Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Мүсәлман Бирлији Һәрәкатынын сәдри Һөҹҹәтүл Ислам Тале Бағырзадә вә даһа 17 нәфәрин мәһкәмәси баша чатса да, Нардаран һадисәләринә ҝөрә һәбс олунан даһа ики групун мәһкәмәси давам едир. Һәр бири 12 нәфәрдән ибарәт бу групларын ишинә Бакы Ағыр Ҹинајәтләр Мәһкәмәсиндә бахылыр.
Мартын 13-дә Шиә Руһаниси, Гуран Һафизи, Һөҹҹәтүл Ислам Һаҹы Зүлфүгар Микајылов вә даһа 11 нәфәрин – Һөҹҹәтүл Ислам Сејјид Елман Ағајев, Фаиг Аллаһвердијев, Меһман Гулијев, Меһман Мәммәдов, Елдар Бүнјадов, Елхан Һәсәнов, Мүбариз Ибраһимов, Әли Һүсејнов, Рамил Сејфуллајев, Һөҹҹәтүл Ислам Рузи Исмајылов вә Ҹабир Әлијевин иши мәһкәмә просеси давам едиб. Онларын ишинә һаким Зејнал Ағајевин сәдрлији илә бахылыр.
“Һәбсханада ермәнини көкәлдирдиләр, бизә зүлм еләјирдиләр”
Буҝүнкү мәһкәмәдә әввәлҹә тәгсирләндирилән шәхсләрдән Мүбариз Ибраһимов ифадә вериб. Ҝәнҹә сакини олан Мүбариз Ибраһимов билдириб ки, 17 јашындан намаз гылыр. 2015-ҹи илин нојабрында Нардарандакы гәтлиамдан 4 ҝүн сонра – ајын 30-да Ҝәнҹәдәки Шаһ Аббас мәсҹидиндә ҝүнорта намаз гылыб чыхандан сонра тәгиб олундуғуну һисс еләјиб: “Ондан габаг дөвләт адамларындан бир нәфәр мәнә демишди ки, “тутһатутдур, Руси Исмајылову тутублар, сәнин адын да гара сијаһыдадыр, чалыш арадан чых”. Дедим, нејләмишәм бәјәм арадан чыхым?! Нојабрын 30-да саат 4-дә машыны јанаҹагдолдурма мәнтәгәсиндә сахламышдым, бир нәфәр мәнә јахынлашды, дүшүртдүләр машындан мәни. Елә бил Бен Ладени апарырдылар. Сүрүјә-сүрүјә, дөјә-дөјә голума гандал вуруб ҹамаатын ҝөзү габағында салдылар мәни башга машына. Мәним машынымы өзләри сүрдүләр. Мәни вә һөрмәт етдијим шәхсләри тәһгир етдиләр, сүрүјә-сүрүјә Ҝәнҹә Шәһәр Баш Полис Идарәсинә апарыб, пилләкәнләрлә галдырырдылар. 2-3 саат дизи үстә әли гандаллы сахладылар. Су да вермәдиләр, намаз гылмаға да гојмадылар. Дејирдиләр “бојнуна ал”, амма билмирдим ки, нәји бојнума алым. Мәни идарәнин Мүтәшәккил Ҹинајәткарлыға гаршы Мүбаризә бөлмәсинин рәиси Расим Гурбановун отағына апардылар. Илкдәфәгумбараныда, наркотикидәорадаҝөрдүм. Дедиләрки, “биринисеч”. Елә бил базарда картоф сечирдим. Разылашмајанда Расим Гурбанов мәни дөрдү, тәһгир етди, ағзынын сујуну ахытды үстүмә. Деди ки, “бојнуна алмасан, чох пис тәһгир едиб, видеону јајаҹағыг”. Өзүмү ермәни әсирлијиндә һисс едирдим”.
Мүбариз Ибраһимовун сөзләринә ҝөрә, полисләр өзләри онун машынына гумбара вә “Һаҹы Талеһ Бағырзадәнин мүраҹиәти” адлы китабчалар гојублар, сонра елә өзләри дә ҝөтүрүбләр: “Мән һеч сигарет чәкмирәм. Мәнә дедиләр ки, елә еләмә, гардашыны, гајныны, језнәни ҝәтирәк бура”. Дедиләр ки, бу иш дөвләт тәдбиридир. Дедим, бәјәм дөвләт ҝүнаһсыз инсанлары тутмағы тапшырыб? Гардашларым касыбчылыгла доланан адамларды, мәнә ҝөрә онлара әзијјәт вермәсинләр дејә, дедикләрини имзаладым. Аллаһ орадакы вәзијјәти һеч кимә ҝөстәрмәсин. Мәнә дедиләр ки, јаз, гумбараны зибилликдән тапмысан. Ҝәнҹә зибиллијиндә наркотик, гумбара гуртармады?
