Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Америка Бирләшмиш Штатларынын мәнафеини горуjан “Азадлыг” радиосу АБШ-ын Азәрбаjҹандакы кечмиш сәфири Ричард Козларичдән Кремлин Украjнадакы сон аддымларынын Ҹәнуби Гафгаза неҹә тәсир едә биләҹәjини сорушуб:
- Сизҹә, Украjна һадисәләриндән сонра Гәрб Русиjа вә АТӘТ-ин Минск групу илә бағлы нәләр етмәлидир?
- Гәрб Русиjа гошунларынын Крыма jеридилмәси вә Русиjанын Крымын биртәрәфли шәкилдә Украjнадан аjрылмасына дәстәк вермәсинә сәрт ҹаваб вермәлидир. АБШ вә Авропа Бирлиjинин бу мәсәләдә әмәкдашлығы вә бирлиjи һәмин ҹавабын еффектив олмасы үчүн мүһүмдүр. Индики шәраитдә Русиjа илә һансы мәсәләләрдә әмәкдашлығын мүнасиб олуб-олмамасы мәсәләсинә ҝәлдикдә, мәнҹә, jенидән бахыласы мәсәләләрдән бири дә Русиjанын АТӘТ-ин Минск групундакы ролу олмалыдыр. 2008-ҹи илдә Ҝүрҹүстанда олдуғу кими инди Украjнада да Русиjа биртәрәфли шәкилдә һәрби мүдахилә jолуну сечиб – һәмсәрһәд олдуғу реҝионларла бағлы мәсәләләрдә беjнәлхалг дипломатик әмәкдашлығы сечмәк әвәзинә. Бу белә бир мәсәләни актуаллашдырыр ки, Русиjа АТӘТ-ин Минск групунда мүсбәт рол оjнаjа биләрми? Ахы Русиjа нәинки АБШ вә Авропа Бирлиjинин Украjна мәсәләсиндә әмәкдашлыг тәклифләрини рәдд едиб, һәтта АТӘТ-ин орада мүшаһидә миссиjасы jеринә jетирмәсинин гаршысыны алыб.
- Бу мәсәләдә Азәрбаjҹан үчүн даһа нәләр нараһатлыг мәнбәjи саjыла биләр?
- Азәрбаjҹан өтән паjызда Авропа Бирлиjинин Шәрги тәрәфдашлыг тәшәббүсүнә гошулмаг ниjjәтини ачыг бәjан етмәк имканыны әлдән верди. Бу “неjтрал” мөвгеjи ону Аврасиjа Бирлиjинә гошулмагла бағлы Русиjадан едилән тәзjигләр гаршысында даһа да зәифләтди.
Бундан әлавә сон ҝүнләрдә Путин Русиjанын Крыма һәрби мүдахиләси үчүн бир сыра принсипләр елан едиб. Онун мәтбуат конфрансында дедиjи сөзләрдән бири дә о олду ки, jалныз реҝионун өз әһалиси өз ҝәләҹәjини мүәjjән етмәк һаггына маликдир.
- Әҝәр Крымдакы референдум кечириләрсә вә онун нәтиҹәләри әсасында – jалныз Крымда jашаjанлар сәс верә биләр – Крымдакы һакимиjjәт jа мүстәгиллиjини елан едәрсә, jа да Русиjаjа бирләшмәк истәjини билдирәрсә, онда нә баш верәҹәк? Бу, Дағлыг Гарабағ үчүн неҹә бир преседент олаҹаг?
- Русиjа бунунла бир нүмунә ҝөстәрир ки, Дағлыг Гарабағдакы һакимиjjәт дә өз референдумуну кечирә, jа мүстәгил ола, jа да Ермәнистана бирләшә биләр.
Диггәт: Хәбәрдән истифадә етдикдә мәнбәjә истинад лазымдыр
