Әһлибејт (ә) Хәбәр Аҝентлији абна Өзүмү ермәни әсирлијиндәки кими һисс едирдим Мејдан ТВ-нин мәлуматына ҝөрә, һаким Зејнал Ағајевин сәдрлик етдији иҹласда тәгсирләндирилән шәхсләр ифадә верибләр. Онлардан Мүбариз Ибраһимов дејиб ки, 2015-ҹи ил нојабрын 30-да Ҝәнҹәдә “Шаһ Аббас” мәсҹидиндә ҝүнорта намазыны гылыб чыхдыгдан сонра ону киминсә тәгиб етмәсиндән шүбһәләниб:
“Бундан әввәл дөвләт адамларындан бири мәнә һәбсләрин башландығыны демишди. Таныдығым Рузи Исмајылову да тутмушдулар. Һәмин адам мәнә “чалыш арадан чыхасан, сәнин дә адын гара сијаһыдадыр”, - деди. Мәнсә һеч бир гануну позмадығымы сөјләдим”.
Мүбариз Ибраһимов һәбс едилдији ҝүндән дә данышыб. Дејир, һәмин ҝүн јанаҹагдолдурма мәнтәгәсиндә нөвбәдә дајаныбмыш. Машындан чыхарыб, дөјә-дөјә голуна гандал вуруб Ҝәнҹә шәһәр Баш Полис Идарәсинә апарыблар:
“Тутуландан сонра мәни тәһгир етдиләр. Бири “бојнуна ал”, - дејирди. Анҹаг нәји бојнума алмалы олдуғуму билмирдим. Ҝәнҹә шәһәр Полис идарәсинин рәиси Расим Гурбанов “наркотик вә гумбарадан бирини сеч”, - дејирди. Елә бил базардан картоф алырдым. Мән наркотик вә гумбараны биринҹи дәфә орада ҝөрдүм. Расим Гурбанов мәни дөјүб, тәһгир едиб, үзүмә түпүрүрдү. Бојнума алмајаҹағымы дедим. Дедиләр “сәни видеоја чәкиб, интернетдә јајаҹағыг”. Өзүмү ермәни әсирлијиндәки кими һисс едирдим. Бизә гаршы кинләринин сәбәбини билмирәм. Мәним достумун дајысы Илгар Балакишијев орада рәис мүавинидир. Ҝуја ҝәлиб мәнә көмәк етмәк истәјирди. Рәисдән “һансыны гојаг?”, - дејә сорушурду. Сонра дедиләр машындакылар сәниндир? Мән дә дедим бахаг ҝөрәк нә мәнимдир. Орада дини китаб вә мәрсијәләр олан торбанын ичәрисинә бахдылар. Ҝуја Талеһ Бағырзадәнин ики китабчасыны чыхардылар. Биринҹи дәфәдир о китабчалары ҝөрүрдүм. Сонра машынын јүк јеринә бахдылар. Орада балаҹа капрон габ вар. Онунла машыны јујурдум. Ҝуја онун ичәрисиндән гумбара чыхды. Һамысыны дүзүб гошдулар”.
Дедиләр “һөрмәт едиб наркотики ҝөтүрүрүк, силаһлары бојнуна ал” Мүбариз Ибраһимов дејир ки, өзләри гојуб, өзләри ҝөтүрдүләр. Дедиләр “бојнуна алмасан башга шејләр дә олаҹаг”. “Телефонумда Һаҹы Шаһинин, Һејдәр Әлијевин Имам Һүсејнлә бағлы чыхышлары вар иди. Онлары ҝөтүрдүләр. Сонра Расим Гурбановун јанына апардылар. Орада јенә сөјүб дөјдүләр. Дедиләр “һөрмәт едиб наркотики ҝөтүрүрүк, силаһлары бојнуна ал, јахшы олаҹаг”. Дедиләр “гардашын, гајнын вар. Елә еләмә онлары да бураја ҝәтирәк. Бу дөвләт тәдбиридир белә олмалыдыр”. Гардашларым да касыб адамлардыр. Мән онларын да әзијјәт чәкмәләрини истәмәдим. Расим Гурбанов “беш–алты ај јатыб чыхаҹагсан”, - деди. Мәнә тәзјиг олдуғундан имзаламаға мәҹбур олдум. Һеч бир ифадәми тәсдиг етмирәм. Аллаһдан һәмин шәхсләрә һидајәт истәјирәм. Бизи һәр ил Ашурагабағы чағырыб тәһгир едирдиләр, вурурдулар. О вахткы полис рәиси Расим Мусајев чағырыб “Ашура мәҹлисләринә ҝетмәјин”, - дејирдиләр. Биз дә ҝетдијимизә ҝөрә гара сијаһыја салынмышдыг. Рәис “ҝәтириб 10 мин манат версин, ишимиз олмасын”, - дејирди. Мән дә апарыб беш јүз манат вердим ки, әл чәксинләр”.
