Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, һәбсдә олан Азәрбајҹан Руһаниләр Мәҹлисинин (АРМ) үзвү, Маиде.Аз сајтынын баш редактору, намаз мәһбусу Шејх Сәрдар Һаҹыһәсәнлинин Масаллыда мәһкәмәси кечирилиб.
Масаллы Рајон Мәһкәмәсиндә әдаләтсиз һаким Анар Алмәммәдовун сәдрлији илә кечирилән гондарма мәһкәмәдә өнҹә вәкилләр вәсатәтлә чыхыш едиб.
Вәкил Ҹавад Ҹавадов ики вәсатәт галдырыб вә мәһкәмәнин аудио вә видеосунун лентә алынмасы, һәмчинин Шејх Сәрдарын мүдафиә һүгугунун јахшы формада тәмини үчүн, јәни үмуми мәһкәмәнин гајдасыны позмамаг үчүн вәкилләрин јанында отурмасына иҹазә верилмәсини тәләб едиб.
Лакин әдаләтсиз һаким вәсатәтә бахмајыб вә ҝәлән мәһкәмә просесиндә бунунла бағлы гәрар верәҹәјини билдириб. Дөвләт иттиһамчысы бу вәсатәтә етиразыны билдирмәјиб.
Вәкил Ҹавад Ҹавадовун нөвбәти вәсатәти Шејх Сәрдар Һаҹыһәсәнлинин һәбсинин ев дустаглығы илә әвәз олунмасына даир олду. Һәмчинин ибтидаи истинтаг бахышы үчүн ишин јенидән прокурорлуға ҝөндәрилмәси тәләб едилди. Лакин дөвләт иттиһамчысынын буна етираз билдирмәсиндән сонра әдаләтсиз һаким вәсатәти тәмин етмәди.
Даһа сонра мәһкәмәдә Шејх Сәрдар Һаҹыһәсәнли чыхыш едиб. Руһани билдириб ки ону иттиһам етдикләри маддәнин әсасландығы ганунун өзүндә Ислама гаршы бир нөв һәгарәт вә һөрмәтсизлик вар. Чүнки өлкәнин 90 фаизиндән чоху мүсәлмандыр вә Ҹүмә Намазы халгын дәјәридир. Бу дәјәрин мәһдудлашдырылмасына даир ганунун гәбулу әслиндә бир нөв Ислам дининә гаршы басгы вә һәгарәтдир.
Руһани сөзүнүн давамында гејд едиб ки, она гаршы ирәли сүрүлән иттиһамын маһијјәтини әслиндә баша дүшмәјә чалышыр: “Бу ҝүнә гәдәр бу јерсиз иттиһамын маһијјәти ајдын дејил. Әҝәр бу ҝүн бунлар өз ганунларында Авропа стандартларына, бејнәлхалг ганунлара истинад едирләрсә, һәр һәфтәнин ҹүмә ҝүнү дүнјанын инкишаф етмиш өлкәләриндә, о ҹүмләдән Авропада, Америкада һәтта мүсәлман әһалиси аз олан өлкәләрдә белә ҹүмә ҝүнү “ҹүмә намазы” гылыныр. Һәмин намазлар мәһз мәним (Шејх Сәрдарын) тәһсил алдығы бејнәлхалг университетин мәзунлары тәрәфиндән иҹра олунур. Онда белә чыхыр ки, бунлар кы, бу ҝүн иддиа едирләр бизим ганунлар бејнәлхалг ганунлара ујғундур амма ортада фәргли дурумдур".
Шејх Сәрдар һәмчинин билдирди ки, әҝәр сөһбәт хариҹдә тәһсил алмадан ҝедирсә, о, 2000-ҹи илдә тәһсилини битириб вә ҝери гајыдыб. “Бу ганун 2015-ҹи илдә гәбул олунуб. Ганунун ҝери охунушу олмадығы үчүн мәнә аидијјәти јохдур. Һәмчинин мән 1991-ҹи илин сентјабр ајында тәһсил алмаға ҝетмишәм. Һәмин вахт һәлә Совет һөкумәти мөвҹуд иди. Һеч мүстәгиллик елан едилмәмишди. Һәтта мүстәгилликдән сонра ҝетсәјдим белә јенә бу ганун мәнә шамил едилә билмәз. Одур ки, һүгуги ҹәһәтдән бу ганунун мәнә гаршы тәтбиг едилмәси јанлышдыр”.
Шејх Сәрдар әдаләтсиз һакимә суал да үнванлајыб: “Бир мәтләби гејд етмәк истәјирәм. Әҝәр сабаһ мәним анам дүнјасыны дәјишсә вә анам үчүн мејит намазы гылмаг истәсәм онда мәнә јенә ҹинајәт иши ачаҹагсыныз? Јахуд, зәлзәлә олду, ајәт намазы гылынмалыдыр. Онда да һәбс едәҹәксиниз? Ганунда хүсуси олараг дини ајин гејди анлашылан дејил. Бу мәсәлә өз һәллини тапмалыдыр вә ајдынлашмалыдыр. Ганун гүсурлудур вә дүзҝүн тәтбиг олунмајыб".
Даһа сонра вәкилләр мүхтәлиф вәсатәтләрлә чыхыш етди. Һәбс гәти-имкан тәдбирини тамамилә ләғви тәләб едилди. Лакин бүтүн вәсатәтләрә дөвләт иттиһамчысы тәрәфиндән етираз едилди. Әдаләтсиз һаким исә һеч бир вәсатәти тәмин етмәди.
Сонда әдаләтсиз һаким нөвбәти мәһкәмәнин мајын 25-дә саат 11-дә кечириләҹәјини ачыглады.
Диггәт: Хәбәрдән истифадә етдикдә мәнбәјә истинад лазымдыр
