Әһли Бејт (әлејһис сәлам) - АБНА - Хәбәр Аҝентлијинин вердији хәбәрә әсасән Азәрбајҹанын Иран Ислам Республикасындакы сәфири Ҹаваншир Ахундов ИИР вә Азәрбајҹан Республикасы арасындакы мүнасибәтләрә тохунараг дејиб: “Бу ҝүн дүнјада Иран вә Азәрбајҹан Республикасы кими мәдәнијјәт, дин, адәт-әнәнә, тарих, һәтта ҹоғрафи бахымдан бир-биринә јахын олан һансыса ики өлкә тапмаг мүмкүн дејил. Иран әһалисинин бөјүк бир һиссәси түркдиллидир. Бу да бизим ортаглыгларымызын һансы һәддә олмасыны ҝөстәрир”.
Сәфир, Гарабағ мүнагишәсинин һәлли мөвзусундан да сөз ачараг дејиб: "Гарабағ Азәрбајҹанын әзәли вә әбәди торпағыдыр. Мәним нәзәримҹә, һәгигәтдә Гарабағ Ислам дүнјасынын торпагларыдыр. Ишғалчыларын бу әразидән чыхмасына даир БМТ тәрәфиндән индијә кими дөрт гәтнамә гәбул едилмишдир. "Гошулмама Һәрәкатынын" Теһрандакы иҹласында да Гарабағ бир даһа Азәрбајҹан Республикасынын әразиси кими тәсдигләнди. Бу мәсәлә Иранда тәсдигләндији үчүн бизим үчүн чох өнәмлидир".
"Бу ҝүнләри ордумуз Гарабағы ишғалдан азад етмәк гүдрәтинә маликдир. Артыг бизим һәрби сәнајемиз вардыр вә өлкәмизин иллик һәрби бүдҹәси 3,5 милјард доллар һәҹминдәдир. Биз торпагларымызы мүһарибә јолу илә азад едә билдијимиз һалда ган төкүлмәсинин гаршысыны алмаг үчүн дипломатик јолларла мүнагишәнин һәлли јолларына даһа чох үстүнлүк веририк"- дејә, сәфир билдириб.
Минск групунун сәјләрини нәтиҹәсиз галдығыны билдирән сәфир, БМТ-дән ишғалчыларын гәтнамәјә табе олмаларынын мәҹбур едилмәсини истәдикләрини дә гејд едиб.
О, Иранын Гарабағ мүнагишәсинин һәлли игтигамәтиндәки ролу барәдә дејиб: "Ирана тәзә ҝәлдијим вахт Иран тәрәфи мәсәләнин һәлли исигамәтиндә бирҝә иҹлас кечирмәк фикриндә олдугларыны билдирди. Мән дә бу мәсәләни Бакыја чатдырдым. Өлкәмиз буна һазыр олдуғуну билдирди. Лакин ермәни тәрәфи гәбул етмәди".
Азәрбајҹанын сәфири ики өлкә мәтбуаты арасындакы ҝәрҝинлијә дә ишарә едәрәк дејиб: "Иранда да бизим өлкәмизәдә олдуғу кими мүхтәлиф фикирли груплар вардыр. Мән дәфәләрлә билдирмишәм вә инди дә дејирәм ки, мәтбуатдан сорушаҹағыныз суалы мәндән сорушун. Бурада билдирирәм ки, өлкәмизәдә 20 ил мүддәтиндә 2000 мәсҹид тикилиб, совет һөкумәтинин дөврүндә дағыдылмыш бир чох имамзадәләрин гәбри тәмир едилиб".
Ҹ. Ахундов Азәрбајҹанын Исраил вә АБШ-дан алдығы силаһла бағлы белә дејиб: "Бизим мүхтәлиф өлкәләрлә әлагәләримиз вардыр вә силаһ да ҝәтиририк. Өлкәмизин торпагларынын бир һиссәси ишғал едилмишдир. Биз ону азад етмәјә чалышырыг. Бејнәлхалг ганунлара әсасән, әразиләри ишғал олунмуш һәр бир өлкәнин ону азад етмәк һаггы вардыр. Мән бу мөвзу әтрафында мәтбуатда јајылан хәбәрләри дә тәкзиб едирәм вә билдирирәм ки, биз Ирана достлуг сәдагәтимизи дәфәләрлә нүмајиш етдиримишик. Мүдафиә назиримиз дә Теһрана сон сәфәриндә өз нәзәрини ачыглады. Бизим Исраилдә сәфирлијимиз јохдур. Азәрбајҹанда Фәләстинин сәфирлији дә ачылмышдыр".
Азәрбајҹанын Ирандакы сәфири даһа сонра дејиб: "Биз Бакыда јүксәк ҝүҹү вә имканлары олан јени лиман вә емал заводу тикмәк нијјәтиндәјик. Иранын да бу имканлардан истифадә етмәсини истәјирик. Мән бу ики өлкә мүнасибәтләринин ишыглы ҝәләҹәји олаҹағыны дүшүнүрәм".
Диггәт: Хәбәрдән истифадә етдикдә мәнбәјә истинад лазымдыр
