Талеһ Бағырзадәнин сон сөзүнүн там мәтни

Әһлибејт (ә) Хәбәр Аҝентлијинин вердији мәлумата ҝөрә-Талеһ Бағырзадә чыхышынын әввәлиндә онлара дәстәк олан һәр кәсә тәшәккүрүнү чатдырыб. Милли Шуранын Координасија Мәркәзинә, шәхсән гурумун сәдри Ҹәмил Һәсәнлијә, АХҸП сәдри Әли Кәримлијә, Елдәниз Гулијевә, Рөвшән Әһмәдлијә, һазырда мүһаҹирәтдә олан һүгуг мүдафиәчиси Лејла Јунуса, Мүсават башганы Ариф Һаҹылыја, Иса Гәмбәрә адбаад миннәтдарлығыны чатдырыб. Билдириб ки, мүсәлман өлкәләри сәфирликләринин мәһкәмәјә нүмајәндә ҝөндәрмәклә онлары мүдафиә едәҹәјини дүшүнүб, амма белә олмајыб – мәһкәмәјә ҝәлән вә дәстәк верән Гәрб сәфирликләри олуб.
“Мән дәфәләрлә шәрләниб һәбс едилмишәм, һамысында да бир-ики маддә верилиб, анҹаг инди 21 маддә илә иттиһам вердикләри үчүн һәр шејдән данышаҹам” дејә Т.Бағырзадә чыхышына давам едиб:
Фуад Гәһрәманлынын һәбси бизим хејримизә олду
Нардаран һадисәси Азәрбајҹанын шәрәфли тарихини јазыб. Гаршы тәрәф үчүн бу ләкәдир, амма бизим үчүн шәрәфдир. Сиз мәним ҹисмими һәбс етмисиниз. Мәнә ишҝәнҹә вериләндә мән мәнәви һәзз алырдым. Аллаһ өзү мәнә илһам верди. Мән һәлә 2013-ҹү илдә һәбс олунанда, Гобустан һәбсханасында Зүмрүд ханымын јазыларыны, Фуад Гәһрәманлынын чыхышларыны охујанда бу аилә илә таныш олмаг истәјирдим. Иш елә ҝәтирди, таныш олдум. Фуад Гәһрәманлы бизә ҝөрә һәбс едилди. Онун һәбсинә, нә гәдәр дүшүнүрүмсә, бир мәнтиг верә билмирәм. Бу Аллаһын ишидир. Фуад Гәһрәманлынын һәбси бизим нә гәдәр хејримизә олду. Аллаһ о аиләни Нардаран һадисәләриндә јардымчы кими ҝөндәриб. Мән өзүмә 32 јашымда өзүмә баҹы тапмышам – Зүмрүд Јағмуру. Мән ҹәсарәтли гадынлара “киши кими гадын” дејилмәсинин әлејһинәјәм. Елә “гадын кими гадын”. Елә гадынларымыз вар ки, кишиләрә дәрс кечәр.
Гулдур һөкумәтлә баш-башајыг
Мән тәк-түк һалларда бәд дуа едәрәм. Прокурор бизә ағыр иш истәди, мәнә өмүрлүк ҹәза верилмәсини тәклиф еләди, амма о ҝәнҹ прокурора да бәд дуа етмәјәҹәм. Чүнки әҝәр әдаләтли систем олсајды, о да әдаләтли чыхыш едәрди. ЈАП-ын јарадыҹыларындан олан Сируз Тәбризли дејирди ки, “ЈАП симасыз гулдурлар партијасыдыр”. Лакин мән дејирәм ки, сималы гулдурлар партијасыдыр. Биз гулдур һөкумәтлә баш-баша ҝәлмишик. Әслиндә, Нардаран һадисәси илә тарих тәкрарланыб. Тутуланда 1937-ҹи ил репрессијасы илә бағлы китаб вердиләр мәнә, охудум, охуја-охуја өзүмү апардым ора. Онда да дөвләт чеврилиши, ишҝәнҹә, һәбсләр вар иди. Анҹаг о вахт халг мүстәгил дејилди, сөзүнү дејә билмирди. Инди исә мүстәгилдир. О мүстәгиллији бизә Әлијевләр вермәјиб. 1988-ҹи илдә халг газаныб.
