Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, дүнјанын бүтүн бөлҝәләриндә хүсусилә дә, Балкан өлкәләри вә Јахын Шәргдә јашајан гејри-јәһуди халглар арасында мүһарибә аловуну шөләләндирән вә ҝүнаһсыз инсанларын ганларыны төкән Американын ән нүфузлу “јәһуди диаспора тәшкилаты” - Америка Исраил Иҹтимаи Ишләр Комитәси (AİPAC) АБШ-ын пајтахты Вашингтон шәһәриндә 2016-ҹи ил үчүн сијаси конфранс кечирир.
Иллик әсасда кечирилән конфранс чәрчивәсиндә Шиә дүнјасы башда олмагла бүтүн Ислам Дүнјасына ағыр зәрбә ендирмәк мәгсәди илә, Азәрбајҹан вә ганунсуз Исраил режими арасындакы тәрәфдашлыг мүнасибәтләринә һәср едилмиш “Јени тәрәфдашлар: Исраил вә Гафгаз реҝиону” мөвзусунда семинар тәшкил олунуб.
Артыг нечә илләрдир AİPAC сијаси конфрансларында чыхыш етмәк үчүн дәвәт олунан Азәрбајҹанын АБШ-дакы сәфири Елин Сүлејманов гејд едилән семинарда әсас натиг гисминдә чыхыш едиб.
Һајфа Университетинин профессору, һал-һазырда АБШ-ын мәшһур Ҹорҹтаун университетинин арашдырмачысы кими фәалијјәт ҝөстәрән Бренда Шејферин модераторлуғу илә кечән семинарда, һәмчинин Ҹонс Һопкинс университетинин Мәркәзи Асија вә Гафгаз институтунда Ипәк Јолу Арашдырмалары програмынын директору Сванте Корнел чыхыш едиб.
Сәфир Елин Сүлејманов Азәрбајҹан вә АБШ арасында әлагәләрдән данышараг, ики өлкәнин енержи вә радикализмлә мүбаризә саһәсиндә јахын тәрәфдашлыг мүнасибәтләрин малик олдуғуну вә АБШ-ын реҝионун енержи лајиһәләринә дәстәјинин әһәмијјәтини гејд едиб.
Дипломат, һәмчинин һазыркы ҝеосијаси просесләр контекстиндә АБШ-ын Ҹәнуби Гафгазла бағлы узун мүддәтли мараглара сөјкәнән стратежи јанашмасына хүсуси еһтијаҹ дујулдуғуну бәјан едиб.
Мүсәлман шәргиндә илк республиканын Азәрбајҹанда тәсис едилдијини вә гадынлара сечки һүгугунун һәтта АБШ-дан әввәл өлкәмиздә реаллашдырылдығыны гејд едән дипломат бу ҝүн Азәрбајҹанын прогрессив мүсәлман дөвләти олараг инкишафы вә толерантлыг нүмунәсинә чеврилмәсинин мәһз өлкә рәһбәрлијинин узагҝөрән сијасәти сајәсиндә мүмкүн олдуғуну гејд едиб. Сәфир дүнјанын бир чох бөлҝәләриндә радикализм мејлләринин ҝүҹләндији бир заманда Азәрбајҹанын толерантлыг әнәнәләри илә ҝүндәмә ҝәлдији, өлкәмиздә дини вә етник мәнсубијјәтиндән асылы олмајараг бүтүн вәтәндашларын, о ҹүмләдән јәһуди иҹмасынын сүлһ вә әмин-аманлыг ичәрисиндә јашадығыны вурғулајыб.
Азәрбајҹанла ганунсуз Исраил режими арасында олан тәрәфдашлығын Азәрбајҹан үчүн прагматик сијасәтинин вә “мәдәнијјәтләрарасы диалога” садиглијинин ҝөстәриҹиси олдуғуну сөјләјән сәфир ики өлкә арасында игтисади, һуманитар вә сијаси әлагәләрин јүксәк сәвијјәдә олдуғуну, һабелә бу тәрәфдашлығы Азәрбајҹан вә јәһуди халгларынын узун әсрләр боју давам едән достлуғуна сөјкәндијини билдириб.
Натигләрин чыхышларындан сонра тәшкил едилмиш суал-ҹаваб сессијасында Ермәнистанын Азәрбајҹан торпагларыны ишғал етмәси, Ҹәнуби Гафгаз реҝионунда ҹәрәјан едән ҝеосијаси просесләр вә реҝионал тәһлүкәсизлик чағырышлары кими мәсәләләр әтрафында фикир мүбадиләси апарылмышдыр. Лакин буна бахмајараг Азәрбајҹанын Ермәнистан тәрәфиндән ишғал едилмиш торпагларынын мүһарибәсиз Азәрбајҹана гајтарыламсы һагда ҝүҹлү фикир ајрылыгы јашанмышдыр.
Мартын 22-дә јекунлашмасы нәзәрдә тутулан AİPAC конфрансында АБШ вә дүнјанын мүхтәлиф өлкәләриндән ијирми миндән чох нүмајәндә, академик даирә вә иҹтимаи тәшкилат мәнсублары, АБШ Конгресинин 300-ә јахын үзвү, һабелә бир сыра јүксәк вәзифәли рәсмиләр иштирак едибләр. Конфрансда АБШ витсе-президенти Ҹозеф Бајден, АБШ Конгресинин Нүмајәндәләр Палатасынын спикери Пол Рајн, 2016-ҹы ил президент сечкиләринә намизәдлијини ирәли сүрмүш сабиг дөвләт катиби Һиллари Клинтон, Техас штатындан олан сенатор Тед Круз, бизнесмен Доналд Трамп, Ҹон Кејсик вә башгалары чыхыш едибләр.
Гејд етмәк лазымдыр ки, Америкада олдугҹа нүфузлу сијаси тәдбир олан AİPAC конфрансларында башлыҹа олараг АБШ вә Исраиллә әлагәдар мүзакирәләр тәшкил едилир вә надир һалларда диҝәр дөвләтләрлә бағлы тәдбирләрә јер верилир. Буна бахмајараг, сон илләр әрзиндә AİPAC сијаси конфрансларында Азәрбајҹан илә Исраил арасында мүнасибәтләрә даир хүсуси тәдбирин кечирилмәси артыг бир әнәнәјә чеврилиб вә бу да бир даһа Азәрбајҹанын Шиә Дүнјасы башда олмагла бүтүн Ислам Дүнјасына ән ағыр зәрбә ендирмәк үчүн артан стратежи әһәмијјәтиндән хәбәр верир.
Диггәт: Хәбәрдән истифадә етдикдә мәнбәјә истинад лазымдыр