Ҝәнҹә Шәһәр Баш Полис Идарәсинин рәиси олмуш, Расим Мусајев, артыг өлүб, бизи чағырыб тәһгир едирди, вурурду. Биз Имам Һүсејнә тәзијә сахлајырдыг, дүшдүк гара сијаһыја. Јарашмаз өз милләтимизә гаршы оҹүр һәрәкәтләр етмәк. Сабаһ Гарабағда дөјүшә чағырсалар, бүтүн диндарлар ҹанла башла ҝедәр. Биз һеч вахт дөвләт әлејһинә чағырышлар етмәмишик. 4 нәфәрлә, 4 гумбара илә дә дөвләт чеврилиши едәрләр? Ајыб олсун бунлара ки, бу маддәләри гојублар бизә. Маддәләрин һеч бири илә өзүмү тәгсирли билмирәм. Ҝәнҹә һәбсханасында бир нәфәр дә ермәни вар иди, дедиләр, бу, нә јаман көкәлиб, ағарыб. Она елә бахырдылар, бизә бу ҹүр зүлм еләјирдиләр”.
Мүбариз Ибраһимов суаллары ҹавабландыраркән билдириб ки, Талеһ Бағырзадәни һеч үздән дә ҝөрмәјиб, Нардаранда һеч вахт олмајыб, Мүсәлман Бирлији Һәрәкаты барәдә исә јалныз һәбс едиләндән сонра ешидиб. О һәмчинин дөвләт һесабына тәјин едилмиш вәкилдән ҝилејләниб. Дејиб ки, онун полисләрдән һеч бир фәрги јох иди. Ибраһимов тутуландан сонра ајларла аиләси илә ҝөрүшмәсинә вә телефон васитәсилә әлагә сахламасына имкан верилмәдијини дә дејиб.
Тәгсирләндирилән шәхс ону да әлавә едиб ки, һәбиндән сонра дөрд ај аилә үзвләрилә нәинки ҝөрүшмәјә, һәтта телефонла данышмаға да имкан верилмәјиб.
“Әлләримә гандал вуруб, дизүстә чөкдүрдүләр, ағзымын ганы палтарыма төкүлүрдү…”
Даһа сонра тәгсирләндирилән Ҹабир Әлијев ифадә вериб. О да Ҝәнҹә шәһәр Баш Полис Идарәсиндә башына ҝәтирилән дәһшәтли ишҝәнҹәләрдән данышыб.
Ҹабир Әлијев дејир ки, Ҝәнҹәдә атасы илә бирликдә бәрбәр ишләјир. Ахшамүстү саат 5-6 радәләриндә иш јеринә ҝәлиб, ону тутуб апарыблар. Ҹабир Әлијев даһа чох идарәдә Рәшид Пиријевин отағында гејри-инсани мүнасибәтлә үзләшдијини сөјләјир: “Онун отағында үстүмә төкүлүб дөјмәјә башладылар. Һеч нә сорушмадылар да. Әлләримә архадан гандал вуруб, дизүстә чөкдүрдүләр, вуруб дишими сындырдылар, ган төкүлдү палтарыма. Мәнә гаршы гејри-инсани рәфтар етдиләр. Мәнә ҝеҹә 4-ә гәдәр ишҝәнҹә вердиләр. Үзүмүн түкләрини әлләри илә јолдулар. Адамын бир түкүнү дартанда ағрыдан ҝөзүндән јаш ҝәлир. Мәним бүтүн үзүмүн түкүнү әлләри илә бир-бир дартдылар, түк комасыны гојдулар габағыма. Мәнә дедиләр ки, “елә еләмә, тапанчанын евиндән чыхдығыны јазаг, аилә үзвләрини дә бура ҝәтирәк”. Аилә үзвләримә ҝөрә дедикләринә имза атдым. Мәнә әсас ишҝәнҹә верән Рәшид Пиријев иди. Үстәлик, ҝөтүрүб наркотик сатышы иттиһамы да верибләр. Маддәләрин һеч бири илә өзүмү тәгсирли сајмырам. О маддәләрин мәнә аидијјәти јохдур”.
Ҹабир Әлијев дә Талеһ Бағырзадә илә шәхси танышлығынын олмадығыны, ону јалныз интернетдәки чыхышларындан таныдығыны, Мүсәлман Бирлији Һәрәкаты һагда һәбсиндән сонра хәбәр тутуб.
“Дедиләр, башына пис ојун ачаг, чәкиб, ватсапдакы нөмрәләрә ҝөндәрәк…”
Даһа сонра Һөҹҹәтүл Ислам Рузи Исмајылов ифадә вериб. О да иттиһамларын сахта олдуғуну, ишҝәнҹәләр алтында јалан ифадәләрә имза атмаг мәҹбуријјәтиндә галдығыны билдириб:
“Бизә зүлм олунуб. Үзәримизә ағыр иттиһамларын гојулмасы бизә вә динимизә едилән зүлмдүр. Дөјүлән, сөјүлән, өлдүрүлән дә бизик, “террорчу” дамғасы вурулан да. Ислам барыш, сүлһ, гардашлыг динидир. Бизә ИШИД дејирдиләр. Бунлар ИШИД илә шиәни ајырд едә билмирләр, амма јүксәк вәзифәдә отурублар. Биз һәмишә дөвләти дәстәкләмишик. 3-4 ил әввәл Ашура базар ҝүнүнә дүшмүшдү, амма Ҝәнҹәдә базар ҝүнүнә дәрс салдылар ки, адамлар Ашурада иштирак етмәсин. Бу, динлә дүшмәнчиликдир.