Һамымыз – диндар, атеист бир олмалыјыг
Нардаран һадисәси Аллаһын лүтфүдүр. Мәндән Әли Кәримлинин әлејһинә ифадә алмаг истәјирдиләр, дедим о инсан сизә нә едиб? Бизим бирлијимиздән горхурлар. Һакимијјәт бизи ҹәзаландырмаг истәди, лакин ҹәзаландыра билмәди. Бу ҝүн халг гујудадыр. Халгы чыхармаг үчүн һамымыз – диндар, атеист бир олмалыјыг. Халгын бу ҝүнә дүшмәсинә сәбәби банклар вә девалвасија дејил, өлкә рәһбәрлијидир, халгын сусгунлуғудур. Халг Аллаһдан горхмур, амма МТН-дән, “бандотдел”дән, бу гулдурлардан горхур. Биз дә Нардаран һадисәси илә халга чатдырдыг ки, горхмаг лазым дејил. Түркијәдә полис шәһид оланда адамлар она шәһид кими бахыр, ону дәфн едир. Чүнки полис онлары горујур. Амма бурада полис инсанлары шәрләјир, ишҝәнҹә верир. Инсанлар горхурлар ки, полис онларын ҹибинә наркотик васитә атар. “Бандотдел”дә 47 ҝүн мәни һамама ҝетмәјә гојмадылар. Мән палтарымы јујуб, јаш ҝејинирдим.
Ермәниләр бу һакимијјәтә ҝөрә севинирләр
Мәмурлар ҝәлир Һејдәр Әлијевин мәзары өнүндә баш әјирләр. Нијә бүтпәрәстлијә шәраит јарадырсыныз? Мән ермәни тәрәфдә галан әсҝәрин мејитинә ҝөрә чох нараһатам. Ермәниләр бу һакимијјәтә ҝөрә севинирләр. Она ҝөрә севинирләр ки, билирләр, бунлар Гарабағы алан дејил. Севинирләр бизә өмүрлүк верилмәсинә, чүнки биз халгла бир олуб Гарабағы ала биләрик. Ҝөрүн биз неҹә һакимијјәтлә гаршы-гаршыјајыг. Һакимијјәт сојғунчулуғу, рүшвәтхорлуғу, оғурлуғу дөвләт сијасәтинә чевириб вә бунунла фәхр едирләр. Бу һакимијјәт 100 фаиз ҝедәҹәк.
Мән һиҹаблы баҹыларымызы мүдафиә едәндә мәнә дедиләр ки, сәнә нә галыб. Дедим баҹыларымызын гејрәти мәним гејрәтимдир. Бунларда анҹаг фәрди марагдыр. Бунлара башгаларыны мүдафиә етмәк тәәҹҹүблү ҝөрүнүр. Азәрбајҹан һакимијјәтиндә милли мараг јохдур, бунлар үчүн анҹаг аилә вә өз марагларыдыр.
Кәрбәла мүсибәти Нардаранда тәкрарланды
Һакимијјәтин телевизијаларында бизә гаршы анти-тәблиғат кампанијасы ҝедән дөврдә Әбүлфәз Бүнјадов евинин гапысыны бизим үзүмүзә ачды. Нардаран гәтлиамында онун аиләси, усаҝы, јашлы анасы да евдә иди. О һадисәләрдә евдәки гадынлара да резин ҝүлләләр вурулмушду, евдәки ушаглар горхудулмушду. 1400 ил әввәл баш вермиш Кәрбәла мүсибәти 2015-ҹи илин нојабрында Нардаранда тәкрарланды. О вахт Језид сујун гаршысыны кәсмишди, бунлар да Нардарана ҝедән јоллары кәсиб, инсанларын ән зәрури еһтијаҹлары үчүн лазым олан гида мәһсулларынын да апарылмасына имкан вермирдиләр. Кәрбәла мүсибәтиндә башлары кәсирдиләр, Нардаран мүсибәтиндә дә шәһид гардашларымызын ҹәсәдләри үзәриндә чәкмә илә ҝәзирдиләр. Ҹәсәдләри дәфн еләмәк үчүн јахынларына вермәдиләр, ҝиров сахладылар.
