Әһли Бејт (әлејһимус сәлам) Хәбәр Аҝентлији АБНА-нын вердији мәлумата ҝөрә, Иран Ислам Ингилабы Кешикчиләр Корпусунун (СЕПАҺ) “Әл Гүдс” хүсуси тәјинатлы гүввәләринин команданы олмуш ҝенерал Гасым Сүлејманинин АБШ-ын һава һүҹуму нәтиҹәсиндә өлдүрүлмәсиндән сонра мәтбуатда бу шәхсә мараг артды. Бәс Гасым Сүлејмани ким иди?
Гасым Сүлејмани Әфганыстандан Ирага гәдәр Иранын бөлҝәдәки сијасәтиндә ән әһәмијјәтли шәхсләрдән бири олараг таныныб.
АБШ президенти Доналд Трампын әмрләри илә Бағдад Һава лиманына едилән һүҹумда Һашди Шабинин икинҹи шәхси Әбу Меһди Мүһәндислә бирликдә өлдүрүлән Сүлејмани, Иран лидери Ајәтуллаһ Әли Хаменеи тәрәфиндән “ҹанлы шәһид” адландырылыб.
Бирбаша Иран лидери Хаменеинин рәһбәрлији алтында фәалијјәт ҝөстәрән Сүлејмани 1998-ҹи илдән бәри Иранын хариҹдәки һәрби-кәшфијјат әмәлијјатларына ҹавабдеһ олан Гүдс Гүввәләринин команданы иди.
Бирләшмиш Милләтләр Тәшкилатынын (БМТ) 2007-ҹи илдә тәтбиг етдији бејнәлхалг сәјаһәт гадағасына бахмајараг, Гасым Сүлејмани бир чох нөгтәләрдә, хүсусән дә Сурија вә Ирагда Иранын һәрби әмәлијјатларына рәһбәрлик едирди.
Сүлејмани 2018-ҹи илин ијул ајында Трампын Ирана гаршы мүһарибә тәһдидләринә ҹаваб олараг, “Дүнјада ҝөрүнмәмиш һәрәкәтлә бизи тәһдид едирсиниз. Мүһарибәјә башлаја биләрсиниз, анҹаг биз буна сон гојаҹағыг” сөјләмишди.
О, 1957-ҹи илдә Иранын Әфганыстан сәрһәдинә јахын бир дағлыг бөлҝәсиндә, Кирман әјаләтинин ҹәнуб-шәрг әјаләтиндә, гәбилә гурулушларынын үстүнлүк тәшкил етдији Раборд кәндиндә анадан олуб. Сүлејмани атасынын дөвләтә олан әкинчи борҹларыны өдәмәк үчүн ушаглыгдан иншаат ишләри илә мәшғул олуб.
Ҝәләҹәк ҝенерал орта мәктәби битирдији илдә кәнддән чыхыб вә Ингилаб Кешикчиләри Ордусуна гошулуб.
Сонрадан алдығы 45 ҝүнлүк һәрби тәһсил нәзәрә алынмаса, о өмрү боју ҹәми 5 иллик орта мәктәб тәһсили илә кифајәтләниб.
Ингилабдан сонра Иран-Ираг мүһарибәсиндәки хидмәтләри илә диггәти ҹәлб едән Сүлејмани бир чох әмәлијјаты уғурла идарә едиб. 20 јашында лејтенант рүтбәси илә 41-ҹи Саруллаһ Лигасынын команданлығыны ҝөтүрүб вә бу мүһарибәдәки уғурлары илә һәрби карјерасынын пилләләринә галхмаға башлајыб.
Ираг мүһарибәсиндә күрд лидерләри илә јахындан ишләмәк Сүлејманинин Сәддамдан сонра Ирагдакы сијасәтчиләрлә хүсуси мүнасибәтләр гурмасына јахшы зәмин јаратды.
Гасым Сүлејмани тәкҹә шиәләрлә дејил, Ирагдакы сүнни лидерләрлә дә јахшы әлагәләр гурурду. Ирагын кечмиш президенти Ҹәлал Талабани дә дахил олмагла бир сыра сијасәтчиләрлә јахын әлагәләри олан Сүлејмани, шиә лидери Мугтада әс-Сәдрин диҝәр сијаси групларла барышмасына көмәк етмишди. Сүлејмани Ирагын сүнни витсе-президенти Осама Нуҹејфи илә дә јахын мүнасибәтләр гурмушду.
Диггәт: Хәбәрдән истифадә етдикдә мәнбәјә истинад лазымдыр!
