Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән сон ҝүнләр гардаш Түркијәнин ПКК проблеминин һәлли истигамәтиндә бөјүк чабалар сәрф етдији ҝөз габағындадыр. Һәтта вәзијјәт о һәддә чатдырылды ки, Түркијә дөвләти күрдләрин лидери Абдуллаһ Өҹаланы бир тәрәф мүгабили сечәрәк онунла ҝизли анлашмаја белә ҝетмәли олдулар.
Елә Өҹаланын Новруз төрәнләриндә тәрәфдашларына үнванладығы ачыгламада силаһларын јерә гојулмасына чағырыш етмәси дә Анкара-ПКК анлашмасынын тәзаһүрү кими гәбул едилди.
Түркијә КИВ-ләринин вердији информасијалардан ајдын олур ки, Түркијәнин баш назири Рәҹәб Тајјиб Әрдоған Түркијә әразисиндәки ПКК-лыларын гардаш өлкәдән чыхарылмасы үчүн данышыглар апарыр вә белә бир мәсәлә Шимали Ирагын күрд рәһбәрлији илә апарылан мүзакирәләрдә дә өнә чыхарылды. Амма ајдын олду ки, күрдләр һеч дә Анкаранын шәртләрини там олараг гәбул етмирләр.
Тәфәррүатлара ҝәлинҹә, бу мәсәләдә рәсми Анкаранын истәји өлкә әразисиндәки бүтүн ПКК гулдурларынын Шимали Ираг әразисинә ҝөндәрилмәсидир. Амма Шимали Ирагын күрд рәһбәрлији буна гаршы чыхараг Әрдоғанла ҝөрүшдә фәргли бир мөвге ортаја гојду. Онлар Ирандан олан ПКК-лыларын Ирана, Суријадан олан ПКК-лыларын Суријаја, Ирагдан олан ПКК-лыларын исә Ирага көчүрүлмәсини тәклиф етдиләр вә һәтта Түркијә вәтәндашы олан ПКК-лыларын әфви илә јанашы, онлара Түркијә ичиндә јашамалары үчүн шәраит јаратмаларыны да истәдиләр.
Тәбии ки, белә бир анлашма рәсми Анкараны разы сала билмәзди вә бу сәбәбдән Шимали Ирагын күрд рәһбәрлији илә апарылан данышыглар демәк олар ки, уғурсуз нәтиҹәләниб.
Бу арада гардаш өлкә мәтбуатында мараглы билҝиләр дә сыздырылыб. Ајдын олур ки, Түркијә әразисиндән чыхарылаҹаг ПКК-ја аид базалардан биринин Азәрбајҹан әразисиндә јерләшдирилмәси нијјәти дә вар. Конкрет олараг Азәрбајҹанын һансы һиссәсинә көч едиләҹәји сөјләнилмәјиб. Һәтта әсас кими дә ҝәтирилиб ки, ПКК-нын Азәрбајҹанда кифајәт гәдәр дәстәкчиси вар вә заман-заман Азәрбајҹан вәтәндашлары да ПКК сыраларында дөјүшүбләр.
Диггәт: Хәбәрдән истифадә етдикдә мәнбәјә истинад лазымдыр