Әбүлфәз Бүнјадов ағыр ҝүллә јарасы алыб, даһа ҝәзә билмәјәҹәк. Амма дејиб ки, “Аллаһ 38 ил мәним јеримәјими истәјиб, инди истәмирсә, демәк Аллаһын истәји беләдир”. Бу инсанын бөјүклүјүнә бахын…
Һакимијјәт Нардаран һадисәсиндән габаг бизә сечим јери гојмушду ки, ја һакимијјәтлә разылашмалы, ја да ҹәзаланмалы идик. Биз Азәрбајҹан халгынын хилас јолуну демишик. Бир ҝүн халг өз һакимини сечәҹәк. Нијә биз ахы 25 илдир мәнфур, чох аз сајы олан ермәниләрин гаршысында мәғлубуг? Нијә? Нијә бу халг мәғлубдур? Ҹаваб садәдир: Әдаләт јохдур. Бу өлкәдә әдаләт олсајды, биз чохдан Гарабағы да алмышдыг, һәлә тарихи торпагларымызы да. “Әҝәр”лә дејил, алмалыјдыг.
Әҝәр зүлм гаршысында сусаҹагсанса, ибадәтин нә фајдасы?!
Һөкумәтдә әдаләт јохдур. Мән әввәлләр үмид вә ҝүмүн едирдим ки, бу һакимијјәт нә вахтса мәҹбур олуб, ислаһатлар апараҹаг, ислаһ олунаҹаг. Анҹаг “бандотдел”ә дүшәндән сонра фикрими бирмәналы шәкилдә дәјишдим. Бу һакимијјәт ҝүҹ структурларына архаланыр. Она ҝөрә ҝүҹ структурлары, о ҹүмләдән “бандотдел” һакимијјәтин симасыдыр. “Бандотдел”дә елә шејләр ҝөрдүм ки… Анладым ки, бу һакимијјәт ислаһ олунан дејил. Бу һакимијјәт јалныз халгын ганыны ахытмаг үчүндүр. Мән ора ислаһатчы дүшүнҹәсиндә ҝирмишдим, чыханда ингилабчы кими чыхдым. Силаһлы ингилабдан сөһбәт ҝетмир. Демократик, сивил ингилабдан сөһбәт ҝедир. Бу ҝүн халг бу ингилаба һазырлашмалыдыр.
Диндар тәкҹә намаз гылыб, оруҹ тутан дејил. Әҝәр зүлм гаршысында сусаҹагсанса, сәнин белә ибадәтинин нә фајдасы?! Бу һадисәләрдән сонра бәзи достлар горхусундан кәнарлашдылар, амма ҝөзләмәдијимиз јердән бизә дәстәк ҝәлди.
Аллаһым мәни һеч вахт тәк бурахмајыб. Аллаһ дејир мәнә сөјкән, мәнә инан, далыны өзүн ҝөрәссән. Фуад бәјин бурада олмасы Аллаһын ишидир. Чүнки һеч бир мәнтигә сығмыр онун бурада олмасы. Нә гәдәр тәһлил ет, арашдыр, бу адам бура ҝәлмәмәли иди. Илаһи ирадә вар бу ишдә. Ҹәмијјәтин бу ҝүн ојанышынын да сәбәби Аллаһдыр. Аллаһ залымлара ҹәза верәҹәк. Бунлар Језид хисләтлидирләр. Тәсәввүр едиб, Әбүлфәз Бүнјадову ҝүлләләјибләр, һәбс еләјибләр, ишҝәнҹә верибләр, шикәст еләјибләр, амма јенә үрәкләри сојумајыб, синәсинин үстүндә отуруб, диндар адамын ағзына зорла араг төкүбләр. Бу, Азәрбајҹан һакимијјәтинин симасыны ҝөстәрир.
