Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Дөвләт Тәһлүкәсизлији Хидмәти (ДТХ) апардығы анти-террор әмәлијјатлары заманы сәләфи әгидәли екстремист ҹинајәткар бирлијин тәркибиндә Азәрбајҹан Республикасынын һүдудларындан кәнарда ҝедән силаһлы мүнагишәләрдә иштирак едәрәк террор актлары төрәдән шәхсләрин ҝизли малијјәләшдирилмәсини тәсбит едилиб.
ДТХ-нын Иҹтимаи әлагәләр шөбәсиндән Тренд-ә верилән мәлумата ҝөрә, Дөвләт Тәһлүкәсизлији Хидмәтиндә Азәрбајҹан Республикасы Ҹинајәт Мәҹәлләсинин 214-1 (террорчулуғу малијјәләшдирмә), 218.2 (ҹинајәткар бирликдә иштирак етмә), 283-1.3 (Азәрбајҹан Республикасынын һүдудларындан кәнарда апарылан силаһлы мүнагишәләрдә иштирак етмә) маддәләри илә башланылмыш ҹинајәт иши үзрә истинтаг-әмәлијјат тәдбирләри апарылыр.
Мүәјјән едилиб ки, Азәрбајҹан Республикасынын вәтәндашлары Ағајев Илгар Әршад оғлу, Ибраһимов Саһил Фәһрад оғлу, Мәммәдов Намиг Натиг оғлу вә диҝәрләри 2017-ҹи илин октјабр ајындан етибарән Сурија әразисиндә силаһлы мүнагишәләр апаран террор тәшкилаты үзвләринин вә онларын ҹинајәткар фәалијјәтләринин тәмин едилмәси мәгсәдилә ајры-ајры өлкәләрдәки террор тәшкилатынын үзвләри тәрәфиндән ҝөндәрилән пул вәсаитләринин, һабелә һәмин силаһлы мүнагишәләрдә иштирак едәнләрин јахынлары илә әлагәјә ҝириб алдыглары пул вәсаитләринин мүнтәзәм олараг, үмумиликдә 500 000 АБШ долларындан чох пулун мүхтәлиф јолларла тәшкилатын Сурија әразисиндә фәалијјәт ҝөстәрән үзвләринә ҝөндәрилмәсини вә чатдырылмасыны тәмин едибләр.
Гејд олунан шәхсләр ҹинајәт мәсулијјәтинә ҹәлб едиләрәк мәһкәмәнин гәрары илә барәләриндә һәбс гәтимкан тәдбири сечилиб.
Һазырда арашдырмалар давам едир.
Диггәт: Хәбәрдән истифадә етдикдә мәнбәјә истинад лазымдыр
