Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Франсада исламафобија сијасәтләри давам етмәкдәдир. Белә ки, өлкәнин Трапп шәһәриндә баш вермиш иғтишашлар нәтиҹәсиндә ән азы 5 Мүсәлман хәсарәт алыб.
Франса полисләринин, гејриконститусијон гануна етираз едән күтләјә һүҹум чәкмәсинә сәбәб, Мүсәлман гадынларынын чадра вә ја нигабла күчәјә чыхмалары олуб.
Нигаб ҝејиндијинә ҝөрә әввәлләр дә ганунсуз олараг ҹәримәләнән гадын тәкрар инсани һүгугларындан истифадә едәрәк баш өртүјү илә иҹтимаи јердә ҝөзә дәјиб. Инсан Һаггларынын әлејһинә олараг Полис бу дәфә гадынын әрини һәбс етмәјә гәрар вериб. Һадисәдән дәрһал сонра полис мәнтәгәсинин гаршысында 200-250 етиразчы топлашыб. Етиразчылар өз һагг сәсләрини дөвләт гурумлары тәрәфиндән ешидилмәдијини ҝөрдүкдә, үстәлик полис алајлары тәрәфиндән дә һүҹума мәруз галдыгда, әразидә олан зибил гутуларыны јандырыб, автобус дајанаҹағыны дармадағын едибләр. Полис ганунсуз олараг етиразчылары дағытмаг үчүн зәһәрли ҝөзјашардыҹы газдан истифадә едиб. Нәтиҹәдә ән азы 5 Мүсәлман хәсарәт алыб, 6 нәфәр исә сахланылыб.
Франсанын дахили ишләр назири Мануел Валс бәјан едиб ки, истәр өлкәнин Мүсәлман вәтәндашлары, истәрсә дә полис әмәкдашларына гаршы ҝүҹ истифадә етмәк јолверилмәздир.
“Траппда иғтишашларын баш вермәсинә һеч бир зәмин јох иди. Ганун һамы үчүн бирдир вә она шәртсиз әмәл олунаҹаг”, дејә назир бәјан едиб.
Гејд едәк ки, Франса дахили ишләр назиринин белә бир бәјанатла чыхыш етмәси өлкәдәки гејриконститусијон ганунун гүввәдә сахланылмасы демәкдир. Бу да өз нөвбәсиндә Инсан Һүгугларынын кобуд сүрәтдә позулмасы, виҹдан вә әгидә азадлығынын тапдаланмасы, һәр бир вәтәндашын ҝејиминдә азад олмасынын мәһдудлашдырылмасы демәкдир.
Диггәт: Хәбәрдән истифадә етдикдә мәнбәјә истинад лазымдыр
