Јазымы Мисир һадисәләри, Мурсинин һакимијјәтдән узаглашдырыламсы, сон заманлар даһа чох данышылан "шиә вә сүнни һилалы"на вә с. һәср етмәк истәјирәм
Парчаланмыш һилал...
Мисирдә баш верән һәрби чеврилиш бәзиләринин зеһинләрдә гурдуғу вә буну реаллашдырмаға чалышдығы “сүнни һилал”ыны әслиндә ики јерә парчалады. Реаллыгда бир тәрәфдә Түркијә, Гәтәр диҝәр тәрәфдә исә “сүнни һилал”ыны веҹинә алмајан вә өзләри үчүн “шиә вә сүнни һилалы тәһлүкәси” јарадан әслиндә исә сионизмлә бир ҹәрҝәдә дуран Сәуд, БӘӘ , Күвејт вә Бәһрејн марионетка режими вар...
Сәуд режими севинҹини ҝизләтмәди...
Сәудијјә Әрәбистаны Мисирдәки мүсәлманларын гәтлә јетирилмәсилә мүшаһидә едилән һәрби чеврилишә илк севинән вә тәбрик месажы јајымлајан дөвләт олду. Чеврилишин баш гәһрәманы Әбдүлфәттаһ Сисинин дә бир заманлар Сәудијјәдә Мисир сәфирлијиндә һәрби аташе олмасы, һәрби чеврилишдән сонра Сәудијјәјә мәрузә етмәси “торбада пишик вар” демәјә әсас верә биләр. АБШ-ын саман алтындан су јеритмәси, Исраилин ачыг-ашкар севинҹәк дүшмәси бу планларын башлары ејш-ишрәтә гарышан Сәудијјәдә сәрхош һәјаты кечирән краллар тәрәфиндән дејил, мәһз АБШ-Исраил дигтәсилә узун илләр АБШ-да сәфир олмуш Бендер тәрәфиндән һазырланмасы еһтималыны ҝүҹләндирир.
Һашијә...
Бир һашијәјә чыхмаг истәјирәм. Бу Бендерин Бушла тарихи бир шәкили вар. Тәсәввүр един, инсан нә гәдәр АБШ президентинә јахын олмалыдыр ки, онун гаршысында чох сәмими сурәтдә креслонун дирсәк гојулан һиссәсиндә отурсун вә мәһрәманә сөһбәт етсин. Һансы сәфир президентин отағында бу ҹүр отурар? Буну зеһинләрдә Бендерин АБШ-а неҹә вә һансы дәрәҹәдә јахын олмасыны ачыгламаг үчүн јаздым...
12 милјардлыг һәдијјә...
Ҝәләк Мисир чеврилишинә, Сәудијјә вә әлалты әрәб режимләринин малијјә дәстәјинә. Дүнја медиасы Мисир һадисәләринин икинҹи ҝүнү белә бир мәлумат јајдылар ки, Сәудијјә, БӘӘ вә Кувејт бирликдә Мисирин јени һөкүмәтинә гајтарылмамаг шәртилә 12 милјард доллар јардым едиб. Бәли, бу Мисирдә мүсәлман һөкүмәтини девирмәсинә ҝөрә Сиси вә диҝәрләри үчүн әрәб шејхләринин һәдијјәси иди... Хатырладым ки, Мәһәммәд Мурси Түркијә вә Гәтәрдән 10 милјардлыг јардым сөзү алмыш, лакин пул ҝәләнә кими онун посту диҝәрләри тәрәфиндән гәсб едилди.
Вәһаби “Нур” партијасы Сәуддан асылы олмасыны сүбут етди...
Мисирдә бөјүк нүфуза малик олмаса да, ҝөрүнәҹәк сајда олан вәһабиләрин “Нур” партијасы да, Сәудијјә Әрәбистанынын сифариши илә мүсәлман гардашларынын деврилмәсинә ҝөз јумду. Һәтта, “Нур” партијасы јени һөкүмәтин баш назир сечмәсиндә өнәмли рола белә, малик олду. Бу исә, “Нур” партијасынын Сиси илә әввәлҹәдән разылыға ҝәлмәсиндән хәбәр верир. Мәһз Бәрадеји вәһабиләрин партијасынын етиразы илә баш назирлик постундан узаглашдырылдығы өнә чәкилди.
Иранын мөвгеји...
Иранын мөвгеји бу мәсләдә неҹә олду? Иран “Ихванул Муслимин”ин сәһвләрини ачыг-ашкар ачыглады. Лакин Иран, мүсәлман һәрәкатын сионизм һәрәкаты илә әвәз олмасындан нараһат олдуғуну дәфәләрлә ачыг бәјан етди. Һәтта Мисирин һазырки ХИН-и Ираны Мисирин дахили ишләринә гарышмагда иттиһам етди. Бир һалдаки, Түркијә Мисирдәки һадисәләрлә бағлы һәјәҹан сигналы чалмагдадыр.
Јенә бир һашијә... Бу мәсәләдә дә, бир һашијәјә чыхмаг истәјирәм. Бәс Мисирин индики режими Ирана нијә белә реаксија верди? Мисир режими билир ки, Иран бир мәсәләјә ҹидди гарышанда орада өз сөзүнү дејә билир. Буна мисал үчүн Сурија, Гәззада 22 ҝүнлүк мүһарибә вә Ливан “Һизбуллаһ”ыны ҝөстәрмәк олар. Одур ки, Мисир режими телеканаллар васитәсилә бәзиләринин “кәсәрәм, дағыдарам”дан даһа чох моллаларын сөзүндән нараһат олдуғуну бирузә верди...