Узун илләрдир бу һакимијјәт демократија имитасијасы илә мәшғулдур. Һакимијјәт дејир ки, өлкәдә сијаси мәһбус јохдур. Бәс кечән мартда әфв сәрәнҹамы илә бурахдыгларын кимләр иди? Неҹә јохдур ки, сән Хәдиҹә Исмајылованы бурахмаға мәҹбур олдун? Бејнәлхалг тәзјигин нәтиҹәсиндә олду һамысы. Бизим бир проблемимиз вар, о да дүзҝүн рәһбәрин олмамасыдыр. Халг лајигли рәһбәрә лајигдир.
Әлијевләр халга гаршы ағыр ҹинајәт төрәдиб
Бизи өлкәнин конститусион гурулушуну дәјишмәкдә ҝүнаһландырырлар. Биз һеч бир һалда дөвләтин конститусион гурулушунун, дүнјәви дөвләтин дәјишмәсини истәмәмишик, истәмирик дә. Биз Конститусијаја, дүнјәви дөвләтчилијә әмәл олунмасыны истәјирик.
Өлкәнин нефтини, сәрвәтләрини талајырсыз, даһа нә истәјирсиз? Бунларын дүшмәнчилији халглады. Шүкүр Аллаһа, халг да артыг дүшмәнини таныјыр. Конститусијанын биринҹи маддәсиндә дејилир ки, һакимијјәтин мәнбәји халгдыр. Амма реаллыгда буна әмәл олунмур. Конститусијанын 6-ҹы маддәсиндә дејилир ки, һакимијјәти мәнимсәмәк ән бөјүк ҹинајәтдир. Әлијевләр һакимијјәти мәнимсәмәклә ағыр ҹинајәт төрәдиб. Биз дә бу ҹинајәтләрә гаршы мүбаризә апарырырг. Лајигли ҹәзаларыны алаҹаглар. Кимин ағлына ҝәләрди ки Елдар Маһмудов, Акиф Човдаров бу вәзијјәтә дүшә биләр? Нардаран һадисәләриндән әввәл – 2015-ҹи ил сентјабрын 22-дә мәни МТН-ә чағырыб диндирән Антитеррор Мәркәзинин рәис мүавини Илгар Әлијев олду. Декабр ајында исә телевизорда ешитдим ки, бу адам Күрдәханы тәҹридханасында өзүнү асыб. Һәлә МТН-дә диндирмәдә она демишдим ки, бу бина да, отурдуғун кресло да халгынды…
Мәнә “бандотдел”дә шәрәфсиз ишҝәнҹә верәндә, һәтта прокурорлуғун мүстәнтиги дөзмәди, деди ки, “даһа буну еләмәјин дә”. Һәмин мүстәнтиг дејирди ки, “Һаҹы, горхурам, бунлар мәни дә тутарлар”.
