''Нардаран иши''ндә тәгсирләндириләнләр вәкилләриндән имтина едиб

Әһлибејт (ә) Хәбәр Аҝентлијинин вердији мәлумата ҝөрә-Декабрын 2-дә Бакы Ағыр Ҹинајәтләр Мәһкәмәсиндә "Мүсәлман Бирлији" һәрәкатынын, шәрләнәрәк һәбс олунан, сәдри Талеһ Бағырзадә, АХҸП сәдринин мүавини Фуад Гәһрәманлы вә диҝәрләринин мәһкәмәси олуб. 
Һаким Әлөвсәт Аббасовун сәдрлик етдији иҹласда тәгсирләндирилән шәхсләр иштирак етмәјиб. Вәкил Немәт Кәримли онларын иҹласдан нә вахта гәдәр тәҹрид олунаҹагларыны суал едиб. Һаким “нә вахт мәһкәмә гәрар версә, онда тәгсирләндирилән шәхсләр иҹласа ҝәтириләҹәкләр”, - ҹавабыны вериб. 
Вәкил Немәт Кәримли мүвәккили Аббас Һүсејновла ҝөрүшүб, мәсләһәтләшмәк истәдијини билдириб. Һаким тәҹридханада вә мәһкәмәдә ҝөрүшә биләҹәкләрини сөјләјиб. 
“Елә бил башымызын үстүндәки “Демокл гылынҹы”дыр” 
Вәкил Јалчын Иманов исә билдириб ки, тәгсирләндирилән шәхсләр вәкилләриндән онларын иштиракы олмадан һеч бир просесдә иштирак етмәмәји тәләб едирләр: 
"Һәр дәфә вәкилләрдән коллеҝијаја шикајәт едирсиниз. Сиз адиҹә саһә мүвәккилинә ирад билдирмир, она тәсир едә билмирсиниз, амма вәкилләри тәсир алтында сахламаға чалышырсыныз. Елә бил башымызын үстүндә “Демокл гылынҹы”дыр. Мән һәр дәфә иҹласларда иштирак етмишәм. Бу ҝүн ики дәгигә ҝеҹикән кими шикајәт етмисиниз. Саһә мүвәккили һәмкарымы тәһгир едир, анҹаг сиз һеч нә демирсиниз. Биздән исә асанлыгла шикајәт едирсиниз”. 
“Һеч вахт сизин ҹәзаландырылмаг мәсәләниз гојулмајыб” 
Һаким вәкилин бу чыхышына ҹаваб олараг саһә мүвәккилинин она табе олмадығыны дејиб: 
“О һадисә вәкилә ҝөрә олду. Биринҹи вәкил башлады, сонра тәрәфләр бир-бирләрини иттиһам етдиләр. Мәним һәрәкәтләримдән шикајәт етмәк һүгугунуз вар. Лакин мән сиздән шикајәт етмәмишәм. Һәр дәфә просесин вахтын елан едирик. Сиз ҝеҹикәндә коллеҝијаја јазырыг ки, вәкилләрин иштиракы тәмин едилсин. Һеч вахт сизин ҹәзаландырылмаг мәсәләниз гојулмајыб". 
“Мәһкәмә иши објектив арашдырмаг истәмир” 
Даһа сонра һаким билдириб ки, шаһидләрдән Ниҹат Һүсејнов, Мөвсүм Фејзуллајев, Замин Мәликов, Замин Бүнјатов, өлән полисләрин нүмајәндәләри Имран Нәсибов, Әлизамин Тағыјев телеграм вурараг иҹласда иштирак етмәк истәмәдикләрини дејибләр. Һаким билдириб ки, буна ҝөрә дә мәһкәмә онларын диндирилмәләринә еһтијаҹ олмадығы барәдә гәрар гәбул едиб. 
Вәкил Јалчын Иманов билдириб ки, мәһкәмә иши објектив арашдырмаг истәмир: "Онлар ҝәлиб ифадә вермәлидирләр. Билирик ки, шаһидләрә тәзјиг олур". 
Һаким ҹаваб олараг онларда белә мәлуматын олмадығыны сөјләјиб вә вәкилләр тәрәфиндән верилән вәсатәтләри елан едиб. Билдириб ки, вәкилләр Рамил Усубов, Ҹаһанҝир Һаҹыјев вә Кәрим Әлимәрдановун мәһкәмәјә чағрылмалары барәдә вәсатәт верибләр. Даһа сонра иҹласда вәкилләрлә тәгсирләндирилән шәхсләрин мәсләһәтләшмәләри үчүн фасилә елан едилиб. 
Фасиләдән сонра тәгсирләндирилән шәхсләрин вәкилләриндән имтина етдикләри мәлум олуб. 
Просес декабрын 12-дә давам едәҹәк. 
Диггәт! Хәбәрдән истифадә етдикдә мәнбәјә истинад лазымдыр!