Прокурорлуғунун әмәкдашы Сејфулла Гурбанов вә оғлу Сәрхан Гурбанов намаз гылдығы үчүн ишдән чыхарылыб

Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Загатала Рајон Прокурорлуғунун әмәкдашы Сејфулла Гурбанов ҝүнорта намаз гылдығы үчүн ишдән чыхарылыб.

Рајон прокурорлуғунда 30 илдән артыг мүддәт әрзиндә дәфтәрхана мүдири вәзифәсиндә ишләдијини дејән С.Гурбанов билдириб ки, ишдән азад едәркән онун һәтта санбаллы стажына да мәһәл гојмајыблар. Үстәлик о, ишдән чыхарыларкән һеч бир рәсми сәбәб ҝөстәрилмәјиб.

С.Гурбановун сөзләринә ҝөрә, 15 илдән чохдур ки, намаз гылыр, ибадәтлә мәшғулдур. О билдириб ки, намаз гылмаг үчүн ҝүндә ҹәми ики, гыш ајларында исә үч дәфә һәр дәфә 15 дәгигәлијә олмагла иш јериндән ајрылыб прокурорлуғун бинасынын ҹәми бир аддымлығында олан Мәсҹидә ҝедирмиш.

“15 илдән чох иди ки, белә давам едирди. Һәр дәфә дә намаз гылмаг үчүн ишдән 10-15 дәгигәлијә чыханда бу һагда рәһбәрлијә дејирдим. Јәни иҹазәсиз чыхмырдым. Бу ҝүнләрдә дә намаз гылмаг үчүн мәсҹидә ҝетмәздән габаг рајон прокурору Әли Абдуллајевдән иҹазә истәдим. О да етираз етмәди. Һәмишә олдуғу кими, ишдән бу дәфә дә ҹәми 10 дәгигәлијә ајрылдым. Мән һарадан биләјдим ки, һәр дәфә иҹазә алыб намаз гылмаға ҝедәндә прокурор мәним барәмдә јухарылара рапорт јазыб иш јерини ҝуја өзбашына тәрк етдијими билдирирмиш?!

Бир мүддәтдән сонра Әли Абдуллајев мәни јанына чағырыб деди ки, ишдән белә тез-тез чыхыб өзбашына һараса ҝетдијин үчүн ишдән азад олунурсан. Мән дә ҹавабында дедим ки, тәгаүд јашына чатмағыма 2 ил галыб. Исрарла хаһиш еләдим ки, бу гәрарыны дәјишсин, мәнә пенсијаја чыхана гәдәр ишләмәјә имкан, вахт версин. Амма бу хаһишләрим ҹавабсыз галды. Әли Абдуллајев мәнә деди ки, биз ишләдијимиз үчүн мааш алырыг, намаз гылдығымыз үчүн јох. Һалбуки мәнә намаз гылмаг үчүн Мәсҹидә ҝетмәјә нечә вахт иди елә Әли Абдуллајев өзү иҹазә верирди.

Бу да азмыш кими, Балакән Рајон Прокурорлуғунда ишләјән оғлум Сәрхан Гурбанову да елә һәмин ҝүн ишдән азад етдиләр. Ону да ишдән бу сәбәблә - намаз гылдығы үчүн чыхардылар.

Бүтүн бунлар бизим елементар инсан һагларымызын позулмасынын ашкар сүбутудур. Она ҝөрә дә, мәһкәмәјә мүраҹиәт етмишәм. Мәһкәмәдән тәләб етмишәм ки, ишдән ганунсуз азад олунмағым фактыны рәсмән танысын. Сөз јох, мәһкәмәнин әдаләтли гәрар верәҹәјинә инанмырам. Бунунла белә үмид едирәм ки, даһа јухары инстансијалар һүгугларымызын позулмасы фактына диггәт јетирмиш оларлар” - дејә Сејфулла Гурбанов билдириб.


Диггәт: Хәбәрдән истифадә етдикдә мәнбәјә истинад лазымдыр