Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Исламчыларын Һүгугларыны Мүдафиә Комитәси 2010-2013-ҹу илләр әрзиндә ислам ҹамиәсиндә баш верән һадисәләрлә бағлы һесабат һазырлаjыб.
Һесабатда ҝөстәрилир ки, әслиндә 2009-ҹу илдә Азәрбаjҹанда азан гадағасы вә мәсҹид сөкүнтүләри илә әламәтдар олан исламофобиjанын бир илдән сонра даһа ҝениш вүсәт алаҹағы вә күтләви һәбсләрлә нәтиҹәләнәҹәjи ҝөзләнилмирди.
Ҝөзләнтиләрин әксинә, 2010-ҹу илдән башлаjараг, азад дини ҹамеәjә гаршы сөзүн әсл мәнасында сәлиб jүрүшү елан олунуб.
2010
2010-ҹу ил 13 февралында Мәһәммәд Пеjғәмбәрин вә Имам Һәсәнин вәфаты илә әлагәдар Шәһидләр Хиjабанына jүрүш едәнләрин 17 нәфәри һәбс олунду вә мәһкәмәнин һөкмү илә онларын беши 4-5 ил мүддәтинә азадлыгдан мәһрум едилдиләр.
2010-ҹу илин сонларында республиканын демәк олар ки, бүтүн бөлҝәләринин орта мәктәбләриндә баш өртүjүнә гадаға гоjулду. Бу геjри-рәсми тапшырыгдан сонра чохлу аиләләрдә ҹидди проблем jаранды. Тәһгир едиләрәк мәктәбдән говулан көрпә гызлар вә онларын валидеjнләри ағыр стресс jашадылар; кимиси өлкәдән ҝетди, кимиси мәктәбини дәjишиб әjаләтләрдә ҝөздән узаг бир мәктәбә jолланды, чохлары да тәһсилдән мәһрум олду. Бунун ардынҹа исә әсассыз гадағаjа етираз едән инанҹлы инсанлар өз конститусион һаглары уғрунда мүбаризәjә галхдылар.
2011
2011-ҹи ил jанварын 7-дән 8-ә кечән ҝеҹә АИП сәдри Мөвсүм Сәмәдов вә онунла бирҝә олан Вагиф Абдуллаjев, Елчин Һәсәнов вә Мирһүсеjн Казымов Нәриманов раjон әразисиндә сахланараг, полисә мүгавимәт маддәсилә 13 ҝүн азадлыгдан мәһрум едилдиләр. Бунун ардынҹа давам едән силсилә һәбсләрдән сонра исә гондарма дөвләт чеврилиши иттиһамы илә Азәрбаjҹан Ислам Партиjасынын (АИП) лидери Мөвсүм Сәмәдов - 12 ил; АИП Астара раjон тәшкилатынын сәдри Руһулла Ахундзадә - 11 ил 6 аj; АИП сәдринин мүавини Вагиф Абдуллаjев - 11 ил, руһани Фәрамиз Аббасов - 11 ил; Мөвсүм Сәмәдовун гаjны Фирдовси Мәммәдрзаjев - 10 ил; Мөвсүм Сәмәдовун әмиси оғлу Дәjанәт Сәмәдов - 10 ил азадлыгдан мәрһум едилди, руһани Зүлфүгар Микаjыл исә шәрти гаjдада ҹәзаландырылды. Буну да геjд етмәк лазымдыр ки, АИП сәдринин мүавини Вагиф Абдуллаjев 2012-ҹи илин иjул аjында һәбсханада дүнjасыны дәjишмишдир.
