Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Јанварын 18-дә Бакы Ағыр Ҹинајәтләр Мәһкәмәсиндә "Мүсәлман Бирлији" һәрәкатынын һәбсдә олан сәдри Тале Бағырзадә вә диҝәрләринин мәһкәмәси давам едиб.
Мәлумата ҝөрә, әдаләтсиз һаким Әлөвсәт Аббасовун сәдрлик етдији иҹласда Әли Нуријев сон сөзлә чыхыш едиб. Билдириб ки, гара маскалылар онлара етдикләрини ермәниләрдән өјрәнибләр:
"Истәјирәм мәнә дә өмүрлүк ҹәза верилсин. Әбүлфәзин ағзына араг төкән залымлар һәр чиркин әмәлә гадирди. Рамил Усубов бизә галиб ҝәлә билмәјәҹәк. Әкбәрин мејитинин үзәриндә отурмушдулар. Рамил Усубов вә Закир Гаралов өлүјә зүлм етмәјә гадирди. Һарам јејирләр. Сиз чох истәдиниз бизим сәсимизи кәсәсиниз, лакин һеч нә едә билмәзсиниз. Бурада олмағымла фәхр едирәм. Өләрик сөзләримиздән дөнмәрик. "Бандотдел"дә мәни аиләмлә һәдәләдиләр. Дедиләр "истәјирсән сәнҝәрдә олан гардашыны да ҝәтирәк бура". Сонра әсәб хәстәси олан әмим оғлуну дәлиханаја ҝөндәрмәклә һәдәләдиләр. Бу јолла мәндән ифадә алдылар. Һәмин ифадәни тәсдиг етмирәм".
Һәбсханада һагсыз тутуланлардан јер јохдур
Сөзүнә давам едән Әли Нуријев гијамәт ҝүнү залымларын ҹәзасыны чәкәҹәјини билдириб:
"Киши кишинин гејрәтинә сөз демәз. Бунлар Меһрибан Әлијеваја сөјүш сөјдүләр. Бунунла бағлы ајрыҹа шикајәт дә едәҹәјик. Биз дедик, сиз әһәмијјәт вермәдиниз. Биз Һүсејн, һиҹаб севҝисини әлдән вермәрик. Һәбсхана тикирләр, чүнки һагсыз тутуланлардан түрмәдә јер јохдур".
Әли Нуријев сөзүнүн сонунда она дәстәк олан һәр кәсә тәшәккүр едиб.
Бир тәрәфдә милјонлар, бир тәрәфдә сәфаләт
Даһа сонра иҹласда Шамил Абдуләлијев сон сөзлә чыхыш едиб. О, әввәлҹә дәстәк олан һәр кәсә тәшәккүр едиб. Сонра исә она гаршы ирәли сүрүлән иттиһамларын ҝүлүнҹ олдуғуну сөјләјиб:
"Нә гәдәр рәзилдиләр ки, һаггы дејәнә гаршы белә иттиһамлар сәсләндирирләр. Өзләри дә билир ки, иттиһамлар сахтадыр. Һәмин иттиһамлар өзләринин алнына јапышыр. Мәһкәмә мүстәгил олмадығыны сүбут етди. Вәтәндашлара ишҝәнҹә верирләр ки, һакимијјәтдә раһат отурсунлар. Һакимијјәти итирмәк горхусу бунлары рәзил дурума салыб. Она ҝөрә белә чиркин ишләрә имза атырлар. Инсанларын Талеһ Бағырзадә әтрафында топлашмасы онлары горхутду. Бунлар Фирон тәфәккүрүндә олан адамлардыр. Иншаллаһ һаггын гәләбәсини ҝөрәҹәјик. Һакимијјәтдәкиләр анҹаг өзләрини, аиләләрини дүшүнүрләр. Тәәссүф ки, һакимијјәтдә беләләри јер алыблар вә чох тәһлүкәлидирләр. Бир тәрәфдә Дубајда мүлкләри олан ушаг, диҝәр тәрәфдә өзүнә мәктәб чантасы ала билмәдији үчүн интиһар едән ушаглар. Бир тәрәфдә милјонлар, бир тәрәфдә сәфаләт".
