Әли Кәримли: "Инди Илһам Әлијевин дахили вә хариҹи сијасәтинин ифласа уғрадығыны әминликлә демәк олар"

Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, АХҸП сәдри Әли Кәримли Русија Думасынын анти-Азәрбајҹан мөвгеји вә шовинист чыхышлары илә танынан депутаты Владимир Жириновскинин Бакыја дәвәти вә ән јүксәк сәвијјәдә гәбулу илә бағлы фикирләрини пајлашыб. АХҸП сәдринин дүнән өзүнүн Фаҹебоок сәһифәсиндә јерләшдирдији јазыда дејилир:
"Илһам Әлијев буну да етди. Бу ҝүн о, Жириновски илә ҝөрүшүб. Һәмин Жириновски илә ки, азәрбајҹанлылары һамылыгла гојун адландырмыш, Гарабағла бағлы һәр заман ермәнипәрәст мөвге тутмуш, һәтта Рамил Сәфәровун азад едилмәсинә ҝөрә ермәниләри гисас алмаға чағырмыш, гејри–ҹиддилији һәр кәсә мәлум (Зијафәт Әсҝәров да ону тәлхәк адландырмышды) биридир. Һөкумәт аҝентурасынын Илһам Әлијевин бу һәрәкәтинә неҹә һагг газандыраҹағыны марагла ҝөзләјирәм.

Ҝәлин, нәзәрә алаг ки, Жириновски илә ҝөрүш јени бир башланғыҹ дејил, нәтиҹәдир. Игтидарын бејнәлхалг тәҹридинин нәтиҹәсидир. Инди Илһам Әлијевин дахили вә хариҹи сијасәтинин ифласа уғрадығыны әминликлә демәк олар. Барак Обаманын Азәрбајҹандакы вәзијјәти сәрт тәнгид едиб, бурадакы кими режимләрин гејри-сабитлијә, јахуд екстремизмә зәмин јаратдығыны ачыг билдирмәси әслиндә мүһүм бир мәрһәләјә нөгтә гојду. Она ҝөрә ки, бу чыхыш Авропа Шурасынын Азәрбајҹандакы сијаси мәһбусларла бағлы мәрузәчи тәјин етмәсинин, Авропа Бирлији парламентинин санксијаларла һәдәләјән гәтнамәсинин, АТӘТ вә БМТ експертләринин кәскин ачыгламаларынын ардындан ҝәлди. Инди һөкумәт үчүн һеч бир маневр имканы галмајыб. Һамы бунлары тәнгид едир, тәләб ирәли сүрүр, санксија илә һәдәләјир ки, өз халгына һөрмәт ет.

Инди чарәләри олмадығы үчүн елә тәгдим едирләр ки, ҝуја дүнјанын онлар һагда нә дүшүндүјү бунларын веҹинә дејил. Јалан дејирләр. Әксинә, онлары һеч вахт Азәрбајҹан халгынын нә дүшүндүјү марагландырмајыб. Ҝөзләри, телевизија камералары һәмишә әҹнәбиләрин ағзында олуб.
Дүнјанын сизин барәниздә нә дүшүндүјү сизи марагландырмырдыса, нијә Авровизија јарышмасына 500 милјон манатдан артыг пул хәрҹләјирдиниз? Нијә ҝәләнилки Авропа чемпионатына халгын милјардларыны хәрҹләјирсиниз? Индијә гәдәрки бүтүн сечки кампанијаларыны Илһам Әлијевин хариҹи дөвләт башчылары вә бејнәлхалг тәшкилатларын рәһбәрләри илә исти мүнасибәтләри үзәриндә гурмурдунузму? Азәрбајҹан халгы өзү күрүјә һәсрәт олдуғу һалда тонларла гара күрүнү рүшвәт кими нијә Авропаја дашыјырдыныз? Бу халгын бу гәдәр проблемләри варкән, Авропанын музејләрини, гәсрләрини тәмир етдирмәк сизәми галмышды? Бәс лобби ишинә хәрҹләнән 100 милјонларла манатлыг вәсаити нијә бу халгын боғазындан кәсирдиниз?

Өз сүлалә һакимијјәтинизә бејнәлхалг дәстәји тәмин етмәк үчүн лап үрәјиниз ҝедирди. Алынмады. Әввәл алынырды. Дүнја сијасәтиндә коррупсионерләрин хүсуси чәкиси артыг олан вахтларда нефт мүгавиләси илә, диҝәр чохмилјонлуг мүгавиләләрлә, күрү вә с. бәхшишләрлә хејли адамы ја әлә ала, ја да сусмаға вадар едә билмишдиниз. Бәли, бу о заман иди ки, бәзи Авропа лидерләри пул үчүн һәтта Гәддафијә белә јалтагланырдылар. Бурада да дәб јаранмышды, олигархлардан пулуну алыб, мүхалифәт дүшәрҝәсини тәрк едәнләр ҝуја бу аддымы “Илһам Әлијевин уғурлу хариҹи сијасәтини” дәстәкләдикләри үчүн атдыгларыны дејирдиләр (өз аләмләриндә һәлә дахили сијасәти тәрифләмәјә утанырдылар). О заманлар нәинки АБШ, Авропа Бирлији, һәтта Авропа Шурасы чох мөтәбәр гурум сајылырды.

Амма сонра чох шеј дәјишди. Әввәла, һәддиндән артыг чохалмыш милјардлар, гејри–мәһдуд сәлаһијјәт, ҹәзасызлыг сизләрә мәсулијјәт һиссини унутдурду. Азғынлыг да, гәддарлыг да, кин дә бүтүн әндазәни ашды. Ачыг–ашкар халга диван тутмаға башладыныз. Гәрбдәки көһнә достлар үчүн дә сизи мүдафиә етмәк чәтинләшди. Елә мүһит јаратдыныз ки, виҹданлы адамларын бу баш верәнләрә сусмасы гејри–мүмкүн олду. Икинҹиси, Әрәб ингилаблары вә сосиал шәбәкәләр дүнјаны дәјишди. Бир тәрәфдән Гәрбдә дә һамынын јадына дүшдү ки, диктаторлар нә гәдәр гәддар олур–олсун, сонда халгларына мәғлуб олурлар, диҝәр тәрәфдән исә сосиал шәбәкәләр васитәсилә даһа да мәлуматлы олан Гәрб ҹәмијјәти өз лидерләринә гаршы тәләбкарлығы артырды, ачыг месажлар вердиләр ки, коррупсионер диктаторларла иш бирлијинә дөзмәјәҹәкләр.

Беләликлә, бизим һөкумәтин базары бағланды. Инди о “базар”да бир нечә нәфәр ән шәрәфсиз алверчиләр галыб. Амма онлар да бир шеј баҹармырлар. Мәдәни дүнја коррупсионерләрлә отуруб–дурмағы артыг өзүнә јарашдырмыр.

Елә билирсиниз, режим хош ҝүнүндән Жириновскијә мөһтаҹ олуб?".



Диггәт: Хәбәрдән истифадә етдикдә мәнбәјә истинад лазымдыр