Илһам Әлијевә мүраҹиәт
Нардаран гәтлиамынын төрәдилмәсиндә әсас ролу ојнајан Рамил Усубовун дүшүнҹә вә әмәлләри һаггында бир нечә мүһүм мәгамы чатдырмаг истәјирәм. Азәрбајҹан ҹәмијјәти бу шәхси атанызын вә сизин рәһбәрлијиниз дөврүндә чох зигзаглы фәалијјәти илә таныјыр. Белә ки, 2005-ҹи илдә онун рәһбәрлик етдији назирликдә јува салмыш погонлу гулдурлар ифша олунанда әсл полис ишчисинә мәхсус гүрурла истефа вериб ҝетмәк әвәзинә, дүнјасыны дәјишмиш вә бу сәбәбдән һәмин вахт өзүнү мүдафиә едә билмәјән атаныз Һејдәр Әлијеви шантаж едәрәк, һансыса ҹинајәткарын онун ҝөстәриши илә азадлыға бурахылдығыны билдирди вә беләҹә, шантажла постунда галмағы баҹарды. Даһа сонра 2015-ҹи илин нојабрында Нардаранда баш вермиш гәтлиамда јенә өзүнү һәр шејдән кәнарда гојмаг мәгсәдилә ҹәмијјәтә сизи нишан верәрәк, мәтбуатда “гәсәбәдә баш вермиш ганлы әмәлијјатын кечирилмәсинә ҝөстәриш президентдән ҝәлиб” ачыгламасыны верди. Һәр шеји баша дүшмәк олар, лакин ҹәнаб Усубовун һәрәкәтләрини анламаг чох чәтиндир. Лап дејәк ки, о ҹинајәткары бурахмаға сизин атаныз ҝөстәриш вериб, лап тутаг ки, Нардаранда о ганлы әмәлијјатын кечирилмәсинә шәхсән сиз ҝөстәриш вермишдиниз, бәс бүтүн бунлары хәбәр вермәкдә Усубовун нијјәти нәдир? Ахы мүдрик аталар дејир ки, кишинин јанында баш кәсәрләр.
Ҹәнаб Әлијев, назириниз Рамил Усубовун һәрәкәтләри бунунла битмир. Белә ки, бизим мәһкәмә просесиндә гондарма ҹинајәт ишинин материалларына әлавә едилмиш “Тале Бағырзадәнин мүраҹиәти” адлы китабчада улу назириниз (ҝәрәк “улу назир” медалы тәсис олуна вә верилә Рамил Усубова) Усубовун сизин вә һакимијјәтинизин һаггында олан үрәк сөзләри өз әксини тапыб. Һәтта һаким Әлөвсәт Аббасов белә, бу мәшһур китабчанын тәдгиг олунмасындан имтина едәрәк, Рамил Усубовун гәзәбинә туш ҝәлмәкдән горхду. Илк олараг, бу китабчанын мәнә аид олмадығыны сизә ачыг дәлилләрлә сүбут етдикдән сонра әсас мәтләбә кечирәм.
Ҹәнаб Әлијев, сиз али тәһсилли, инҝилис дилиндә данышмаг баҹарығына малик шәхссиниз, јәгин бу китабчанын мәнә аид олмамасы илә бағлы ҝәтирдијим дәлилләри анламагда чәтинлик чәкмәјәҹәксиз. Дәлилләр исә бундан ибарәтдир ки, бу мәшһур китабчанын мәтниндә Нардаран һадисәләринә ишарә олунур. Мәлумунуз олсун ки, Нардаран һадисәләри 26 нојабр 2015-ҹи илдә баш вериб. Шүбһәсиз ки, бу китабчаны Нардаран әмәлијјатынын кечирилдији заман кәсијиндә јазмағым гејри-мүмкүндүр. Демәли, бу китабча мән һәбс олунандан сонра јазылыб. Мәним дә Баш Мүтәшәккил Ҹинајәткарлыгла Мүбаризә Идарәсинин тәҹридханасында бу китабчаны һазырламағым гејри-мүмкүн олдуғуна ҝөрә, демәли, бу китабчанын мүәллифи дә мән јох, сизин назириниз Рамил Усубовдур. Нијә Рамил Усубов? Она ҝөрә ки, Нардаран әмәлијјатында бизим гардашларымызы ҝүллә атәшинә тутараг, мәзлумҹасына шәһид едән полис ҹилдиндә гулдурларын ичиндә шәхсән Рамил Усубов јохду. Лакин һадисәдән сонра Усубов телевизија каналлары васитәсилә Нардаранда шәһид едилән гардашларымыза һөрмәтсизлик едәрәк, “беш нәфәри мәһв етдик” ачыгламасыны верди. Буна әсасән, “Һаҹы Тале Бағырзадәнин мүраҹиәти” адлы китабчанын да бирбаша Рамил Усубов тәрәфиндән јазылмасы мәлум олмаса да, онун рәһбәрлик етдији гурумун бу китабчаны тәшкил етмәсинин мәсулијјәти бирбаша Усубовун бојнундадыр. Бу сәбәбдән дә һәмин китабчанын мүәллифинин Рамил Усубов олдуғуну гејд едирәм.