Һакимләри, мәһкәмәнин әдаләтини, Гарабағы гәсб едибләр
Шамил Абдуләлијев бу ҝүн инсанларын бәрабәр ҹәмијјәтдә јашамаг истәјини, јеганә чыхыш јолунун исә һакимијјәтин гаршысында бирликдә дурмаг олдуғуну дејиб:
"Јахасын кәнара чәкән һакимијјәтин зүлмүнә шәрик чыхыр. Бизи ҝүлләләјәндән сонра атыб ҝетдиләр. Бизә ишҝәнҹә вердиләр. Мән ағры чәкирдим о һалда мәндән ифадә алдылар. Һәкимләр ҝүлләләри чыхартмаг истәјәндә полисләр гојмадылар. Биз о горхуну сындырдыг. Биз бу һакимијјәтлә барышмајыб мүбаризә апараҹағыг. Бунлар халгын бүтүн малыны гәсб едибләр. Һакимләри, мәһкәмәнин әдаләтини, Гарабағы гәсб едибләр. Биз үзәримизә дүшән вәзифәни јеринә јетирдијимиз үчүн хошбәхтик. Онлар сусмағымызы истәјирләр. Һакимијјәт пенсијаны, маашы ҹүзи артырыр, дејир, "игтисадијјат инкишаф едиб". Бунлар дүшүнүлмүш шәкилдә едилир. Верәҹәјиниз һөкм бизи нараһат етмир, анҹаг бизим һагг сөзүмүз сизи нараһат едир. Режимә етираз етдијимиз үчүн бурдајыг. Һады Рәҹәбли дејир, мүәллим ҝедиб фәһләлик етсин. Бу инсанлары алчалтмагдыр. Мәктәбдә гызларын ајаг јолундан наркотик истифадәси үчүн васитәләр тапылыб, бу дәһшәтдир. Һакимијјәт бунлары гәсдән едир. Наркотик сатанын евинин јанында отурурлар ки, наркотик аланы тутсунлар. Мүбаризә апармаг белә олмур".
Һаким онун бу сөзләринә ҹаваб олараг билдириб ки, буну һамы билир вә һеч ким тәгдир етмир: "Бундан данышмаг лазым дејил".
Истәјирсиниз Илһам Әлијевин оғлу Һејдәрин наркотик истифадәсиндән данышым?
Шамил Абдуләлијев исә һакимә "сиз истәјирсиниз мән Илһам Әлијевин оғлу Һејдәрин наркотик истифадәсиндән данышым? Бу һагда һеч ким билмир", - дејиб.
Бундан сонра һаким фасилә елан едиб
Ҝүнүн икинҹи јарсында Шамил Абдуләлијевә сон сөзүнү давам етдирмәјә иҹазә верилмәјиб.
Һаким билдириб ки, о, әввәлҹә данышдығына ҝөрә сон сөз демиш һесаб олунур. (!)
"Бандотдел"ин әмәкдашлары халг артистләридир
Даһа сонра Аббас Тағызадә сон сөзлә чыхыш едиб. О, билдириб ки, Нардаранда әзизләрини шәһид едибләр:
"Ханымларымыза әл галдырдылар. Бизә 21 маддә илә иттиһам верибләр. Мәнә имза етдирдиләр, амма нәјә гол чәкдијими демәјибләр. Алдатдылар ки, експерт рәјләридир. Билсәјдим, имзаламаздым. Биз адам өлдүрмәмишик. Террорчу дејилик ки, өз гардашларымыза ҝүллә атаг. Онлар өз полисләрини ҝөзүмүн габағында өзләри вурдулар. Орада чәкилиш дә апарырдылар. Истәсәјдиниз һәмин видеону тәләб едиб бахардыныз вә биләрдиниз нә баш вериб. "Бандотдел"ин әмәкдашлары халг артистләридир. Онлар ҝәлиб артистлик едирдиләр. Намаз вахты ҝириб ҹамааты ҝүлләләдиләр. Кәрбәла мүсибәтини тәкрар етдиләр. Илһам Әлијев дејир: "Дин азаддыр". Намаз үстүндә адмалары ҝүлләләјиб тутурларса, һансы дин азадлығындан данышырлар? Ҝүја Нардаранда абадлыг едибләр. 12 милјона ҝүја асфалт чәкибләр. Нардаранлылар торпаг үстүндә дә ҝәзәр. Иш јери олмајандан сонра асфалт нәјә лазымдыр? Асфалт јејәҹәк ҹамаат? Азәрбајҹанда нәинки дин азадлығы, әдаләт јохдур. Мәним дөвләт чеврилишиндә нә ишим? Мән әдаләтли һаким истәјирәм ".
