Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, журналист Гурбан Ҹәбрајыл танынмыш илаһијјатчы, Азәрбајҹан Руһаниләр Мәҹлисинин үзвү, “Маидә” сајтынын тәсисчиси вә баш редактору Сәрдар Һаҹыһәсәнлијә гаршы әсассыз тәзјигләрә мүнасибәт билдирәркән дејиб: “Һаҹы Сәрдарын һәбси вә диҝәр белә репрессив һәрәкәтләрин сәбәби вәзифә сәлаһијјәтләриндән суи-истифадә едән, рәһбәри олдуглары рајонлары ата мүлкү сајараг, халгын, дөвләтин әмлакыны чапыб-талајан “кичик падшаһларын”, саир мәмурларын өз ганунсуз әмәлләрини өрт-басдыр еләмәк ҹәһдләриндән башга бир шеј дејил.”
О, даһа сонр аәлавә едиб: “Амма унудурлар ки, даими хофланма вә чырпынмалардан ирәли ҝәлән белә аддымлар чыхыш јолу олмамагдан әлавә, тамамилә әкс-еффект верир, аидијјаты гурумларын, ән башлыҹасы күтләләрин нәзәр-диггәтини ҝизләтмәјә чалышдыгларынын үзәринә ҹәмләјир, бөјүк иҹтимаи гынагла нәтиҹәләнир. Мәсәлән, гануни сосиал һагларыны тәләб едән сакинләрә, азад фикирли инсанлара - диндарлара, блоҝҝерләрә, журналистләрә јөнәлик зоракылыгларын бөјүк бир һиссәсинин Масаллы рајонунун, ҹәнуб бөлҝәсинин пајына дүшмәси өлкәдә һәр кәсә ајдындыр вә бунун көкләринин арашдырылмасына ҹидди еһтијаҹ вар.”
Гурбан бәј баш верәнләрин Азәрбајҹанын бејнәлхалг имиҹинә мәнфи тәсир ҝөстәрәҹәјиндән нараһатлығыны да дилә ҝәтириб: “Шејх Сәрдар тәкҹә өлкәмиздә јох, реҝионда, мүсәлман аләминдә дә нүфуз саһибидир; Бејнәлхалг Ислам Ојанышы Тәшкилатында ики тәмсилчимиздән биридир. Онун азадлығынын әсассыз шәкилдә мәһдудлашдырылмасы нә өтәнилки мултикултурализм лајиһәләри контекстиндә милли руһанијјәтин мәнафејинә ҹаваб верир, нә дә 2017-нин Ислам Һәмрәјлији или еланы илә бир араја сығышыр...”
Г.Ҹәбрајыл билдириб ки, үмумијјәтлә, ибадәт әһлинин, диндарын Ҹүмә намазында иштиракына ҝөрә тутугланмасы абсурддур: “Мәним Сәрдар Бабајевлә јахындан танышлығым јохдур; садәҹә, бир нечә дәфә мүхтәлиф тәдбирләрдә ҝөрүшмүшүк вә чыхышларыны динләмишәм. Олдугҹа мәнтигли, савадлы, дүнјаҝөрүшлү, пәризкар гардашларымыздандыр, јүксәк натиглик габилијјәтинә маликдир. Рәһбәрлик етдији сајт да дөвләтчилијә, мәнәви-әхлаги дәјәрләрә садигдир; бүтүн саһәләр үзрә информасијалар, тәһлилләр верир, дүнјәвиликлә јанашы, дини тәгвими дә әсас тутур, Ислам маарифчилији, мүгәддәсатын мөвлуду-шәһадәти барәдә мараглы јазыларла чыхыш едирләр. Јәни белә баша дүшүрәм ки, миссионерләрин ат ојнатдығы, аилә институтуна гаршы һүҹумларын реаллашдығы, ҝәнҹләрин зәрәрли вәрдишләрә гуршандығы, интиһарларын баш алыб ҝетдији, ҹәбһәдә азғын ермәни тәхрибатларынын вүсәт алдығы индики шәраитдә Һаҹы Сәрдарын, Һаҹы Мөвсүмүн, Һаҹы Абҝүлүн, Сејид Фәрамизин, Руһуллаһ Ахундзадәнин вә диҝәрләринин зинданларда јох, халг арасында олмалары даһа зәруридир! Аллаһ тезликлә гапыларыны ачсын!”
Хәзәр
Диггәт: Хәбәрдән истифадә етдикдә мәнбәјә истинад лазымдыр
