Бу ҝүн Ханым Зеjнәбин (с.ә) вәфат ҝүнүдүр

Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Рәҹәб аjынын 15-и Кәрбәла һәгигәтләрини,Имам Һүсеjн (ә.с)-ын мүсибәтини дүнjаjа чатдыран ханым Зеjнәбин (с.ә.) вәфаты ҝүнүдүр
Ханым Зеjнәби-Кубра (ә) һиҹрәтин 5-ҹи или Ҹәмадиул-әввәл аjынын 5-и анадан олмушдур. О, Һәзрәт Әли (ә) вә Ханым Фатимәнын (с) гызыдыр. Зеjнәб адыны она бабасы Мәһәммәд Пеjғәмбәр (с) вермишдир. (Бу адын мәнасы: «атасынын зинәти» демәкдир). Ханым Зеjнәбин (ә) елм вә ибадәтиндән сөһбәт едәндә ән әсас геjд едилмәли мәгам будур ки, Зеjнәб (ә) Пеjғәмбәр елминдән бәһрәләнән, Әли (ә), Фатимә (с) ибадәтинин һикмәтиндән гидаланан бир шәхсиjjәтдир. Һәзрәт Зеjнәбин (ә) һәjатынын ән мүһүм вә ән әзәмәтли дөврү Имам Һусеjнин (ә) ешг вә шәһадәт карваны илә jолдашлыг етдиjи замана тәсадүф едир.
Буна ҝөрә дә Ханым Зеjнәбин (ә) һәjат тарихини Кәрбәласыз тәсәввүр етмәк мүмкүн деjил. Чүнки Зеjнәб (ә) гәһрәманлығыны, ҹәсарәтини, шүҹаәтини там аjдынлығы илә Кәрбәла гиjамында вә бу мүбаризәдән сонракы дөврдә ҝөрә биләрик. Бир сөзлә, «Ашура» гиjамыны Зеjнәбсиз (ә), Зеjнәби (ә) исә бу гиjамсыз тәсәввүр етмәк мүмкүн деjил. Ханым Зеjнәб (с.ә) бу мүсибәтләр гаршысында нәинки сарсылмады, әксинә дағ кими мүгавимәт ҝөстәриб мүбаризәни давам етдирди. Ашура фаҹиәсиндән сонра әсир ҝөтүрүлән Пеjғәмбәр (с) балалары мин бир ишҝәнҹәjлә Куфәjә ҝәтирилир.
 Кәрбәла әсирләри Куфәjә дахил олдугда ҹамаат онларын әтрафына топлашды. Ҝөрдүкләри бу мәнзәрәдән, Пеjғәмбәр (с) балаларынын башына ҝәтирилән бу мүсибәтдән дәһшәтә ҝәлиб ваj-шивән гопарараг ағламаға башладылар. Ханым Зеjнәб (ә) ишарә едиб онлары сакитләшдирди. Аллаһа һәмд-сәна етдикдән, Пеjғәмбәр вә пак Әһли-беjтинә салам-салават ҝөндәрдикдән сонра хүтбә охуjараг белә буjурду: «Еj Куфә ҹамааты! Еj һиjләҝәр вә хәjанәткар халг! Ҝөзләринизин jашы һеч вахт гурумасын. Нә андыныза етибар етмәк олар, нә дә бағладығыныз пеjмана…Ахирәт үчүн пис азугә һазырламысыныз- Аллаһ гәзәби вә Ҹәһәннәм әзабы. Ағлаjырсыныз?! Газандығыныз чиркинликләрә ниjә дә ағламаjасыныз?!... Пеjғәмбәр баласы, Беһишт ҹаванларынын ағасы, һәмчинин jолунузун чырағы вә чәтин ҝүнүнүзүн досту олан бир инсаны өлдүрмәкдән пис һансы чиркинлик ола биләр?!... Амма билин ки, Ахирәт әзабы даһа чәтин олаҹаг. Әҝәр етдиjиниз ишә ҝөрә Аллаһ тәрәфиндән һәлә ҹәза алмамысынызса, раһатланмаjын! Аллаһ ҝүнаһын ҹәзасыны дәрһал вермир, лакин мәзлумларын ганыны да jердә гоjмур. Аллаһ һәр шеjин һесабыны чәкәҹәкдир!.»
 Бу хүтбәнин тәсириндән сонра гәфләт jухусундан оjанан куфәлиләр баша дүшдүләр ки, Әһли-беjтә гаршы бу бөjүк ҹинаjәтдә онларын да әли вардыр.
Бунлардан да артыг тәәҹҹүб доғуран сәһнә Језидин сараjында баш верән һадисәләр иди. Хәлифәлик вәзифәсини гәсб етмиш Језид әсирләрин ҝөзү гаршысында Имам Һусеjнин (ә) мүбарәк башыны гаршысына гоjмуш, гәләбәни геjд етмәк фикриндәдир. Белә бир шәраитдә ханым Зеjнәбин (ә) сәси дүшмән низәләри вә зәнҹирләри арасындан ешидилир. Бу сәс Бәни-үмәjjәнин (Језидин нәслинин) jарамаз әмәлләрини елә ифша едир ки, әбәди рүсваj олуб етибарларыны итирирләр.
Әлбәттә бу ишдә Имам Сәҹҹадын (ә) сөзләри дә бөjүк рол оjнамышдыр. Кеф мәҹлисинә Пеjғәмбәрин нәвәләрини әлләри гандаллы һалда дахил едирләр. Језидин Куфә шәһәринә вали тәjин етдиjи ибн Зиjад әсирләри ҝөрүб Ханым Зеjнәбә (ә) деjир: «Ҝөрдүнмү Аллаһ гардашын Һусеjнин (ә) башына нә оjун ҝәтирди, ону нә ҝүнә гоjду?» Бу сөзүн гаршысында вүҹудлары ләрзәjә ҝәтирән вә инсанын дүшүнҹәсини һеjрәтдән дондуран бир ҹүмлә, тарихә гызыл һәрфләрлә дүшән ҹүмләләр ешидилир.
 Ханым Зеjнәб буjурур: «Мән ҝөзәлликдән башга бир шеj ҝөрмәдим!» Ханым Зеjнәбин (ә) мүбарәк мәзары Суриjанын Дәмәшг шәһәриндәдир.
Islamazeri.az
Диггәт: Хәбәрдән истифадә етдикдә мәнбәjә истинад лазымдыр
////