Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәри-Талыш Иҹтимаи Бирлијинин сәдри Меһдибәј Сәфәров вердији ачыгламада Шушадан “Толышстони сәдо” радиосунун јајылмасына мүнасибәт билдириб.
О јазыр: “Һијләҝәр вә тәдбирли ермәни идеологлары Азәрбајҹанда сабитлији позмаг үчүн зәрбәни һәссас нөгтәләрдән биринә јөнәлдибләр. Ишғал олунмуш Азәрбајҹан әразисиндән талыш дилиндә радио верилишләринин јајымланмасы талышлары гызышдырыб мин илләр гоһумлуг, достлуг үнсијјәти илә јашамыш, севинҹи, кәдәри бир олмуш түрк гардашлары илә үзбәүз гојмаг, бир-бириндән рәнҹидә салмаг нијјәти ҝүдүр. Мән һәм талыш, һәм Азәри-Талыш Иҹтимаи Бирлијинин сәдри, һәм дә мәмләкәтин әрази бүтөвлүјүнә, дөвләтчилијинә бөјүк һөрмәт вә һәссаслыгла јанашан садә бир Азәрбајҹан вәтәндашы кими ишғал олунмуш Азәрбајҹан әразиләриндән талыш дилиндә һәр һансы радио, телевизија верилишинин јајымланмасынын хош мәрамлы олмасына гәтијјән инанмырам”.
Меһдибәј Сәфәров гејд едир ки, радионун мәһз Шуша шәһәриндән јајымланмасынын сәбәбләри илк бахышда ҝөрүндүјүндән даһа гәлиздир: “Онун ефирә чыхмасы, Талыш дилиндә лајлалар, маһны вә мусигиләр сәсләндирмәси садә Талышын бирбаша тәһтәлшүуруна јөнәлмиш психоложи тәхрибатдыр: “Азәрбајҹанда сәнин ана дилинә заман-заман јасаглар гојурлар, биз исә өз доғма дилиндә сәнә үрәјин вә руһун истәјән чешидли програмлар әрмәған едирик”.
Азәри-Талыш Иҹтимаи Бирлијинин сәдри даһа сонра јазыр ки, башчылыг етдији гурум 14 декабр 2012-ҹи илдә Ләнкәран шәһәриндә фәалијјәт ҝөстәрән ҸТВ-дә талыш дилиндә радио вә телевизија програмларынын јајымланмасы хаһиши илә президент Илһам Әлијевә, Милли Телевизија вә Радио Шурасынын сәдри Нуширәван Мәһәррәмлијә мүраҹиәт едиб: “Мүраҹиәтимиздән 4 аја јахын мүддәт кечмәсинә бахмајараг индијә кими бизә һеч бир рәсми вә ја гејри-рәсми ҹаваб верилмәјиб. Јалныз арада Президент Администрасијасынын сектор мүдири Мүзәффәр Талыблы илә телефон әлагәси гурмаға наил олдуг. Мәлум мәзмунлу мәктубла бағлы зәнҝ етдијимизи ешидән кими гәзәбләнди: “Талышлар нә истәјирләр ахы? Онлара талыш дилиндә данышмаға ким мане олур ки? Нә гәдәр истәјирләр данышсынлар, охујуб-ојнасынлар. Галды радио вә телевизијаја, биз бунлары талышлара вермәрик! Талышлара версәк, онда ҝәрәк Ләзҝиләрә дә, Күрдләрә дә, Татлара да верәк”.
Дедик ки, ај мүәллим, ахы Ләзҝи дә, Күрд дә, Тат да, Авар да ејни илә Азәри Түркләри кими бу өлкәнин өвладлары, вәтәндашларыдыр. Онлар ҝүндә бир нечә саат ана дилләриндә програмлар динләсәләр, верилишләрә бахсалар нә олар, дүнја гара ҝејәр?
Бу да нәтиҹә! Өзү дә әввәлҹәдән асанлыгла прогнозлашдырылан нәтиҹә, сәриштәсизлијин, ҹидди проблемләрә мәсулијјәтсиз јанашманын аҹы нәтиҹәси! Ермәниләр Шушадан “Толышстони сәдо” радиосуну јајымлады!
Биз фәрјад гопарырыг, мүраҹиәт, хаһиш, тәләб едирик ки, мәмурлар тәрәфиндән инсанларын, о ҹүмләдән милли азлыгларын һүгугларына етинасызлыглара сон гојулсун. Биз риҹа, тәвәгге едиб демишик ки, Талышларын компакт јашадыглары реҝионда фәалијјәт ҝөстәрән ТВ вә радио каналлары Талыш дилиндә дә верилишләр јајымласын. Буну садә мәнтиг дејир, буну өлкә конститусијасы, милли азлыгларла бағлы президент фәрманы дејир. Нәһајәт, буну гошулдуғумуз, өһдәлик ҝөтүрдүјүмүз, имза атдығымыз бејнәлхалг конвенсијалар, сазишләр, мүгавиләләр, хартијалар дејир”.
Диггәт: Хәбәрдән истифадә етдикдә мәнбәјә истинад лазымдыр
