Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Һәсән Руһанинин Азәрбаjҹана сәфәри үчүн һазырлыг ишләри ҝөрүлүр
Азәрбаjҹан Президенти Илһам Әлиjев Иранда сәфәрдә олдуғу заман иранлы һәмкары Һәсән Руһанини Азәрбаjҹана дәвәт едиб
Иран Президенти Һәсән Руһанинин Азәрбаjҹана сәфәри үчүн һазырлыг ишләри ҝөрүлүр. Буну Азәрбаjҹанын Теһрандакы сәфири Ҹаваншир Ахундов Иранын "Меһр" аҝентлиjинә мүсаһибәсиндә деjиб.
Сәфир геjд едиб ки, Азәрбаjҹан Президенти Илһам Әлиjев Иранда сәфәрдә олдуғу заман иранлы һәмкары Һәсән Руһанини Азәрбаjҹана дәвәт едиб: "Һазырда бу сәфәрин jахын ҝәләҹәкдә Президент Руһанинин иш графикинә уjғун баш тутмасы үчүн ишләр ҝөрүлүр".
Ҹ.Ахундов билдириб ки, Азәрбаjҹан Президенти Илһам Әлиjевин Ирана сәфәри ики өлкә арасында әлагәләрин мөһкәм тәмәл үзәриндә гурулдуғуну вә бунун һәр ики өлкәнин хеjринә олдуғуну ҝөстәрир.
Онун сөзләринә ҝөрә, сәфәр заманы ики өлкә арасында имзаланмыш сәнәдләр, дөвләт башчыларынын ҝөрүшдә вә ҝөрүшдән сонракы чыхышлары вә бәjанатлары ҝөстәрир ки, ҝәләҹәкдә ики гоншу вә дост өлкә арасында әлагәләр артан темплә ирәлиләjәҹәк.
Дипломат вурғулаjыб ки, Азәрбаjҹан вә Иран бөлҝәдә вә дүнjада баш верән бир чох просесләрлә бағлы еjни мөвгедәдирләр.
Ҹ.Ахундов деjиб ки, һәр ики өлкә башчысы Азәрбаjҹан вә Иран арасында бүтүн саһәләрдә әмәкдашлығын инкишафыны дәстәкләjиб вә бунун үчүн кифаjәт гәдәр потенсиал олдуғуну билдирибләр.
Диггәт: Хәбәрдән истифадә етдикдә мәнбәjә истинад лазымдыр
Cenubnews.com
