Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам Партијасы, партијанын Астара рајон комитәсинин сәдри Руһулла Ахундзадәнин сәһһәтинин писләшмәси илә бағлы бәјанат јајыб.
Бәјанатда дејилир:
Мәлум олдуғу кими, Азәрбајҹан Ислам Партијасынын сәдри вә бир нечә функсионеринә гаршы 2011-ҹи илин јанвар ајында әсл сәбәби бу ҝүн дә иҹтимаијјәтә бәлли олмајан һәбс тәдбирләри һәјата кечирилмишдир. Артыг үч илдән чохдур ки, АИП сәдри Һаҹы Мөвсүм Сәмәдов вә диҝәрләри барәдә ағыр, һәм дә гондарма иттиһамларла мәһкәмә һокмү чыхарылараг мәһбәсә ҝөндәрилмишләр. Ҝениш иҹтимаијјәтин сәј вә тәләбләринә бахмајараг, бу ганунсузлуглар һәлә дә арадан галдырылмамышдыр. Әдаләтсизлик вә мәнәви сарсынтылар нәтиҹәсиндә һагсыз һәбс олунанлар мәһбәсдә ағыр хәстәликләрә дүчар олмушлар. Сахта иттиһамларла һәбс олунанлардан Һаҹы Вагиф Абдуллајев мәлум олмајан сәбәбләрдән өтән ил һәбсхана диварлары арасында ҝөзләнилмәдән дүнјасыны дәјишмишдир.
Баш верән фаҹиә бир аиләнин башсыз галмасына, ҝүнаһсыз инсанларын азадлыгдан мәһрум едилмәси исә ҹәмијјәт үзвләрини тәһлүкәсиз јашамаг үмидләрини итирмәјә сәбәб олмушдур.
Бу ҝүн Азәрбајҹан Ислам Партијасы сон үч илин икинҹи ағыр фаҹиәсини јашамаг тәһлүкәси гаршысындадыр. Белә ки, партијанын Астара рајон комитәсинин сәдри Руһулла Ахундзадә 15 сајлы ҹәзачәкмә мүәссисәсиндә ағыр хәстәлијә дүчар олмагла јанашы, һәм дә инфаркт кечирмишдир. О, артыг бир нечә ҝүндүр ки, пенитенсиар хидмәтин мәркәзи клиникасында һәкимләрин нәзарәти алтындадыр. Р. Ахундзадәнин сәһһәти она бу әдаләтсиз ағыр мәнәви зәрбәнин нәтиҹәси олараг һәбсин галан һиссәсини чәкмәјә имкан вермәдији үчүн онун тәҹили азадлыға бурахылмасы мәсәләсинә бахылмалыдыр. Руһулла Ахундзадәнин ҝүнаһсыз олмасы, өлүмлә һәјат арасында галараг һәбсхана диварлары арасында изтираб чәкмәси һеч бир һуманизм вә мәрһәмәт дујғуларына ујғун ҝәлмир.
Һәр бир Азәрбајҹан вәтәндашынын, аиләсинин тәһлүкәсиз јашамаг һүгугуну үзәринә өһдәлик ҝөтүрәнләр билмәлидирләр ки, өлүм ајағында олан Азәрбајҹан вәтәндашы, Азәрбајҹан халгынын гејрәтли, әгидәли өвладыдыр. Бу инсанлар Вәтән, торпаг јолунда, дин, намус јолунда ҹанларындан кечәнләрдир. Онларын һәр биринин мәнәви ишҝәнҹәләрә мәруз гојулараг инҹидилмәси, гәтлә јетирилмәси ҹәмијјәтдә әдаләтсизлијә рәваҹ верәнләрә гаршы бөјүк гәзәб вә нифрәт јарадыр. Һагг олан Аллаһын вә сәбри түкәнән халгын гәзәби гаршысында бу ҝүн һәр кәс мәсулијјәтини дәрк етмәли, һагсызлыглара ҹаваб верәҹәји аны хатырламалыдыр.
Диггәт: Хәбәрдән истифадә етдикдә мәнбәјә истинад лазымдыр