Бизим намусумуза вә гејрәтимизә тәҹавүз олунур. Шүкүр ки, халг бизи террорчу кими танымыр. Хәрҹ чәкиб бизи “террорчу” кими гәләмә вермәк истәдиләр, амма истәкләринә наил ола билмәдиләр. Бизи бура саланлар ҹәзаланаҹаглар. Аллаһ ҝеҹ едәр, амма ҝүҹ едәр”.
Исмајылов неҹә һәбс олунмасындан да данышыб: “2015-ҹи илин нојабрында мәсҹиддән чыхдыгдан сонра евә ҝедәндә ҝөрдүм евимин гаршысында ики машын вар. Бир нәфәр машындан дүшдү, Расим Гурбанов иди, әл-голуму бағлајыб, башыма гара торба кечириб салдылар машына. Расим Гурбанов чыхды үстүмә, башлады мәни јумругламаға. Әлини ҹибимә салыб, наркотик вә гумбараны гојду. Мәни идарәјә апардылар, дөјә-дөјә јухары чыхартдылар. Узатдылар архасы үстә, дөјдүләр. Ифадәјә гол чәкмәлијдим ки, ҝуја мәндә гумбара вә наркотик олуб, Огтај адлы полиси гумбара илә ҝөзүнүн алтындан вурмушам. Мән о адамы үмумијјәтлә, танымырам. Әввәлҹә аилә үзвләримлә һәдәләдиләр. Сонра мәнәви тәзјигә кечдиләр, шалварымы ашағы чәкдиләр, бир-биринә дедиләр ки, ҝәлин, бунун башына пис ојун ачаг, ватсапдакы нөмрәләрә пајлајаг, рүсвај олсун. Бири деди ки, “руһанидир, адына хәләл ҝәлмәсини истәмәз, гол чәкәр”. Мәҹбур олуб охумадығым, маһијјәтини билмәдијим вә дәрк етмәдијим вәрәгләрә гол чәкдим. Јаздылар ки, ҝуја көрпүнүн јанындакы мағазаја үтү алмаг үчүн ҝедәндә јолдакы ајагјолуна ҝириб гумбараны орадан тапмышам. Мән евими гојуб киминсә туалетинә нијә ҝиридим?!”
Рузи Исмајылов һәбс олунаркән она дөвләт һесабына тәјин олунмуш Ҹәфәр адлы вәкилдән дә шикајәтләниб. Билдириб ки, вәкил дә она сәнәдләрдә јазыланларын маһијјәтини изаһ етмәдән гол чәкмәсини истәјиб.
Рузи Исмајылов дејир ки, Иранын Гум шәһәриндә тәһсил алыб. Елә Талеһ Бағырзадәни дә бир дә орада ҝөрүб, салам вериб, вәссалам: “Мән өзүм дә билмәк истәјирәм ки, нијә мәни һәбс етдиләр. Јәгин ки, мән Аллаһа иман ҝәтирдијим үчүн инди бурдајам”.
2015-ҹи ил нојабрын 26-да Илһам Әлијевин бир баша нәзарәти илә Баш Мүтәшәккил Ҹинајәткарлыгла Мүбаризә Идарәсинин ишчиләри Нардаран гәсәбәсиндә ганунсуз кечирилән әмәлијјат нәтиҹәсиндә “Мүсәлман Бирлији” Һәрәкатынын рәһбәри Һөҹҹәтүл Ислам Тале Камил оғлу Бағырзадә вә даһа 14 сивил Шиәни һәбс едибләр. Елә һәмин ҝүн Һөҹҹәтүл Ислам Зүлфүгар Сәдрәддин оғлу Микајилову ҝүнорта саат 3 радәләриндә Хырдалан рајонунда јерләшән шәхси мәнзилиндә һәбс едибләр, Һөҹҹәтүл Ислам Сејјид Елман Сејдәмир оғлу Ағајеви исә, нојабырын 28-и јәни Нардаран һадисәсиндән ики ҝүн сонра ләнкәран шәһәр, Диҝаһ кәндиндә јерләшән шәхси евиндә һәбс едибләр. Амма буна бахмајараг Рамил Усубов 26 нојабр тарихдә телевизија гаршысына чыхараг Нардаран һадисәси илә бағлы вердији ачыгламада вә ДИН тәрәфиндән верилән рәсми мәлуматда билдирилди ки, Сејјид Елман вә Зүлфүгар Микајилов да Нардаран гәсәбәсиндә тутулараг һәбс едилибләр. (!)
Ганунсуз кечирилән әмәлијјат заманы әлијев режиминин полисләри 2 полис әмәкдашыны Шиә олдугларына ҝөрә вә Намаз гылдыглары үчүн һабелә 4 гәсәбә сакинин Шәһид едибләр.
Диггәт: Хәбәрдән истифадә етдикдә мәнбәјә истинад лазымдыр
