Әһлибејт(ә) Хәбәр Аҝентлији-Маһир Рзајев чиркаб суларын әһатәсиндә аиләсинә балаҹа бир "ада" јарадыб. О, Гарабағ ветераныдыр. 9 нәфәрлик аиләси илә Сумгајыт гәбиристанлығынын алтында салдығы бу вагонда јашамаға мәһкумдур. Чүнки ҝедәҹәк башга бир јерләри јохдур. Кирајәләрдә, онун-бунун евиндә јашајандан сонра, сујун үстүнә торпаг төкүб, бу вагону дүзәлдиб.
"Бу вахтаҹан бу зүлмлә мән ушаглары бөјүтмүшәм. Һансы ки, Азәрбајҹанда бу ушаглар, мәмурларын ушагларындан даһа јахшы јашамалыдырлар. О јохдур. Бу өвладларым ҝүн ҝөрмәјибләр. Јарыаҹ, јарытох зүлм ичиндә бөјүјүбләр. Һансы мәмур евиндә ҝөрүб ки, ана газанын ичинә су гојуб, јемәк бираздан бишәҹәк дејиб, ушаглары јатыздырыб? О ҝүнү ҝөрмүшүк биз."
Маһир Рзајев 1992-ҹи илдән 1996-ҹи илә гәдәр Фүзули-Ағдәрә бөлҝәсиндә ҝедән дөјүшләрдә иштирак едиб. Гарабағ ветераны дејир ки, Ағдәрәнин човғуну ҝүҹ-гүввәсини алыб апарыб. Индијә кими нә өзү, нә дә өвладлары һәким мүајинәсиндән кечмәјибләр. О, ҝүнә 5 манат олмагла машын иҹарәјә ҝөтүрүб, зибилханадан дәмир, пласмас габлар јығмагла аиләсини доландырмаға чалышыр. Анҹаг ҝүҹү јетмир 6 ушағын еһтијаҹларыны гаршыламаға.
"Мәним ушагларым бу јашаҹан мәктәб үзү ҝөрмәјиб. Мәктәбә ҝедәнләрин архасынҹа бахыб ағлајыблар. Амма һаггымызы јејәнләрин - ганичәнләрин ушаглары хариҹдә ән ҝүҹлү тәһсил алырлар. Мән дејәрдим ки, вагонда јашамағы Аллаһ мәмурлара гисмәт еләсин"
Гарабағ ветераны мүраҹиәт етдији бүтүн гурумлардан кор-пешман гајыдыб. Гејдијјатда олдуғу Лачын рајонунун депутаты Маһир Аббасзадәни илә Милли Мәҹлисдә тапмадығыны дејир. Јалныз 2011-ҹи илдә Сумгајыт Шәһәр Иҹра Һакимијјәтинин биринҹи мүавини Таријел Һаҹыјев она сәнәдсиз торпаг саһәси вериб. Маһир Рзајев вагону гуру торпаға апармаг истәјирмиш ки, торпағын зәбт олундуғуну ҝөрүб.
Гачгынларын вә Мәҹбури Көчкүнләрин ишләри үзрә Дөвләт Комитәсиндән Мејдан ТВ-јә билдирилиб ки, јахын заманларда Гарабағ ветеранларынын көчүрүлмәси үчүн тәдбир нәзәрдә тутулмајыб.
Сумгајыт Шәһәр Иҹра Һакимијјәтиндән суалларымыза ҹаваб верән тапылмады.
Өмүр боју чәтинликлә јашајан Маһир Рзајев исә "өлсәк дә Вәтән үчүн, галсаг да" - дејир. О, елә бу ил апрелдә баш верән дөјүшләр заманы да ҹәбһәјә үз тутуб.
