Әһли Бејт -АБНА- хәбәр аҝентлијинин вердији хәбәрә әсасән Јанварын 23-дә ҝеҹә Исмајыллы рајонунда баш верән халг үсјанына мүхтәлиф реаксијалар ҝәлмәкдәдир. Һаггы тапданан, һүгуглары танынмајан инсанларын етиразларыны билдирмәк үчүн күчәләрә чыхмасына ҹәмијјәт бирмәналы олараг һагг газандырыр. Ејни заманда бу рајондан олан зијалылар, танынмыш шәхсләр дә әһалинин һаглы олараг күчәләрә чыхдығыны дејир. Исмајыллыдан олан халг шаири Мусса Јагуб да “Азадлыг”ын суалларына ҹаваб верәркән тәмкини илә сечилән һәмјерлиләринин артыг сәбр касасынын дашдығыны билдирди.
- Исмајыллыда баш верән һадисәләрдән барәдә нә дејә биләрсиниз? Инсанларын үсјана галхмасы нә гәдәр ҝөзләнилән иди?
- Доғрусу, әввәлдән ҝөзләмирдим. Анҹаг һамы о наразылығы һисс едирди. Мән дә һисс едирдим ки, Исмајыллы әһалисиндә үмуми наразылыглар вар. Амма бир мәсәләни дејим. Бизим елимиз-обамыз, орадакы инсанларымыз чох дөзүмлүдүр. Исмајыллы чох мәдәни бир јердир. Дағ адамлары чох сәбирли олурлар. Торпағыны әлиндән алырсан, дөзүр. Чөрәјини әлиндән алырсан, дөзүр. Иш јерини әлиндән алырсан, јенә дә дөзүр. Дејир зәрәр јохдур. Ҝәлмә адамлара һөрмәт едир, онларын етдикләринә дөзүр. Бу, Исмајыллы адамларында бир үмуми характердир. Дејирләр гој ҝөрәк дүнјанын ишләри һансы сәмтә ҝедиб чыхыр. Амма инди бир бәла одур ки, лап иҹра олсун, ја диҝәр рәһбәрликдә оланлар олсун, өмрү боју ајағы Исмајыллыја дәјмәдән бу рајондан газанҹыны да апарыр, адамларыны да тәһгир едир. Амма милләт тәһгирә дөзмүр. Исмајыллыны талајырсыныз, үстәлик, садә инсанлары да сөјүрсүнүз. Губада иҹра башчысы ҹамааты тәһгир етмәсәјди, бәлкә дә о һадисә олмазды. Демәли, милләтимиз доғрудан да маһијјәти олмајан, зәһмәтсиз ҝәлән газанҹлара дөзүр. Анҹаг өзбашыналыға, әхлаг позғунлуғуна дөзә билмир. Өзләринин тәһгир олунмасына дөзә билмир. Ахы нәјә ҝөрә вәзијјәт бу һәддә чатмалыдыр. Чөрәјим сәнин, јемәјим сәнин, газанҹым сәнин, һеч олмаса бунунла әл чәк, тәһгир етмә. Бу мәсәләни исмајыллылар јахшы едир, онлара һагг газандырырам. Ахы бура гәдим јурдду. Нијә иш јерләрини, һотелләри алыб тәрбијәсизликлә мәшғул олурлар. Нә үчүн ахы иҹра башчысы иш јерләри ачмаг, башга ишләр һаггында фикирләшмир, әвәзинә анҹаг өзләринин газанҹы һаггында фикирләшир. Нә тәһәр олур, гардашы назир, өзү орда һазыр. Белә олмаз ахы. Белә ишләр дүзҝүн дејил. Она ҝөрә бу һадисәләрин баш верәҹәјини габагҹадан ҝөзләмәк оларды. Тәәссүфләр олсун ки, мәмурларын ҝөзләрини һансыса думан тутуб, һеч нә ҝөрүнмүрләр. Анҹаг инсан думанын ичиндә дә јеријә билир. Һеч олмаса һисс еләсин, дујсун ки, милләт бунлардан нә вахтса һесаб истәјәҹәк. Милләт галхаҹаг, милләтин гәзәби вар. Һеч вахт инанмырдым ки, исмајыллылар машын јандырсын, һотел јандырсын. Нијә белә олмалыдыр. Јандыранларда ҝүнаһ јохдур. Онлар әхлагсызлыг јувасыны дағыдырлар, ораны ишләдәнләрә дәрс верирләр. Мән билмирәм бунлар бу дәрси баша дүшүр, ја јох.
“Ҹамаат јанғылыды”
- Јәгин бу һадисә бир тәһгирә ҝөрә дејил, илләрди топланмыш етразды. Сиз неҹә дүшүнүрсүнүз?
- Бу гығылҹымды. Алов јанмалыдыр. Неҹә ки, бензин јанмалыдыр, онун маһијјәтиндә бир јанғы вар. Ҹамаат да јанғылыды. Бу, наразылыгдан доған һадисәләрдир. Елә бир тәһгирә ҝөрә дејил.
“Ҝүнаһкар вәзијјәти бу һәддә чатдыранлардады”
- Һеч кимин һәбс олунмајаҹағы илә бағлы вәд верилсә дә, артыг һәбс олунанлар вар. Әслиндә бу һадисәјә ҝөрә ҝүнаһкар кимләрди, кимләр һәбс олунмалыдыр?
- Әслиндә ҝүнаһкар вәзијјәтин бу һәддә чатмасына имкан верәнләрди. Бу шәраити јараданлардыр. Онлар өзләри һәбс олунмалы, ишҝән чыхарылмалыдырлар.
