Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, ишғалчы Ермәнистан ордусунун һәрби һеликоптери ҹәбһә бөлҝәсиндә Азәрбајҹан Силаһлы Гүввәләри (СГ) тәрәфиндән вурулуб.
Азәрбајҹан Мүдафиә Назирлијинин рәсми мәлуматына ҝөрә, Нојабрын 12-дә саат 13:45 радәләриндә ҹәбһәнин Ағдам рајонунун Кәнҝәрли кәндиндән 1700 метр шимал-шәрг истигамәтиндә ишғалчы Ермәнистан Силаһлы Гошунларына мәхсус Ми-24 типли һеликоптер дөјүш курсуна енәрәк мөвгеләримизә һүҹум едиб. Гошунларымыз тәрәфиндән ачылан ҹаваб атәши нәтиҹәсиндә дүшмән һеликоптери мәһв едилиб.
Мүдафиә Назирлији әлавә олараг билдирир ки, дүшмәнин дөјүш ҹүтлүјүндән ибарәт һеликоптерләрдән бири вурулуб, диҝәри исә атәш зонасындан јајынараг узаглашыб. Илкин мәлумата ҝөрә дүшмәнин мәһв едилмиш һеликоптериндә олан 3 һәрби гуллугчусу һәлак олуб.
Һазырда вурулан дүшмән һеликоптеринин галыглары мүдафиәнин өн хәттиндән 500 метр гаршыдакы әразијә дүшүб.
Гејдедәкки, мүддәтдәнартыг һәгиги һәрби хидмәт һәрби гуллугчусу, манга командири Мурадов Илкин Мәммәдоғлу һәрби хидмәтдә сајыглыг вә иҝидлик ҝөстәрәрәк дүшмәнин Ми-24 типли дөјүш һеликоптерини вурдуғуна ҝөрә Мүдафиә назири ҝенерал-полковник Закир Һәсәновун әмри илә "Һәрби хидмәтдә фәргләнмәјә ҝөрә" 3-ҹү дәрәҹәли медалы илә тәлтиф едилиб вә гијмәтли һәдијјә илә мүкафатландырылыб.
Диггәт: Хәбәрдән истифадә етдикдә мәнбәјә истинад лазымдыр
