Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, әлыијевләр режиминин һәјата кечиртдији Нардаран ҹинајәтләриндән сонра вә бу бу ҹинајәтләрдән бир мүддәт өнҹә ШӘРЛӘНӘРӘК һәбс олунан вә ағыр маддәләрлә гараланан, һәр бири 12 нәфәрдән ибарәт даһа ики групун мүһакимәси Бакы Ағыр Ҹинајәтләр Мәһкәмәсиндә давам едир.
Мүсәлман Бирлији Һәрәкатынын сәдр мүавини, Шиә Руһаниси Елчин Гасымов вә даһа 11 нәфәр Шиә Руһаниси вә активистләрин иши үзрә апрелин 28-дә кечирилән мәһкәмә галмагалла јадда галыб. Галмагал исә Руһани Елчин Гасымовла бу ишә бахан режимин әдаләтсиз һакими Мајыл Бајрамов арасында баш вериб.
Әввәлҹә галмагала сәбәб олан олајлара диггәт јетирәк. Иттиһамда јазылыб ки, ҝүја Руһани Елчин Гасымов 2015-ҹи ил нојабрын 5-дә Мәсҹиддән чыхыб ҝедәркән јолда сөјүш сөјүб, полис әмәкдашлары ону интизама дәвәт етсәләр дә, әһәмијјәт вермәјибләр. Она ҝөрә дә тутуб Сабунчу рајон Полис Идарәсинә ҝәтирибләр. Она 30 сутка инзибати һәбс ҹәзасы верибләр. Амма нојабрын 26-да Нардаранда 6 нәфәрин өлүмү илә нәтиҹәләнмиш ганлы әмәлијјат баш верәндән сонра бир чох башгалары кими, һәмин вахт инзибати һәбсә ҝөрә тәҹридханада олан Руһани Елчин Гасымов һаггында да ҹинајәт иши башланыб. Она дөвләт чеврилишинә ҹәһддән тутмуш, террорчулуға гәдәр бир хејли ағыр маддәләрлә иттиһамлар верилиб.
Чөрәји …-дан чыхан полис: “Елчини сахлајанда папағым јерә дүшүб, она ҝөрә зәрәрчәкмишәм”
Апрелин 28-дә мәһкәмәдә Руһани Елчин Гасымовун тутулмасы епизоду үзрә Сабунчу рајон Полис Идарәсинин 14-ҹү полис бөлмәсинин саһә инспектору вә чөрәји …-дән чыхан Јусиф Гурбанов “зәрәрчәкмиш” гисминдә ифадә вериб. Тәхминән 50-55 јашларында олан Гурбанов вәкилләрин “нәдән зәрәр чәкмисән?” суалына ҹаваб верәркән дејиб ки, “Елчин Гасымову сахлајаркән папағым јерә дүшмүшдү”. Полис иддиа едиб ки, 2015-ҹи ил нојабрын 5-дә диҝәр саһә инспектору Емин Бабајевлә бирликдә хидмәтдә олублар. Һәмин вахт Елчин Гасымов Мәсҹиддән чыхыб, онлара тәрәф ҝәләркән тәһгирамиз ифадәләр ишләдиб: “Јахынлашыб сакитләшдирмәјә чалышдыг, лакин мүгавимәт ҝөстәрди, машына минмәк истәмирди, зорла машына миндириб апардыг полис идарәсинә”.
Халхын үзүнә дурараг евинә гәпик-гуруш апаран Гурбанов Елчин Гасымову ушаглыгдан таныдығыны дејиб вә ону мүсбәт характеризә едиб. Бахмајараг ки, папағы јерә дүшдүјүнә ҝөрә өзүнү зәрәрчәкмиш һесаб едир, амма Елчин Гасымовдан һеч бир шикајәт тәләбинин олмадығыны сөјләјиб. Руһани Елчин Гасымов исә полисин јалан данышдығыны билдириб: “Дүзүнү дејирсән, ја суалларла ортаја чыхарым? Олмаз ахы белә. Зәрәрчәкмиш јалан ифадә вериб. Мәни онлар тутмајыб. Мәни Садиг Һејдәров вә 3 нәфәр ҝәлиб полис идарәсинә дәвәт едиб. Сизи јалан данышмаға нә вадар едир?”
Гурбанов исә исрар едиб ки, о, дүзүнү данышыр.
