Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам Партијасы октјабрын 16-да кечириләҹәк президент сечкисиндә иштирак гәрары вериб. Партија сечкијә ја өз намизәди илә, ја да башга мүхалиф партија вә ја блокун намизәдини мүдафиә етмәклә гатылаҹаг. Мүхалифләр бу гәрары неҹә гаршылајыр? “Медиа форум” буну сорушуб.
Мүсават Партијасы Мәркәзи Иҹра Апаратынын рәһбәри Ариф Һаҹылы дејир ки, Ислам Партијасынын Азәрбајҹанда һүгуги дөвләт гурулмасы истигамәтиндә фәалијјәт ҝөстәрән, дини дәјәрләрә һөрмәтлә јанашан Мүсават вә диҝәр сијаси партијаларла әмәкдашлыға һазыр олмасыны мүсбәт дәјәрләндирир.
Азәрбајҹан Халг Ҹәбһәси Партијасы сәдринин мүавини Фуад Гәһрәманлы Ислам Партијасынын гәрарыны мүсбәт гаршылајыр: “Өлкәнин бүтүн сијаси гүввәләри демократик сечкиләрин кечирилмәси үчүн бирҝә сәј ҝөстәрмәлидир. О ҹүмләдән ваһид намизәдин олмасы, ваһид сечки платформасынын һазырланмасы, ваһид команданын формалашдырылмасы истигамәтиндә әмәкдашлыг едилмәлидир. Бу мәсәләләрдә исламчыларла әмәкдашлыг үчүн проблем ҝөрмүрүк. Сон дөврләр баш верәнләр ислами кәсимлә демократик гүввәләрин мүнасибәтләрини јахынлашдырды вә гаршылыглы етимад мүһитини ҝүҹләндирди. Инди дә әмәкдашлыг үчүн ҝениш имканлар вар”.
Азәрбајҹан Демократ Партијасынын сәдри Сәрдар Ҹәлалоғлу Ислам Партијасынын сечкидә иштиракыны Азәрбајҹан Конститусијасына вә ганунларына ујғун һесаб едир: “Азәрбајҹанда бүтүн просесләр сечкиләрдән кечмәлидир. Ислам Партијасынын да сечки јолуну сечмәси тәгдирәлајигдир. АДП Ислам Партијасы илә сых әмәкдашлыг едир. Исламчыларын һүгугларыны горумаг үчүн сәј ҝөстәририк. Дини кәсимин демократик топлума интеграсијасы ваҹибдир”.
Ел һәрәкатынын гуруҹусу Елдар Намазов Азәрбајҹанда һагг-әдаләтин бәрпасы үчүн бүтүн гүввәләрин бирләшмәсини зәрури билир: “Милли дәјәрләр үзәриндә давамлы, сабит, һүгуги системин гурулмасында мараглы олан, мүбаризә апаран бүтүн гүввәләр бирләшмәли, бир араја ҝәлмәлидир. Гаршыда талејүклү сечки олаҹаг. Бу сечкидә сечим сағчыларла солчулар, игтисади платформалар арасында јох, хејирлә шәр, зүлмлә һагг-әдаләт арасындадыр. Она ҝөрә дә һамынын бир јердә олмасыны ваҹиб сајырыг”.
Диггәт: Хәбәрдән истифадә етдикдә мәнбәјә истинад лазымдыр
