Әһли Беjт (әлеjһимус сәлам) -АБНА- Хәбәр Аҝентлиjи- АБШ президенти Барак Обама Сенат вә Конгресин Нүмајәндәләр Палатасынын рәһбәрлијинә Суријаја гаршы һәрби әмәлијјат кечирмәк нијјәтиндә олдуғу барәдә мәктуб ҝөндәриб.
“ИТАР-ТАСС”ын вердији хәбәрә ҝөрә, мәктуба АБШ Силаһлы Гүввәләринин бу мәгсәдләр үчүн ҹәлб олунмасыны санксијалашдыран гәтнамәнин лајиһәси әлавә олунуб.
Бир сәһифәлик сәнәддә 1973-ҹү илдә гәбул олунмуш Һәрби сәлаһијјәтләр барәдә Гануна истинад јер алыб. Гејд едәк ки, бу гануна әсасән, АБШ президенти өлкәнин Силаһлы Гүввәләрини 60 ҝүн әрзиндә өлкә һүдудларындан кәнарда истифадә етмәк һүгугуна маликдир.
“Суријада кимјәви вә ја диҝәр күтләви гырғын силаһынын истифадәси илә бағлы президентә Силаһлы Гүввәләрдән лазым вә мүмкүн билдији кими истифадә етмәк һүгугу верилир”, дејә сәнәддә билдирилир.
Сәнәддә белә бир аддымын атылмасы, биринҹиси, кимјәви вә биоложи силаһ дахил олмагла истәнилән күтләви гырғын силаһынын истифадәсинин вә јајылмасынын (о ҹүмләдән, террорчу груплашмалара вә ја диҝәр дөвләт вә гејри дөвләт бирләшмәләринә өтүрмә) гаршысынын алынмасы илә изаһ олунур.
Икинҹиси, белә бир аддымын атылмасы АБШ-ы, һәмчинин онун мүттәфиг вә тәрәфдашларыны бу тип силаһларын тәһлүкәсиндән горумаға имкан верәҹәк.
Обама администрасијасынын планына ҝөрә, сәнәд Конгресин һәр ики палатасынын бирҝә гәтнамәси формасында олмалыдыр. Сәнәдин мүзакирәсинин сентјабрын 9-дан сонра (јај тәтили сона чатдыгдан сонра) башланаҹағы ҝөзләнилир.(апа)
Диггәт: Хәбәрдән истифадә етдикдә мәнбәjә истинад лазымдыр
