Әһлибејт(ә) Хәбәр Аҝентлијинин вердији мәлумата ҝөрә-Тәјјарә Москвадан Сочијә ҝәлиб, ордан да Суријаја – Һимејмимдәки Русија һәрби базасына учмалы имиш. Лакин һаваја галхандан аз сонра Адлер гәсәбәси јахынлығында радардан итиб. Русија Мүдафиә Назирлији ачыглама вериб ки, тәјјарә Сочи саһилләриндән 6 километр узаглыгда Гара Дәнизә дүшүб. Назирликдән билдирилиб ки, тәјјарәдәкиләрин киминсә сағ галдығы ҝөзләнилмир.
Гәзаја тәјјарәдә јаранмыш техники проблемин сәбәб олдуғу ҝүман едилир. Русија КИВ јазыр ки, тәјјарә 1983-ҹү илдән истисмарда олуб. Учуш үзрә мүтәххәсисләр ҝүман едир ки, тәјјарә јүксәклијә сүрәт јығаркән идарәетмәдә критик насазлыг јараныб.
Бунунла белә, бәзи експертләр вә пешәкар тәјјарәчиләр террор еһтималыны да истисна етмир. Лакин Русија рәсмиләри террор версијасыны рәдд едир.
Тәјјарәнин ҝөјәртәсиндә Русија һәрби оркестринин – мәшһур Гызыл Орду Хорунун 64 үзвү, 9 журналист, 8 әсҝәр, 1 иҹтимаи тәшкилат нмајәндәси, 2 нәфәр исә назирлик рәсмиси олуб. Журналистләр “1-ҹи канал”, НТВ вә “Звезда” телеканалларындан олублар.
Тәјјарәнин 110 метр дәринлијә батдығы билдирилир.
Ахтарыш-хиласетмә ишләринә 6 ҝәми, 63 далғыҹ вә һеликоптер ҹәлб олунуб.
Русија президенти Владимир Путин гәзаны арашдырмаг үчүн нәглијјат назиринин рәһбәрлији алтында һөкумәт комиссијасы јарадыб.
Диггәт! Хәбәрдән истифадә етдикдә мәнбәјә истинад лазымдыр!
