндә уғрунда әзаб-әзијјәт чәкдијиниз дәјәрләр сырадан чыхаҹаг. Бу дөнәмләр, бүтүн дөнәмләрдән фәрглидир. Әҝәр бу дәфә һаким олсалар, даһа Исламдан һеч нә галмајаҹаг.

Доғру јол – ингилабы, Ислам республикасыны вә фәгиһ рәһбәри һеч нәји нәзәрә алмадан дәстәкләмәкдир. Һадисәләр заманы Исламын үмиди олан сизләри нәјисә нәзәрә алмаға һеч ким вадар едә билмәмәлидир.

Һамыныз Рәһмәтлик Имамы севир, јолунун доғрулуғуна инанырдыныз. Имамын јолу – Америкаја гаршы мүбаризә, Ислам республикасыны вә империализмин зүлмү алтында галмыш мүсәлманлары фәгиһ рәһбәр бајрағы алтында дәстәкләмәкдир.

Мән нөгсанлы ағлымла ҝөрүрдүм ки, бәзи шејтанлар һагг дону ҝејинәрәк тәглид мүҹтәһидләрини вә нүфузлу алимләри өз сөзләри илә сүкута вә нәјисә нәзәрә алмаға вадар етмәјә чалышырдылар вә чалышырлар. Һагг ајдындыр: Ислам республикасы, дәјәрләр, Имам Хомејнинин ирси олан вилајәти-фәгиһ. Бунлары ҹидди шәкилдә дәстәкләмәк лазымдыр. Мән һәзрәт Ајәтуллаһ Хаменеини чох мәзлум вә тәнһа ҝөрүрәм. Онун сизин көмәјинизә, дәстәјинизә еһтијаҹы вар. Сиз бөјүк алимләр сөзләринизлә, дәстәкләринизлә, онунла ҝөрүшләринизлә ҹәмијјәтә месаж вермәлисиниз. Әҝәр бу ингилаба хәсарәт тохунса, һәтта мәлун шаһын дөврү кими дә олмајаҹаг, һеҝемон гүввәләр халгы мүтләг динсизлијә вә дөнүшү олмајан дәрин азғынлыға сүрүкләјәҹәкләр.

Мүбарәк әлләриниздән өпүр, бу сөзләрә ҝөрә сиздән үзр истәјирәм. Буну һүзурунуза ҝәләрәк сөјләмәк истәјирдим, амма имкан олмады.

Әлләриниздән өпән әсҝәриниз.


Һамыдан әфв диләјирәм.

Гоншуларымдан, достларымдан вә һәмкарларымдан бағышланма вә әфв диләјирәм. “Сарәллаһ” дивизијасынын дөјүшчүләриндән, дүшмәнин ҝөзүнә тикан, јолуна сәдд олан әзәмәтли Гүдс гүввәләриндән, хүсусән дә гардашҹасына мәнә көмәк едәнләрдән һалаллыг вә әфв истәјирәм.

 

Мәнә хејирхаһлыгла, гардашҹасына, өвлады кими көмәк едән вә гардашларым кими севдијим Һүсејн Пурҹәфәринин адыны чәкмәјә билмәрәм. Онун аиләсиндән, бүтүн дөјүшчү вә мүҹаһид гардашларымын әзијјәтә салдығым аиләләриндән үзр истәјирәм.

Әлбәттә, Гүдс ганадындакы бүтүн гардашлар мәни өз гардашлары кими истәјиб көмәк етмишләр; о ҹүмләдән мәнә сәбир вә мәтанәтлә дөзмүш әзиз гардашым Сәрдар Гаани…




Дејерлер
Диггәт! Хәбәрдән Истифадә етдикдә мәнбәјә истинад лазымдыр.