Өлүм кағызы да рүшвәтлә алыныр
Даһа сонра Әлибала Вәлијевә сон сөз верилиб. О, сон сөзү олмадығыны дејиб. Расим Ҹәбрајылов исә билдириб ки, һеч бир вәсатәт тәмин едилмәјиб:
"Өлкәнин јијәси јохдур. Һеч бир саһәдә саһиби јохдур. Күрдәханыја бир чанта ҝәлир, һамысы төкүлүб диләнчи кими беш манат истәјир. Инсанлара зүлм едирләр. Беләдир бу халгы апарын дәнизә төкүн бирдәфәлик ҹанымыз гуртарсын. Һаггы дедијимизә ҝөрә бу зүлмләр бизә олур. Тарихән дә һаггы дејәнләр әзијјәт чәкиб. Мүәллим јүз әлли манат мааш алыр, һәким диләнчи ҝүнүндәдир. Президент президент олсајды, халг бу ҝүнә галмазды. Ҹәнаб һаким сиз өзүнүз дә тәзјиг алтындасыныз. Рајонларын мәркәзиндә парк, һејкәл, ичәријә он метр ҝедирсән харабалыгды. Сизин елә бизә ҝүҹүнүз чатыр. "Бандотдел" ишчиләринә нәсә дејә билмәдиниз. Чүнки онлардан горхурсунуз. Мәмурлар нә гәдәр гудурублар ки, президентин ханымына сөјүш сөјүрләр. Өлкәдә өлүм кағызы үчүн дә рүшвәт алырлар. Наркотик бу өлкәдә ән бөјүк алверә чеврилиб. Нә гәдәр аилә бу үздән дағылыр. Биз јолумуздан дөнмәјәҹәјик".
Аллаһ шаһиддир ки, биздә силаһ олмајыб
Даһа сонра Закир Мустафајев сон сөзлә чыхыш едиб. О, дәстәк олан шәхсләрә тәшәккүр едиб:
"Ҝүнаһсыз адамлар һәбсә салыныб. Бу иш сијаси репрессија актыдыр. Талеһ Бағырзадәнин чыхышлары һакимијјәти горхутду. Әсас сәбәб Талеһ Бағырзадәнин онлары тәнгид етмәсидир. Биз сүбут етдик ки, нә террорчу, нә радикал дејилик. Дүнјаны јаланчы террор тамашасы илә алдада билмәдиләр. Биз адамларын тәзјигә мәруз галмаларыны истәмирик. Бунлар елә вәһшиҹәсинә һүҹум етдиләр, елә бил ермәниләрдән торпаг алмаға ҝәлмишдиләр. Бурда данышан полисләрин һамысы јалан данышды. Һәмин ҝүн евдә бизим танымадығымыз сималар вар иди. Өз адамларыны әввәлҹәдән јерләшдирмишдиләр ичимизә. Аллаһ шаһиддир ки, биздә силаһ олмајыб. Мәндән тәләб едирдиләр дејим ки, Талеһ , Аббас мәнә силаһ вериб. Буна ҝөрә он ҝүн ишҝәнҹә вердиләр. Тәкҹә мәмур балалары јох, һәр кәсин хошбәхт јашамасыны истәјирик бу өлкәдә. Мәни аиләмлә тәһдид едибләр. Сиздән һеч бир ҝөзләнтимиз јохдур. Мәни Күрдәханыја ҝәтирәндән сонра ҹәримә камерасына салдылар. Сојуг һавада үстү ачыг јердә сахладылар. Мәни дон вурмушду. Нә ҹинајәт етмишик ки, бизимлә белә рәфтар етдиләр?! Бизим ән бөјүк силаһымыз дуамыздыр".
Диггәт: Хәбәрдән истифадә етдикдә мәнбәјә истинад лазымдыр
