Әһлибејт(ә) Хәбәр Аҝентлијинин вердији мәлумата ҝөрә-Сон вахтлар мүхтәлиф васитәләрлә Азәрбајҹан-Ермәнистан дөвләт сәрһәдиндә вәзијјәти ҝәрҝинләшдирмәк мәгсәди ҝүдән Ермәнистан бу дәфә даһа бир тәхрибата әл атыб. Ермәниләр тәрәфиндән кустар үсулла һазырланан партлајыҹы гурғу јанварын 12-дә дөвләт сәрһәдинин Товуз рајону саһәсиндә, гошунларын гаршыдурма хәттинә јахын әразијә ПУА васитәсилә атылыб.
Бу ҹүр мәншәји вә мәнсубијјәти мәлум олмајан гејри-әнәнәви үсулла һазырланан партлајыҹы васитәләрин дүшмән тәрәфиндән тәтбиги мүдафиәнин өн хәттиндә јерләшән бөлмәләримизин шәхси һејәтинә, хүсусилә дә һәмсәрһәд әразиләрдәки јашајыш мәнтәгәләринин динҹ әһалисинә хәсарәт јетирмәк мәгсәдини ҝүдүр.
Партлајыҹы гурғунун зәрәрсизләшдирилдикдән сонра илкин өјрәнилмәси заманы бу васитәнин електрик детонатору, детонасија гајтаны, чохлу сајда метал гәлпәләр вә гурғунун ишә салынмасы үчүн батарејалардан ибарәт олдуғу мүәјјән едилиб. Бејнәлхалг норматив һүгуги гајдаларла истифадәси гадаған олунан бу ҹүр васитәләрин Ермәнистан тәрәфиндән, хүсусилә Азәрбајҹан-Ермәнистан дөвләт сәрһәдиндә мәгсәдјөнлү шәкилдә тәтбиги вәзијјәти ҝәрҝинләшдирмәк, Азәрбајҹаны ҹаваб тәдбирләри ҝөрмәјә тәһрик етмәк вә бунунла да тәмсил олундуғу һәрби-сијаси блокун диҝәр үзвләринин диггәтини нөвбәти дәфә ҹидд-ҹәһдлә мүнагишәјә ҹәлб етмәк мәгсәдини ҝүдүр. Мүдафиә Назирлији билдирир ки, баш верә биләҹәк һәр һансы инсидентә вә онун нәтиҹәләринә ҝөрә мәсулијјәт тамамилә Ермәнистанын криминал һәрби-сијаси режиминин үзәринә дүшүр.
Диггәт! Хәбәрдән истифадә етдикдә мәнбәјә истинад лазымдыр!
