Әһли Бејт (әлејһимус сәлам) -АБНА- Хәбәр Аҝентлији- Дин алимләри ики гисимдир: бири һәгиги, рәббани алимләрдир, о бири руһанинүма, сарај молласы. Сарај молласы јалныз пул вә рәјасәт сорағынҹадыр. Ону нә тәдрис, нә минбәр, нә моизә, нә тәблиғат марагландырыр. Беләләри үчүн әсас одур ки, имам-ҹамаат олсун. Онлар намаздан сонра бир шәри мәсәлә, һәдис демәјә дә һәвәс ҝөстәрмәз.
Беләләринә руһани демәк дүзҝүн дејил, онлар садәҹә пул газанан фәһләләрдир. Белә руһаниләр Фәһлә Ҝүнү нүмајишчиләрә гатылсалар дүз олар.
Имам-ҹаммаат олмаг нә вахтдан иш сајылыр?! Ким дејир ки, мәсҹиддә имамлыг ишдир?! Сорушурсан ки, ишин нәдир, дәрс кечирсән, моизә едирсән, тәрҹүмә илә мәшғулсан? Ҹаваб верир ки, имам-ҹамаатам!.. Имам-ҹамаат олмаг да ишдир?! Әҝәр намазда габагда дајанмаг ишсә, онда архада намаз гылмаг да ишдир. Онда бу халг нә үчүн ишләмәлидир, елә намазда игтида етмәк иш сајылсын да!
Бәли, ҹамаат намазында өндә дајанмағы иш сајанлар ахундчудур. Ахундчулуг да дәмирчилик, чүпүрҝәчилик кими бир ишдир. Беләләри үчүн мәсҹид газанҹ јеридир. Ислам бу тип руһаниләри гәбул етмир, рәббани алимләри тәсдигләјир. Әҝәр бир инсан Аллаһын дини, Ислам, Әһли-Бејт маарифини јајырса вә бунун кәнарында мадди еһтијаҹы тәмин олунурса ејби јохдур. Амма руһани либасы ҝејинәндә мәгсәд шөһрәт, рәјасәт, пул газанмагдырса вај беләләринин һалына!
Имам Багир (ә) бујурур: “Һәзрәт Пејғәмбәр (с) ләнәтләјиб о инсаны ки, халг дини ишләрдә она еһтијаҹлыдыр, о исә халгдан пул тәләб едир!” Һәзрәт Пејғмбәр (с) бујурур: ”Вај дин васитәсилә дүнја газананларын һалына . Онлар халга гојун либасы бичир, дилләри балдан шириндир. Гәлбләри исә ҹанавар гәлбидир.” Аллаһ-Таала бујурур: “Онлар мәним адымла халгы алдадыр, јохса мәнә гаршы ҹәсарәтлидир?!” Имам Багир бујурур (ә): “Бизим васитәмизлә вә бизим адымызла халгы јесән Аллаһ сәни јохсул вә мөһтаҹ едәр.” Әҝәр ахундчулугдан, сарај моллалығындан әл чәксәк мүшкүлләримиз һәлл олар. Әкс-тәгдирдә мәсҹидләр тиҹарәт назирлијинин табечилијинә кечмәлидир. Мәсҹидләри гејдијјата ҝөтүрсүнләр, верҝи тәјин етсинләр вә мәсҹидин гапысына јазсынлар ки, филан молланын дүканы! Гојмајаг мәсҹдләр дүкана чевирилсин, руһанијјәт ахундчу олсун. Һәзрәт Пејғәмбәр (с) бујурур: “Пис алимләринин әлиндән вај һалына үммәтимин! Бу алимнүмалар елми тиҹарәт, газанҹ васитәсинә чевирибләр.” Бәзи моллалардан сорушанда мәсҹиддә вәзијјәт неҹәдир, додағыны саллајыб ҹаваб верир ки, писдир. Писдир, јәни пул чыхмыр!
Имам Казим (ә) бујурур: “Аллаһ-Таала Һәзрәт Давуда бујурду ки, дүнјапәрәст, пулпәрәст, рәјасәтпәрәст алими мәнимлә өз араларындан ҝөтүрсүнләр. Белә алим халгы Аллаһын зикриндән, ибадәтдән ајырар. Бу алимләр бәндәләримин јолунда јолкәсән гулдурлардыр. Онлара ән кичик ҹәзам будур ки, өз севҝими гәлбләриндән чыхарарам.”
Рәббани алим исә дүнја, пул, мәгам барәдә дүшүнмүр. О, Аллаһын разылығы, Имам-Замана (әҹ) көмәк үчүн чалышыр. Белә алимләр тәдрисдән, минбәрдән ајрылмыр, дин јолунда әлиндән ҝәләни әсирҝәмир. Нүмунә олараг Елм Һөвзәсинин устадларыны ҝөстәрә биләрәм. Онлар әсил руһанидирләр. Ән ашағы сәвијјәдә доланышыглары олдугда диндән пул ҝөтүрмәзләр. Онларын арасында һеч бир тәмәннасыз, еркән сүбһдән тәдрисә мәшғул олан Ајәтуллаһ Зијаабади кимиләри аз дејил.
Бир ҝүн мәрһум Һаҹы Мүгәддәсә минбәрдән сонра 150 түмән пул верирләр. Шејх јүз түмәни ҝери гајтарыб дејир: “Бу мәним доланышығым үчүн бәс едир.” Рәббани алим белә олур, халгын гәпик-гәпик топлајыб тәгдим етдији пула аз демир.
Һәзрәт Пејғмбәрә (с) ики јәһуди һаггында данышдылар. Дедиләр ки, бири халга дин өјрәдир, о бири ҝеҹә-ҝүндүз ибадәтә мәшғулдур. Һәзрәт биринҹи шәхсин даһа фајдалы ишлә мәшғул олдуғуну билдирди.
Инди бәзи пишнамазлар намазы битирән кими мәсҹиддән чыхыр. Мән беләләринә игтида етмирәм. Мәрһум Мүтәһһәридән сорушдум ки, мәним бу адамлара игтида етмәмәјим шејтан вәсвәсәсидир? Бујурду ки, вәсвәсә дејил. Мәрһум Имам Хомејнидән сорушдум ки, белә пишнамазлара игтида етмәк олар? Имам бујурду ки, тәкҹә намазы гылыб ҝедән вә ахырда һагг алан руһанинин алдығы пул һарамдыр!
Кечмишдә рәббани алимләр даһа чох иди. Шејх Мәһәммәд Һүсејнзадә, Һаҹы Шејх Мүртәза Заһид, Ајәтуллаһ Шаһабади, Шејх Әбдүлвәһав Хорасани, Һаҹы Мүгәддәс вә гејриләри.
Еј Руһаниләр! Аллаһдан истәјин ки, сизи рәббаһи алим гәрар версин. Рәббани алим олмаг үчүн әввәлҹә нәфсини тәрбијә етмәлисән. Әҝәр пишнамаз олсан әввәлҹә намазы дүзҝүн гыл. Һүзури-гәлбсиз (гәлбин иштиракы олмадан, гәлбин өлү һалында) меһрабда дајанма.
Диггәт: Хәбәрдән истифадә етдикдә мәнбәјә истинад лазымдыр