Инди исә кечәк назиринизин бу китабчада мәним адымдан истифадә едәрәк, сизин вә һакимијјәтинизин һаггында јаздығы үрәк сөзләринә. Китабчада сизин һаггынызда “оғру Илһам Әлијев”, һакимијјәтиниз һаггында да “фаһишәлијин тәрәннүмү олан һакимијјәт” ифадәси ишләдилир.
Бундан әлавә, мәһкәмә просеси заманы верилән ифадәләрә әсасән, ханымыныз Меһрибан Әлијеванын јүксәк чинли полис мәмурлары тәрәфиндән ағыр формада тәһгир олунмасы һагда чох ҹидди мәлуматлар ачыгланды. (Бир шеји дејим ки, түрмәдәки дустагларын чохунун үмид јери Һејдәр Әлијев Фондудур. Дүздүр, бизим үчүн о үмид јери дејил, ора коррупсија үнваныдыр. Бунлар о мәктублара Меһрибан Әлијеваны сөјмәклә ҹаваб верирләр) Јадыныза салым ки, 2013-ҹү илин март ајынын 31-дә Рамил Усубовун шәр машыны мәни шәрләјәрәк, ҹибимә наркотик васитә атыб һәбс едәндә ҝөркәмли сәнәткар Зејнәб Ханларованын адындан истифадә етмәк истәдиләр. Анҹаг һәмин вахтлар милләт вәкили Зејнәб ханым ҹәсарәтлә “кими тутмаг истәјирсизсә, киши кими өз адыныздан тутун, мәним адымы бу ишә гатмајын” – деди. Зејнәб ханымын бу ҹәсарәти мүгабилиндә сизин иҹтимаи-сијаси мәсәләләр үзрә көмәкчиниз, “Нардаран әмәлијјаты”нын әсас ссенаристләриндән бири олан Әли Һәсәнов Зејнәб ханымы јеткин сијасәтчи олмамагда иттиһам етмишди. Јәгин Әли Һәсәновун нәзәриндә јеткин сијасәтчи үчүн критеријаларда “үзә дурмаг” әсас шәртләрдән һесаб олунур. Мән дә өз нөвбәмдә Зејнәб ханымын ҹәсарәтли мөвгејиндән чыхыш едәрәк, Рамил Усубов вә командасына дејирәм ки, мәним адымдан истифадә едиб Илһам Әлијев вә онун ханымы Меһрибан Әлијеваја үрәк сөзләринизи демәјин. Кишилијиниз чатырса, өз адыныздан о сөзләри дејин.
Ҹәнаб Әлијев, јәгин ки, сизә мәним һаггымда мүхтәлиф мәлуматлар верилиб. Лакин истәрдим кимлијим һаггында сизә өзүм мәлумат верим ки, киминлә гаршы-гаршыја ҝәлдијинизин фәргинә варасыныз. Мән јеткинлик јашына чатдыгдан, өзүмү гисмән дәрк етдикдән сонра Имам Һүсејнлә таныш олдум. О бөјүк ингилабчы шәхсијјәтин мәһәббәти гәлбими аловландырды, али мәгсәд вә мәрамымы, әгидәми, дүшүнҹәләрими мөһкәмләндирди. Һәзрәти Һүсејн бизә Аллаһы халисанә севмәји, Она тәслим олмағы, Онун јолунда ҹанындан, малындан, бир сөзлә, һәр шејиндән кечмәји, зүлмлә, залымларла барышмамаг, гәтијјәтлә мүбаризә апармағы ешг јолу илә өјрәтди. Аллаһ нәсиб етди, мүгәддәс Кәрбәла зијарәтинә ҝедәрәк, көнүлләрин султаны Һәзрәти Һүсејнлә сон нәфәсимизә гәдәр бу мүбарәк јолда сабитгәдәм олаҹағымыза анд ичәрәк, сәдагәт әһд-пејманы бағладыг. Уҹа Аллаһдан о бөјүк шәхсијјәтин еһтирамына хатир шәһадәтин нәсибимиз олмасыны тәмәнна етдик. Һәзрәти Һүсејн мәктәби һәјатымызын мәнасына чеврилди.