4 нәфәр вә 4 гумбара илә дөвләтә гаршы чыхмаг олар? Мүбариз Ибраһимов Талеһ Бағырзадәни танымадығыны, Нардаранда һеч вахт олмадығыны сөјләјиб: “Јазыблар ки, мән “Мүсәлман Бирлији”нин Ҝәнҹәдәки нүмајәндәсијәм. Һеч о бирлик һаггында ешитмәмишәм. Биз һеч вахт дөвләтә гаршы чыхмамышыг. 4 нәфәр вә 4 гумбара илә дөвләтә гаршы чыхмаг олар? Дедиләр “үч илә гәдәр һәбс вериләҹәк”. Мән дә фикирләшдим ки, јатыб чыхарам. Сонрадан вәкил деди ки, сәнә 10 маддә илә ағыр иттиһам верилиб. Мән тутуланда Ҝәнҹә һәбсханасында бир ермәни вар иди. Она елә јахшы бахырдылар. Биз һәмишә башгаларына јахшы олмушуг, өзүмүзә пис. Бирдән-бирә террорист олдуг? Һамысы шәр-бөһтандыр. Террорчулуғун нә олдуғуну онлар јахшы биләр. Дејирләр “гумбараны зибилликдән тапдығыны де”. Зибилликдә нә гәдәр гумбара олар? Һәбсдән сонра аиләмлә әлагә јаратмаға имкан вермәдиләр. Өзүмү Бин Ладен кими тәсәввүр едирдим”.
Ишҝәнҹә вә тәзјиг алтында ифадә вермишәм
Даһа сонра тәгсирләндирилән шәхсләрдән Ҹабир Әлијев ифадә вериб. Ҝәнҹә сакини олан Ҹ. Әлијев бәрбәр ишләдијини дејиб:
“Иш јеримә ҝәлдиләр. Мәни һәбс едиб Ҝәнҹә Полис Идарәсинә апардылар. Рәшид Пиријевин отағында мәнә тәзјигләр башлады. Отагда 8-9 нәфәр вар иди. Дедиләр “ҹибиндә нә вар онлары чыхарт”. Мән дә 800 манат пул, тәсбеһ, Иран пулу чыхарыб гојдум столун үстүнә. Башладылар, дөјүб, тәһгир етмәјә. Сәһәрәҹән ишҝәнҹә вердиләр. О ишҝәнҹәләр барәдә данышмаг истәмирәм. Үзүмүн түкләрини јолдулар. Дедиләр “сәндән силаһ чыхыб”. Вәкили анҹаг санксија заманы мәһкәмәдә ҝөрдүм. Мәнә наркотик иттиһамы да верибләр. Талеһ Бағырзадәни интернетдән танымышам. Ишҝәнҹә вә тәзјиг алтында ифадә вермишәм. Дедиләр “ја үзәриндән, ја евдән чыхмасыны јазаҹағыг. Әҝәр евдән чыхарылыб јазсаг, аилән дә бура ҝәтириләҹәк”. Мән дә она ҝөрә үзәримдән чыхарылыб јазмаға разы олдум. Рәшид Пиријев мәнә чох ишҝәнҹә вериб. Өзүмү һеч бир маддә үзрә тәгсирли билмирәм”.
Халгла дөвләт арасында наразылыг јаратмаг истәјирләр Иҹласда тәгсирләндирилән шәхсләрдән Рузи Исмајылов да ифадә вериб. О, иттиһамларын јалан олдуғуну билдириб: “Сиз өзүнүз дә билирсиниз ки, биз һагсыз јерә һәбс олунмушуг. Биз бурада тутулан Һаҹы Әлини машына ҝүҹлә миндиририк. Белә адамын террорла нә әлагәси ола биләр? Бизә зүлм едилиб. Ағыр иттиһамларын верилмәси бизә вә динимизә едилән зүлмдүр. Бәзи инсанлар халгла дөвләт арасында наразылыг јаратмаг истәјирләр. Онлар бу ҝүн иттиһам олунмалыдырлар. Дөјүлән, сөјүлән дә, террорчу дамғасы вурулан да бизик. Бизә ИШИД-чи дејирләр. ИШИД-лә шиәлијин фәргин билмирләр, анҹаг јухары башда отурублар. 3-4 ил әввәл Ҝәнҹәдә Ашура базар ҝүнүнә дүшмүшдү. Һәмин ҝүн мәктәбләрдә дәрс кечирилди ки, адамлар мәсҹидә ҝетмәсинләр. Бунлар динлә дүшмәнчилик едирләр. Биз индијә кими буна сусмушуг. Мәҝәр бүтүн динләрә мүнасибәт ејни олмалы дејил? Президент дејир һиҹаба гадаға јохдур. Анҹаг ушаглары һиҹабла мәктәбә гојмурлар. Биз нә едәк? Көчәк ҝедәк бу өлкәдән? Сонра да адымызы радикал гојурлар”.
