Әһлибејт (ә) Хәбәр Аҝентлијинин вердији мәлумата ҝөрә-Нојабрын 30-да Бакы Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын һәбсдә олан сәдри Талеһ Бағырзадә, АХҸП сәдринин мүавини Фуад Гәһрәманлы вә диҝәрләринин мәһкәмәси кечирилиб.
Шүшә гәфәсдә аракәсмә бәркидилиб
Һаким Әлөвсәт Аббасовун сәдрлик етдији иҹласда тәгсирләндирилән Ҹаббар Ҹаббаров чыхыш едәрәк һакимә дејиб ки, мәһкумларын салындығы шүшә гәфәсдә аракәсмәләрин арасынын ҝенишләндирилмәси һаггында вердији сөзә әмәл етмәјиб: "Сиз демишдиниз ки, аракәсмәләр ҝенишләндириләҹәк, лакин буну етмәдиниз". Һаким дејиб ки, усталар ҝәлиб баҹардыглары гәдәр шүшәләри аралајыблар. Ҹ.Ҹаббаров исә билдириб ки, усталар шүшәләри садәҹә бәркидибләр: "Биз шүшәләри өзүмүз араламышдыг". Һаким бундан башга нәсә едә билмәјәҹәјини дејиб: "Башга залларда һеч аракәсмәләр јохдур. Бурада һавасызлыг олдуғу үчүн аракәсмә гојублар".
Мәһкәмәјә ҝәләни һәбс едирләр
Аббас Һүсејнов исә онларын һүгугларынын позулдуғуну дејиб. Ф. Гәһрәманлы исә билдириб ки, иҹласа ҝәлән шәхсләрин шәхсијјәт вәсигәләри јохланылдыгдан сонра саһибләринә гајтарылмыр, бу да проблемләр јарадыр: "Биз вәсатәт дә галдырдыг ки, јохламадан сонра шәхсијјәт вәсигәләри гајтарылсын. Лакин буна әмәл едилмәди. Таҹәддин адлы шәхс Ҝөјчајдан иҹласа ҝәлмишди. Она 30 сутка һәбс ҹәзасы верилиб. Бу просесдән чыхандан сонра онун һәдәләмишдиләр. Олмаз ахы белә. Бәјәм бура аҝентура шәбәкәсидир? Шәхсијјәт вәсигәләрини јығыб мәлуматлары полисләрә өтүрүрләр. Ҝөстәриш верин, белә етмәсинләр".
Вәсатәтләр тәмин олунмады
Даһа сонра вәкил Јалчын Иманов 42-ҹи Полис Бөлмәсинин рәиси Тәрхан Әһмәдов, Баш Мүтәшәккил Ҹинајәткарлыгла Мүбаризә Идарәсинин мүстәнтигләри – Исмајыл Әлијев вә Фикрәт Гулијевин мәһкәмәјә чағырылмалары барәдә јазылы вәсатәт вериб. Мәһкәмә вәсатәти тәмин етмәјиб.
Талеһ Бағырзадә исә иш үзрә олан 8 нәфәр һал шаһидинин диндирилмәсини истәјиб. Билдириб ки, әсас шаһидләр һал шаһидләри олуб: "Мән 21 маддә илә иттиһам олунурам. Бу, мәним дөрдүнҹү мүһакимәмдир. Онлар әлавә шаһид кими ҝәлиб диндирилсинләр".
Һаким буну да тәмин етмәјиб.
Вәкил Јалчын Иманов исә һадисәләр заманы өлән полис әмәкдашларынын һүгуги нүмајәндәләринин мәһкәмәдә ифадә вермәләрини истәјиб. Һаким дејиб ки, онлар мәһкәмәјә телеграм ҝөндәрәрәк иштирак етмәк истәмәдикләрини билдирибләр.
Иҹласда чыхыш едән Аббас Һүсејнов дејиб ки, тәҹридханада онларын јалныз "АТВ" каналына бахмаг имканлары вар. Бундан әлавә, "АТВ+" гошмаг үчүн пул тәләб олунур. Һаким исә бунун мәһкәмәјә адијјатынын олмадығыны дејиб.
Мәһбуслар залдан чыхарылыб
Даһа сонра иҹласда Сабунчу рајон Полис Идарәсинин әмәлијјат мүвәккили Самир Һәшимов шаһид гисминдә ифадә вериб. О, 2015-ҹи ил нојабрын 5-дә Сабунчу рајон Полис Идарәсинин гаршысында баш верән һадисәләр һаггында данышыб. Билдириб ки, һәмин вахт идарәдә олуб вә сәс-күј ешидиб бајыра чыхыб: "Топлашанлара дедим ки, һај-күј салмасынлар. Онлар да даш атдылар. Полисләрдән биринә дәјди".
Даһа сонра вәкилләрин суалларына ҹаваб верән шаһид анҹаг "хатырламырам" дејиб. Бу заман Немәт Кәримли ондан јаддаш позғунлуғунун олуб-олмамасыны сорушуб. Бу исә шаһидлә вәкил арасында мүбаһисәјә сәбәб олуб. Бундан сонра мүбаһисәјә Т. Бағыров, А. Һүсејнов вә Ҹ. Ҹаббаров да гошулараг вәкиллә кобуд данышмамасыны шаһиддән тәләб едибләр. Буна ҝөрә һаким һәр үч тәгсирләндирилән шәхсин мүвәггәти олараг залдан чыхарылмалары барәдә гәрар гәбул едиб. Т. Бағырзадә исә дејиб ки, әҝәр залдан чыхарылсалар, тәҹридханаја ҝедәҹәкләр вә јенидән зала гајытмајаҹаглар. Бундан сонра фасилә елан едилиб.
Вәкилә хәбәрдарлыг едилиб
Фасилә заманы бүтүн тәгсирләндирилән шәхсләр залдан чыхарылыб. Фасиләдән сонра исә һаким тәгсирләндирилән шәхсләрин һеч биринин залда олмадыгларыны ҝөрүб вә үч нәфәрдән башга диҝәр тәгсирләндириләнләрин зала ҝәтирилмәләрини истәјиб. Һаким Немәт Кәримлијә исә хәбәрдарлыг едәрәк билдириб ки, шаһидлә кобуд данышыб, галмагал јаратмаг олмаз. Н.Кәримли исә шаһид "хатырламырам" ҹавабы вердији үчүн о ҹүр суал вердијини дејиб.
Һакимә мәлумат верилиб ки, тәгсирләндирилән шәхсләрин һеч бири исә зала ҝәлмәк истәмирләр. Һаким исә онларын иштиракы олмадан иҹласын кечирилмәси һаггында гәрар гәбул едиб. Бу исә залда олан шәхсләрин наразылығына сәбәб олуб. Онлар залы тәрк едибләр. Һаким вәкилләрдән шаһидә суаллар вермәләрини истәјиб. Вәкилләр исә тәгсирләндирилән шәхсләрин иштиракы олмадан иҹласын кечирилмәсинә етираз едибләр.
Просес декабрын 2-дә давам едәҹәк.
Диггәт! Хәбәрдән истифадә етдикдә мәнбәјә истинад лазымдыр!