АБШ заһирдә ҝөзләмә мөвгејиндә...
АБШ исә Мурсинин деврилмәсиндән әввәл “сечкиләрин галиби олмаг демократик олмаг дејил” демишди. Бу ҝүнләрдә исә, “Мурси һөкүмәти демократик дејил” кими ачыгламалары, 10 ијулда исә Ағ Ев сөзҹүсү Жај Ҹарнеј “Мисирдәки һадисәләри анламағымыз вә дүзҝүн дәјәрләндирмәмиз үчүн замана еһтијаҹ вар” демәси заһирдә ҝөзләмә мөвгејини ҝөстәрир.
АБШ нијә ачыг-ашкар дәстәк вермир?
Түркијәнин Исраиллә әлагәләринин ачыг-ашкар исти олдуғу һалда, Әрдоғана белә бир “зәрбә” АБШ-дан ҝәләрсә Түркијәдәки мүсәлманларын әксәријјәтинин јени тәјин етдији “Әсәд вә достлары” дүшмән образынын јенидән “АБШ, Исраил”лә дәјишмә еһтималы бөјүкдүр. Одур ки, бөјүк ојунларда һөкүмәтләр дејил, халглар әсас рол ојнајыр. Буну АБШ билир вә мүмкүн дәрәҹәдә Түркијә мүсәлманларынын јадындан Исраил ҹинајәтләрини чыхармаг үчүн чалышыр.
“Шиә вә сүнни һилалы” Исламы парчаламаг үчүн ортаја атылыб...
Тарихләр боју, шиә вә сүнни арасында гаршыдурма јаратмаг, фитнә салмаг вә араларында мүһарибә јаратмаг үчүн Ислам дүшмәнләри мүхтәлиф планлар ҹызмышлар. Кифајәт гәдәр белә фактлар тарихдә мөвҹуддур. Одур ки, “шиә һилал”ыны ортаја атмагла “сүнни һилал”ы јаратмаг ҹәһди дә, мәһз Исраил вә АБШ-ын “гулаг пычылтылары” илә олмушдур. Чүнки, шиә вә сүннинин вәһдәт һалында олмасы дүнја империалистләри үчүн бөјүк тәһлүкәдир. Гәззадакы сүнниләрин мәһз ән бөјүк дәстәји шиәләр тәрәфиндән верилмәси данылмаз бир фактдыр. Һәтта 22 ҝүнлүк мүһарибәдән сонра Иран илк дәфә олараг “Гәззаја јардым етдик” ачыгламасыны верди. Бунун сәбәби мәһз, “шиә һилал”ы кабусуну јараданлар үчүн өнләјиҹи аддымлар иди. Вә ја Ливан “Һизбуллаһ”ы Боснија-Һерсоговинада дөјүшдүкләрини ачыгладылар. Сејид Нәсруллаһ “орада сүнниләри мүдафиә етдик” кими ачыгламар верди. Бу да “шиә һәрәкаты”нын мәзһәбчиликдән узаг олдуғуну сүбут етмәк үчүн едилән ачыглама иди.
Һәгигәтдә нә баш верир?
Дүнја әдаләт тешнәсидир. Дүшмәнләр дә ҝөзәл билир ки, Имам Заман (ә.ф) зүһур едәҹәк. Неҹә ки, Муһәммәд Пејғәмбәри јәһуди-сионистләр ҝөзәл таныјырдылар, Имам Заманы (ә.ф) да о ҹүр ҝөзәл таныјырлар вә онун зүһуруну ҝөзләјирләр. Имам Заманын (ә.ф) зүһур әламәтләрилә бағлы һәдисләри даһа ҝөзәл билирләр вә арашдырырлар. Одур ки, онлар Имамы гәтлә јетирмәк вә Әдаләтин бәрпа олмасына манеә олмаг үчүн о ҝүнүн интизарындадырлар. “Шиә, сүнни һилал”ы, нә билим “шиә тәһлүкәси” дә мәһз бу шәхсләр тәрәфиндән ортаја атылыб. Имам Заман (ә.ф) дүшмәнләри јахшы билирләр ки, сүнниләри (вәһаби вә сионист зеһнијјәтинә булашмамыш) Имам Заман (ә.ф) дүшмәни едә билмәјәҹәкләр. Одур ки, сүнни ҝүҹләри бир тәрәфдә, шиә ҝүҹләри исә диҝәр тәрәфдә зәифләтмәк онларын әсас һәдәфидир...
Амма һәмд олсун Аллаһа ки, Аллаһын истәдији олаҹаг вә бизләр ҝөрсәк дә, ҝөрмәсәк дә Имам Заман (ә.ф) Иншә-Аллаһ зүһур едәҹәк. Бүтүн пак мүсәлманлар О Һәзрәтин бајрағы алтында бирләшәҹәк вә Әдаләтли бир Дүнјанын нағыл олмадығынын шаһиди олаҹаглар. Аллаһ Тәала бу мүбарәк аја хатир бизләри дә Имам севәнләрдән гәрар версин.
Рамин Бајрамов
Исламазери.аз-ын баш редактору