Ҹәнаб Әлијев! Сизин вә һакимијјәтинизин илләрди Талеһ Бағырзадәјә гаршы зүлм вә һагсызлыгларынын әсас сәбәби Талеһ Бағырзадәнин шәхсиндән горхмағынызда дејил. Һакимијјәтинизи горхудан вә сарсыдан Талеһ Бағырзадәнин гәлбиндә дашыдығы нәҹиб Имам Һүсејн севҝиси вә Һүсејни дүшүнҹәләриди. Әслиндә, һаггыныз да вар горхасыныз. Чүнки 1400 илдир бу әзәмәтли Һүсејни дүшүнҹә – “Өлүмү сәадәт, залымларла јашамағы зилләт сајырам” пычылтысы залым һакимләрин јухуларыны әршә чәкиб, һәјатларыны кабуса чевириб. Сизи әмин едирәм ки, Нардаран фаҹиәсини төрәтмәклә, ҝүнаһсыз инсанларын ганыны ахытмагла өз һакимијјәтинизин сонуну јахынлашдырдыныз. Әҝәр бир һакимијјәт јерсиз ҝүҹ нүмајиш етдирәрсә, һәмин ҝүч онун мәһвинә сәбәб олаҹагдыр.
Сонда сиздән тәләб едирәм ки, әҝәр ҹәсарәтиниз варса, мәнә вериләҹәк өмүрлүк һәбс ҹәзасыны башга бир ҹәза нөвү илә әвәз етмәјәсиниз.
Биз бу шәрәфли халгын азадлығы уғрунда, ҝәләҹәк хошбәхтлији наминә нәинки өмүрлүк һәбс ҹәзасы алмаға, һәтта едам олунмаға, тонгалда дири-дири јандырылмаға һазырыг. Гој Аллаһ бизим вә сизин аранызда Һаким олсун.
Биз мәзлумун сәсијик…
Биз һазырыг дүнја мәһкәмәләриндә һагга вә әдаләтә ҝөрә мүһакимә олунаг, амма гијамәтдә – һәгиги мәһкәмәдә мүттәһим гисминдә олмајаг. Азәрбајҹан һакимијјәти билсин, биз Нардаранда шәһид олан гардашларымыын бәдәниндән ахан ганыг, мәзлумун сәсијик, ананы баладан ајырыб, һәсрәт ки јашадыб, биз о һәсрәтик, өвладыны Гарабағда шәһид вериб, илләрди “Гарабағы алырыг” јаланлары илә алдадылан аналарын ҝөз јашыјыг.
Сонда даһи шаиримиз Мәһәммәдһүсејн Шәһријарын фикирләриндән ситат ҝәтирмәк истәјирәм:
Ја рәбб, нәдир бир бу гәдәр үрәкләри ган етмәјин?
Голу бағлы галаҹагдыр һачағаҹан, Азәрбајҹан?
Өвладларын һачағадәк јад елләрдә долашаҹаг,
Әл-әлә вер, үсјан елә, ојан, ојан Азәрбајҹан!
Бәсдир ајрылыг одундан күл әләнди башымыза,
Дур ајаға, ја азад ол, ја тамам јан, Азәрбајҹан!