Бизим намусумуза тәҹавүз олунуб
Рузи Исмајылов әлавә едиб ки, Ҝәнҹәнин кечмиш полис рәиси Расим Мусајев диндарлары јығыб “сизин ҹибиниздән наркотик чыхардарам”, - дејирди:
“Сонра һәмин Расим Мусајев өлдү. Диндар гардашлардан бири бу тәгибләрә дөзмәјиб өлкәни тәрк етди. Јени иҹра башчысы Елмар Вәлијев ҝәләндән сонра Ҝәнҹә мүһасирәјә алыныб. Бизим намусумуза тәҹавүз олунуб. Ҝеҹ-тез һагг јерини тапаҹаг. Биз азадыг, елә билмәсинләр зиндандајыг. Шүкүрләр олсун ки, халг бизи террорчу кими танымады. Аллаһ бизи бура атанлары ҹәзаландыраҹаг. 2015-ҹи илдә нојабрын 26-да евдән чыхыб мәсҹидә ҝетдим. Һәмин вахт мәни һәбс етдиләр. Мәни дөјә-дөјә полис идарәсинә апардылар. Орада дөјүб “јазылан изаһатлара гол чәкмәлисән”, - дедиләр. Ҝуја мәндән силаһ тапылыб. Мәни аиләмлә һәдәләдиләр. Шалварымы чыхарыб налајиг һәрәкәт едәҹәкләри илә һәдәләдиләр. Ҝуја силаһы мән туалетдән тапмышам. Бүтүн иттиһамлар јаландыр. Истинтаг тәҹридханасында рәис “әҝәр ишҝәнҹә һаггында кимәсә десән, маддәләр ағырлашдырылаҹаг”, - деди. Мән она инандым”.
Бизим дөвләт чеврилиши һаггында чыхышымыз, фикримиз олмајыб
Рузи Исмајылов Талеһ Бағырзадәни Гумда тәһсил аланда ҝөрдүјүнү дејиб. Ифадәләри тәзјиг алтында вердијини, Иранда тәһсил аландан бәри МТН-нин нәзарәтиндә олдуғуну сөјләјиб:
“Һәмишә чағырыб сорғу-суал едибләр. Тутуландан әввәл рәис мүавини бизи јығыб “Ашурада евдә олун”, - деди. Биз дә елә етдик. Һеч јерә ҝетмәдик. Бизим дөвләт чеврилиши һаггында чыхышымыз, фикримиз олмајыб. МТН әмәкдашлары бизимлә һәмишә сөһбәт едәндә “афәрин сизә - диндар сизин кими олар. Инди нә олду, террорчу олдуг?”.
Рузи Исмајылов чыхышында һәдисәләрдән ситат ҝәтириб, пејғәмбәрин вә онун өвладларынын адыны чәкәндә залда әјләшәнләр салават дејибләр.
Һаким Зејнал Ағајев бу заман 5 дәгигәлик фасилә елан едиб вә иҹласы изләјән шәхсләрин залы тәрк етмәләри барәдә ҝөстәриш вериб.
Фасиләдән сонра һаким Р. Исмајылова ирад билдириб. О, һәр кәсин мәһкәмә залында гајдалара әмәл етмәсинин ваҹиблијини вурғулајыб. Даһа сонра һаким нөвбәти иҹласын мартын 27-дә кечириләҹәјини билдириб вә тәгсирләндирилән шәхсләри Новруз бајрамы мүнасибәти илә тәбрик едиб.
2015-ҹи ил нојабрын 26-да Баш Мүтәшәккил Ҹинајәткарлыгла Мүбаризә Идарәсинин әмәкдашлары Нардаран гәсәбәсиндә кечирдији әмәлијјат нәтиҹәсиндә “Мүсәлман Бирлији” Һәрәкатынын рәһбәри Талеһ Камил оғлу Бағырзадә, Елман Сејдәмир оғлу Ағајев, Зүлфүгар Сәдрәддин оғлу вә диҝәрләри сахланылыб.
Әмәлијјат заманы 2 полис әмәкдашы, 4 гәсәбә сакини һәлак олуб.
Нардаран һадисәләри илә бағлы сахланылан шәхсләрин ҹинајәт иши үзрә истинтаг бир нечә јерә ајрылыб. Талеһ Бағырзадә мәһкәмәнин һөкмү илә 20 ил мүддәтинә азадлыгдан мәһрум едилиб. Онлар истинтаг заманы ишҝәнҹә вә тәзјигә мәруз галдыгларыны дејирләр.