“Өзләри арадан чыхырлар, ҹамаатын гаршысына полис чыхарырлар”
- Рајон рәһбәрлијинин әһалинин гаршысына чыхыб үзр истәмәк әвәзинә күчәләрә полиси, дахили гошунлары чыхармағынын ады нәдир?
- Бунларын маһијјәти будур. Әввәлдән дә белә олуб. Өзләри гачыб арадан чыхырлар, ҹамаатын гаршысына полис, силаһ чыхарырлар. Бу дүзҝүн дејил ахы. Нә вахта гәдәр силаһ дили илә, ҝүҹ дили илә, ҝүллә дили илә данышаҹаглар. Нә олар, бир дәфә дә өзләри етираф етсинләр. Бир дәфә дә ағсаггал дәвәт етсинләр. Десинләр ај ҹамаат, бу иши ҝөрмүшүк, пис еләмишик, баҹармамышыг, сизин фикриниз нәдир. Бир ҹамаатын, милләтин фикрини, онларын нә дүшүндүјүнү өјрәнмәк лазымдыр. Ҝәрәк дөјүлә, сөјүлә, вурула, дағыдыла, сындырыла, јандырыла, сонра бунлар баша дүшсүнләр. Әлбәттә, мәсәләни өзләри һәлл етсә јахшыдыр.
“Һакимијјәт өзүнү ислаһ етмәлидир”
- Тәкҹә јанвар ајында бу артыг үчүнҹү етираз аксијасыдыр. Бундан сонра ҝөзләнтиләриниз нәдән ибарәтдир вә рәсмиләрә сөзүнүз нәдир?
- Бәзи ҝөзләнтиләр ола биләр. Һакимијјәтә сөзүм одур ки, милләтин сәсини ешитсинләр, дәрдини ҝөрсүнләр. Билсинләр ки, бу наразылыг нәдәндир. Ислаһатдан данышырлар. Ҹамааты ислаһ етмәк јох, өзләрини, ишләрини ислаһ етмәлидирләр ки, милләт бу һала дүшмәсин. Јүз дәфәләрлә дејилиб, “Азадлыг” гәзети, диҝәр гәзетләр дә јазыр, мәмурлара сөзүнү дејир ки, бу гәдәр олмаз, дајанын. Дајансынлар вә милләтин хејри үчүн бир иш ҝөрсүнләр. Бәсдир полис дили илә, ҝүллә дили илә, һәдә дили илә, биҝанәлик дили илә милләтлә данышдылар. Бу милләт буна лајиг олан милләт дејил, чох ағыллы милләтди. Дағ адамларымыз да пис һәрәкәт едән дејилләр. Фикирләшсинләр, папаглары варса, гојсунлар габагларына бир даһа фикирләшсинләр.
- Бу ҝедишлә просесләр һара ҝедир?
- Мәним бир шеирим вар, “Бу тыхһатых һара ҝедир?”, о шеири дејим. Бу суала ҹавабдыр.
Бу мәнҝәнә киминкиди,
Бу сыхһасых һара ҝедир?
Рәјасәтләр күрсүсүнә
Бу чыхһачых һара ҝедир?
Шаһ дөврүндән,
хан дөврүндән
Бу јыхһајых һара ҝедир?
Саһибкарлар јарышында
Бу јығһајығ һара ҝедир?
Ҝөдәнчиләр һесаб јејир,
Бу тыхһатых һара ҝедир?
Ҝәлән нәсил борҹ ичиндә,
Бир аз галыг һара ҝедир?
Балиналар дәрјалары
бөлүб дуруб,
Чајда балыг
һара ҝедир?
Јерин үстү һасар-һасар,
Јерин алты буруг-буруг,
Пај ичиндә пајы јохса,
Чобан-чолуг һара ҝедир?
Аман милләт, аман милләт
Түлкүсү бир,
гурду ганыг һара ҝедир?
Ағ шаирләр, вар шаирләр
Дили кәсик,
бағры јаныг һара ҝедир?
“Игтидар бу ишләрин һара ҝетдији дүшүнмәлидир”
- Һәр ҝүн рәсми мәтбуатда Зијалылар Форумуна, хүсусилә дә Рүстәм Ибраһимбәјова, диҝәрләр зијалылара, о ҹүмләдән Сизә гаршы тәһгир кампанијасы ҝедир. Буна мүнасибәтиниз неҹәдир?
- Мән дә Зијалылар Форумунун үзвүјәм. Ајрылыгда гурумла бағлы нәјисә ачыглаја билмәрәм. Бизим дә планларымыз, ишимиз вар. Анҹаг биз сијасәтә гошулмајан иддиасыз адамларыг. Биз анҹаг милләтин јахшылығыны истәјирик. Истәјирик ки, сечки әдаләтли кечсин. Мән Шимали Киприн азадлығынын 25 иллији илә бағлы мәрасимдә иштирак етмишәм. Онлар өз азадлыг ҝүнләрини елә мөһтәшәм кечирди ки, мәним ҝөзләрим јашарды. Бәс јахшы, биздә дә бир инам олмалыдыр ки, филан бајрамымызы бирликдә, хош үрәклә кечирәк. Инди бири бәјәнир, бири бәјәнмир, һәрә бир сөз дејир. Нәјә ҝөрә бу милләтин өз дүшүнҹәси илә, сәрбәст сәс вермәјә, фикрини ифадә етмәјә бурахмырлар. Бир ҝөрәк һәлә бизим милләт сәс верә, кимисә сечә билирми. Нә гәдәр тәзјиг