Руһани Елчин Гасымов етираз едиб: “Һәр ики саһә инспекторунун ифадәси ејни формада јазылыб. Анҹаг ад вә сојад јерләрини бош гојублар, бунлар да ону долдуруб. Мән бу шәхси ахшам идарәдә ҝөрмүшәм. Икиниз дә ҝирдиниз ичәри, горхурдунуз. Мәни сәнинлә “бандотдел”дә үзләшдирәндә дедин ки, “мәним әлимдә дејил, јохса сәни бурахдырардым”. Фәрһад Мурадов да орада иди. Бу адамы мәҹбур едибләр, үзүмә дајаныб. Ону өјрәдибләр. Инди үзүмә баха билмир, виҹдан әзабы чәкир. Сизин гол чәкдијиниз бу ифадәјә ҝөрә нә гәдәр аилә башсыз галыб. Адамын кишилији олар, бојнуна алар. Бу адамын бојнуна гојублар һамысыны. Ифадәдәки зиддијјәтә бахын, јазылыб ки, мән сәс-күј салмышам, ора јығыланлар бир аз сонра дағылышыб ҝедибләр. Сонра да јазылыб ки, јарым саат сонра ҹамаат мәнә ҝөрә јығылыб полис идарәсинин габағына. Нә олду ки бәс сонра идарәнин гаршысына јығылдылар? Инсанлар вар ки, сијаси тәблиғат апармаг үчүн милјонлар сәрф едирләр. Мәни тутанда ҹибимдә анҹаг метро картым олуб. Башга һеч нә олмајыб. Мән һәр јерә метројла ҝедиб-ҝәлмишәм. Биз 1 манат да хәрҹләмәмишик ки, инсанлар бизә мәһәббәт бәсләсинләр. Буну едән аләмләрин Рәбби олан Аллаһдыр. Баҹардығымыз гәдәр чалышмышыг Аллаһын јолу илә ҝедәк. Гәлбләри фәтһ етмәк үчүн милјонлара еһтијаҹ јохдур, бу ҹүр инсанларын ҹисимләрини (зәрәр чәкмиш Гурбанову ҝөстәрәрәк) алмаг үчүн пула вә вәзифәјә еһтијаҹ вар. Бу ишин ачары мәһз бу мәгамдадыр. Бу адам һәгигәти десә, нә гәдәр мәсәләләрин үстү ачылар. Сәнә бундан сонра полковник рүтбәси вермәјәҹәкләр, буна әмин ола биләрсән. Полис идарәсиндә Азәрбајҹан полиси ајаггабыларыны ағзымыза сохурду. Мәнә орада сәһәрә гәдәр ишҝәнҹә, ток вердиләр. Сәһәр отаға галдырдылар, хулиганлыгла бағлы инзибати протокол гојдулар габағыма, дедим, елә шеј олмајыб. Сонра апардылар мәкәмәјә, мәнә 30 сутка инзибати һәбс верди. Бәс сонрадан фикринизи нә дәјишди ки, ҹинајәт иши ачдыныз? Сәнә һәдә-горху ҝәлдиләр ки, ишдән чыхарарлар, ја тәһдид етдиләр ки, тутарлар сәни?”
Әдаләтсиз һакимлә Шиә Руһаниси арасында галмагал
Бу суала “ишверән полис”ин әвәзинә әдаләтсиз һаким ҹаваб вериб: “Елә шеј олмајыб”.
Әдаләтсиз һакимин бу аддымы Елчин Гасымову һиддәтләндириб. Онларын арасында мүбаһисә јараныб.
Елшин Гасымов:
– Тамаша гурмусан бурда.
Әдаләтсиз һаким Мајыл Бајрамов:
– Тамашаны сән өзүн гурмусан.
Бу заман һакимин зәрәрчәкмиш полисә “ҝедә биләрсән” демәси Руһани Елчин Гасымову даһа да әсәбиләшдириб:
– Һара ҝедир, суалларым вар һәлә. О, бура гајытмаса, мәһкәмә олмајаҹаг.
Әдаләтсиз һаким Мајыл Бајрамов:
– Олаҹаг.
Шиә Руһаниси:
- Ҝөр мән дејән олаҹаг, ја сән дејән?
Әдаләтсиз Һаким:
– Отур ашағы.
Шиә Руһаниси:
– Мән сәнә демишәм ки, мәнимлә әмрлә данышма. Сән кимләр үчүнсә һаким ола биләрсән, амма бизим үчүн һаким дејилсән.
Әдаләтсиз һаким:
– Отур ашағы.
Шиә Руһаниси:
– Әмр еләмә мәнә.
Әдаләтсиз һаким:
– Сән отурмаг үчүн дә иҹазә алмалысан.
Шиә Руһаниси:
– Әмр еләмә мәнә. Иҹазә алмырам. Сәни һаким сајмырам.
Әдаләтсиз һаким:
– Өзүн биләрсән.
Шиә Руһаниси:
– Әлбәттә, өзүм биләрәм.
Әдаләтсиз һаким:
– Гајда-гануна табе олмалысан.
Шиә Руһаниси:
– Һансы гајда-ганундан данышырсан сән? Гајда-ганунларын һамысыны әт машынында чәкмисиниз.
Әдаләтсиз һаким:
– Хәбәрдарлыг олунур сәнә, икинҹи дәфә.
Шиә Руһаниси:
– Лап 10 дәфә елә.
Әдаләтсиз һаким:
– Ҝөрәрсән сән.
Шиә Руһаниси:
– Сәндән горхмурам. Өзүн дә гышгырма, мәни тәһдид еләмә.
Әдаләтсиз һаким:
– Отур ашағы.
Шиә Руһаниси:
– Әмр еләмә.
Әдаләтсиз һаким:
– Әмр еләмирәм, тәләб едирәм, сән дә табе олмалысан.
Шиә Руһаниси:
– Һирсләнмә, үрәјин тутар, јазыгсан…
Әдаләтсиз һаким:
– Отур ашағы.
Шиә Руһаниси:
– Ешидирсән мәни, мәнимлә әмрлә данышма. Мәнә “отур ашағы” демәјәҹәксән.
Әдаләтсиз һаким:
– Бәс нә дејим, дејим галх ҝөјә?..
Бу мүбаһисәдән сонра “зәрәрчәкмиш” ишверән Гурбанов зала гајыдыб. Нөвбәти ШӘРЛӘНӘН Шиә Руһаниси Иса Ибраһимов она дејиб: “Јашар Нури билсәјди ки, бу ҹүр актјор вар, корифеј олмазды…”.
Вәкилләрдән бири “зәрәрчәкмиш” полисә белә бир суал вериб: “Сиз Тале Бағырзадәнин дә мәһкәмәсиндә ифадә верәндә сизә Максим Горкинин “Лазымсыз адам” әсәрини охумағы мәсләһәт билдиләр. Охудунуз?”. Һаким суалы чыхарыб.
Мәһкәмә мајын 5-дә давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