Бундан әлавә, һиҹаб гадағасына етираз етдикләринә ҝөрә Ҝүрҹүстан сәрһәдиндә сахланан Ҝәнҹә руһаниләри Фәхри Илjасов вә Азәр Ҹәбиjев, еләҹә дә Ҹәлилабад раjонундан руһани Илгар Әлиjев вә илаһиjjатчы Һәсән Мәммәдов, 2011-ҹи ил маj аjынын 6-да Бакыда Тәһсил Назирлиjинин гаршысында кечирилмиш “Һиҹаба азадлыг!” аксиjасында тутулан руһани Һаҹы Тале Бағыров вә диҝәр 11 нәфәр, 11 август 2011-ҹи илдә һәбс едилән руһани Абҝүл Сүлеjманов, исламазери.аз саjтынын баш редактору Рамин Баjрамов, Азәрбаjҹан Ислам Партиjасы сәдринин мүавини Ариф Гәниjев, Һаҹы Абҝүл Сүлеjмановун гаjынатасы, Бүлбүлә ағсаггаллар шурасынын үзвү, Һаҹы Мөһсүн jаланчы иттиһамларла һәбсханалара салыныблар. Онлардан Һаҹы Абҝүл Сүлеjманов 11 ил азадлыгдан мәһруметмә илә ҹәзаландырылмышдыр.
2012
2012-ҹи илин феврал вә март аjлары да диндарларын күтләви һәбси илә jадда галды. Бундан башга 2012-ҹи илин февралында һәбс олунан Меһди Мәммәдов, Елбрус Ибадов, Илгар Әлиjев, Илһам Әлиjев, Зөһраб Гулиjев, Асәф Әлиjев, Илһам Әләкбәров, Һаҹы Әлиjев, Әли Худавердиjев, Әбүлфәз Бүнjадов, Анар Баjрамлы, Рамил Дадашов, Сәхавәт Әлиjев вә Афәт Әлиjев мүхтәлиф мүддәтләрә азадлыгдан мәһрум едилибләр. Онларын бир гисми һәбс мүддәти битдикдән сонра азадлыға бурахылыб.
2012-ҹи ил иjун аjында дини нәшрләр үзрә ихтисаслашан “Парлаjан Ҝүнәш” нәшриjjатынын әмәкдашлары Нурман Шаһмәрданлы, Исмаjыл Сүлеjманов вә Габил Шаһмәрданов тутулублар. Инзибати һәбс ҹәзалары алан нәшриjjатчылар 5 сутка Дахили Ишләр Назирлjинин Баш Ҹинаjәткарлыгла Мүбаризә Идарәсиндә сахланыблар.
“Азад хәбәр” саjтынын баш редактору Ниҹат Әлиjев маjын 20-дә һәбс олунуб. Барәсиндә 2 аj мүддәтиндә һәбс гәтимкан тәдбири сечилән баш редактор Бакы Истинтаг Тәҹридханасында сахланыр.
2012-ҹи илин сентjабрын 8-дә Масалылыда әхлагсыз әмәлләрә етираз етдикләринә ҝөрә 8 диндар һәбс олунуб. Бунлар хебер44.ҹом саjтынын баш редактору Араз Гулиjев, Халид Казымов, Зиjа Таһиров, Рза Ағалы, Сураҹ Ағаjев, Ниҹат Әлиjев, Намиг Кишиjев вә Вүсал Гулиjевдир. Онларын бир нечәси 8 ил азадлыгдан мәһрум едилибләр.
2013
1 ил 6 аj һәбс ҹәзасыны чәкмиш руһани Тале Бағыров азадлыға чыхдыгдан jалныз 4 аj сонра сүрүҹүсү Анар Мәликовла бирҝә jенидән һәбс олунду. Ганунсуз олараг бир нечә ҝүн "бандотдел" кими танынан идарәдә ишҝәнҹәләрә мәруз галан руһани артыг алтынҹы аjдыр Истинтаг тәҹридханасында сахланыр вә барәсиндә jени-jени иттиһамлар ирәли сүрүлүр.
Дини ҹамеәjә гаршы һагсызлыглар jалныз бунларла битмир. Бу сиjаһыjа дини әдәбиjjатла бағлы гадағалар, хариҹдә дини тәһсил алмыш руһаниләрин дини аjинләрин иҹрасына гоjулмуш бөjүк ҹәримәләр дә әлавә олунмалыдыр.
Диггәт: Хәбәрдән истифадә етдикдә мәнбәjә истинад лазымдыр
