Әһли Бејт - АБНА – Хәбәр Аҝентлијинин вердији хәбәрә әсасән, Һиҹри-гәмәри тәгвими илә зилгәдә ајынын 10-ну 11-нә кечән ҝеҹә, Аллаһ Тәаланын јер үзәриндә тәјин етдији Хәлифәси, Ислам Үммәтинин сәккизинҹи Имамы, һәзрәт Әбул-Һәсән Әли ибн Муса Рзанын (әлејһи сәлам) тәвәллүд ҝеҹәсидир.
Имам Рза (әлејһи сәлам) һәзрәтләри Мәдинә шәһәриндә, Илаһи вәһј ханәданында дүнјаја ҝөз ачыб. Дәјәрли Атасы једдинҹи Имам Мусаји Казымдыр (әлејһи сәлам). Анасынын мүбарәк ады Үмму-Бәнин, диҝәр ады исә Нәҹма олуб.
Имам Рза (ә) һиҹри-гәмәри тәгвими илә 203-ҹи илдә 55 јашында икән Аббаси хәлифәси Мәмун тәрәфиндән зәһәрләниб. Имама гаршы суи-гәсд онун Хорасана дәвәт едилмәси вә вәлиәһдлијин она һәвалә едилмәсиндән сонра һәјата кечирилиб.
Тарихшүнасларын мәлуматына ҝөрә, имам Рза(ә) Хорасанда оларкән хәлифә Мәмун тәрәфиндән мәҹбур едилир вә тәзјигләрә мәруз галыр. Бунунла белә, имам Мәмунун јашадығы дөврдә һөкумәт ишләри вә сијасәтә гарышмајаҹағыны билдирир.
Шәһид едилән имам Тус (Мәшһәд) шәһәриндә дәфн едилир.
Инди имамын шәһид едилмәсиндән 1200 ил кечмәсинә бахмајараг, һәр ҝүн онун мәзары вә мәгбәрәсинин зијарәтинә сајсыз-һесабсыз зәввар ҝедир.
Имам Рзанын (әлејһи сәлам) инҹи долу кәламларындан
Имам Рза (әлејһи сәлам) бујуруб: Әмин (әманәтдар шәхс) һеч вахт сәнә хәјанәт етмәз! Садәҹә хаин шәхси әмин ҝүман етмишдин. (Туһәфул Угул, сәһ 466)
Имам Рза (әлејһи сәлам) бујуруб: Бөјүк гардашын атан јериндәдир! (Туһәфул Угул, сәһ 466)
Имам Рза (әлејһи сәлам) бујуруб: Инсанларла достлуг етмәк ағлын јарысыдыр! (Туһәфул Угул, сәһ 467)
Имам Рза (әлејһи сәлам) бујуруб: Һәгигәтән Аллаһ Тәала сәскүјлүјү, малы тәләф етмәји, аҹҝөзлүк вә дүнја малыны чох истәмәклији севмир! (Туһәфул Угул, сәһ 467)
Имам Рза (әлејһи сәлам) бујуруб: Иман бир дәрәҹә Исламдан үстүндүр, тәгва исә имандан бир дәрәҹә үстүндүр. Адәм өвладына исә јәгиндән үстүн бир шеј верилмәмишдир. (Туһәфул Угул, сәһ 469)
Имам Рза (әлејһи сәлам) даим сәһабәләринә бујурарды: Пејғәмбәрләин силаһындан истифадә еди! Имамдан сорушдулар: Пејғәмбәрләрин силаһы нә иди? Имам ҹаваб верди: (Аллаһа) Дуа етмәк! (Усул Кафи, ҹилд 4. сәһ 214)
Имам Рза (әлејһи сәлам) бујуруб: Инсанлара елә бир заман ҝәләҹәк ки, афијәт вә тәһлүкәдән аманда галмаг 10 ҹүз олаҹаг. Онун 9 ҹүзү инсанлардан узаг галмагдыр, бир ҹүзү исә сүкут едиб данышмамагдыр! (Туһәфул Угул, сәһ 470)
Имам Рза (әлејһи сәлам) бујуруб: Хәсис инсанын асајиши олмаз! Пахыл вә һәсәд чәкән инсанын һәјатынын ширинлији олмаз! Јаланчы инсанын исә мүрүввәт вә мәрдлији олмаз! (Туһәфул Угул, сәһ 473)
Имам Рза (әлејһи сәлам) бујуруб: Ваҹиб әмәлләри јеринә јетирдикдән сонар Аллаһ Тәала јанында мөмүн шәхси хошһал етмәкдән бөјүк иш јохдур! (Биһарул Әнвар, ҹилд 78. сәһ 347)
Имам Рза (әлејһи сәлам) бујуруб: Варлы вә касыб (фәгир) олдуғунуз заман вә јахшылыг етдијиниз заман истәр аз истәрсә дә чох (фәрг етмәз) чалышын ҹызығыныздан чыхмајын! Чүнки Аллаһ Тәала Гијамәт ҝүнү бир хурма дәнәсинин јарысыны о гәдәр бөјүдәҹәк ки, Үһүд дағы бојда олаҹаг! (Биһарул Әнвар, ҹилд 78. сәһ 346)
Имам Рза (әлејһи сәлам) бујуруб: Бир биринизин ҝөрүшүнә ҝедин ки, достлуғунуз мөһкәмләнсин! Бир биринизин әлини (ҝөрүшәркән) сыхын вә бир-биринизә гәзәбләнмәјин! (Биһарул Әнвар, ҹилд 78. сәһ 347)
Өзүнүзүн дүнја вә дини ишләриниздә сирринизи ҝизли сахлајын! Һәдисләрдә ҝәлиб ки, сирри ачмаг “күфүрдүр”! Вә һәдисләрдә ҝәлиб ки, сирри ачан шәхс гатил илә шәрикдир! Һәдисләрдә ҝәлиб ки, дүшмәниндән ҝизли сахладығыны достундан да ҝизли сахла! (Биһарул Әнвар, ҹилд 78. сәһ 347)
Диггәт: Хәбәрдән истифадә етдикдә мәнбәјә истинад лазымдыр.
