Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасы (АИП) Салјан Рајон Тәшкилатынын конфрансы вә гурумун Ҹәнуб бөлҝәси үзрә комитә рәһбәрләринин мүшавирәси кечирилди.
АИП-ин рәсми сајты Исламинсеси.аз-ын вердији мәлумата ҝөрә, нојабр ајынын 10-да АИП Иҹра апараты мәсулларынын Ҹәнуб бөлҝәсинә сәфәри олду. Сәфәрдә мәгсәд гурумун Салјан Рајон Комитәсинин конфрансынын кечирилмәси вә Ҹәнуб бөлҝәси үзрә Партијанын Координасија Шурасынын тәсис едилмәси илә јанашы әлагәләндириҹинин тәјин вә тәгдим олунмасы иди.
Мәлум олдуғу кими, АИП Салјан Рајон Комитәсинин сәдрлик сәлаһијјәтләрини бир илдән артыг иди ки, Мурад Абдуллајев јеринә јетирирди. Конфрансы ҝириш сөзү илә ачан М. Абдуллајев өнҹә конфрансын тәшкилат комитәсинин мәлуматыны топланты иштиракчыларына чатдырды. Гејд олунду ки, конфранс үзвләри ханымлар да нәзәрә алынмагла 102 нәфәрдән ибарәтдир. Онларын 15 нәфәри зијарәт сәфәрләриндә олдугларына ҝөрә конфрансда иштирак едә билмирләр. Јетмиш ики конфранс үзвүнүн иштирак етдији топланты ишинә башлады. Конфранса сәдрлик едән М.Абдуллајев өнҹә конфранс иштиракчыларына гонаглары тәгдим етди. Вә сонра да ҝүндәликдә дуран мәсәләләри һамынын диггәтинә чатдырды.
Мурад Абдуллајев әввәлҹә гурума рәһбәрлик сәлаһијјәтләрини јеринә јетирдији өтән мүддәт әрзиндә һәјата кечирдији ишләр, тәдбирләр, Исламчыларын, о ҹүмләдән Салјан рајон тәшкилаты үзвләринин өлкәнин иҹтимаи-сијаси һәјатында баш верән һадисәләрә мүнасибәти вә әмәли тәдбирләри барәдә гыса мәлумат верди. О, бу јолда гаршыја чыхан чәтинликләрдән, һабелә Исламчыларын шәрләнәрәк һәбс олунмаларындан данышды вә билдирди ки, бүтүн бунлара, валидејнләримизин һаггымызда кечирдикләри нараһатлыглара, мәнәви сарсынтылара бахмајараг һагг вә дүз јол тутдугларына инаныр, онлары да буна әмин едирләр. М.Абдуллајев “Анама дедим ки, мәни дә диҝәр исламчылар кими һәр ан шәрләјиб һәбс едә биләрләр. О заман кечирәҹәјин сарсынты вә мәнәви әзаблара ҝөрә индидән сәндән һалаллыг истәјирәм, мәнә бу јолда сәнин хејир-дуан кифајәтдир ки, Аллаһ бизә јардымчы олсун”-дејиб, мәрһум анасы илә вахтилә бөлүшдүјү фикирләри ачыглады.
Конфранс үзвләри ҝүндәликдә дуран бүтүн мәсәләләри мүзакирә едәрәк конкрет гәрарлар гәбул етдиләр. Онлар Мурад Абдуллајевә етимад ҝөстәрәрәк ону јенидән АИП Салјан Рајон Комитәсинин сәдри сечдиләр. Топлантыда һәмчинин үч нәфәрдән ибарәт Нәзарәт Тәфтиш Комиссијасынын үзвү, АИП-ин нөвбәти гурултајына он нәфәрдән ибарәт нүмајәндә сечиләрәк тәсдиг олунду, гадынлар шурасынын сәдри тәјин олунду вә фәалијјәтинин даһа да ҝүҹләндирилмәси АИП Гадынлар Шурасынын сәдри Нөврәстә Ибраһимова тәрәфиндән төвсијјә олунду.
Конфранс иштиракчылары топлантынын сонунда гурумун бәјанатыны гәбул етдиләр. Бәјанатда һакимијјәтдән наһаг јерә һәбс олунмуш АИП сәдри Мөвсүм Сәмәдовун, диҝәр ҝүнаһсыз руһани вә партија тәәссүбкешләринин тезликлә азадлыға бурахылмасыны тәләб етдикләри өз әксини тапды.
Конфрансда АИП сәдринин биринҹи мүавини И.Әһәдли, МНТК сәдри Ф.Нәбизадә, сәдрин сијаси мәсәләләр үзрә мүавини А.Һејдәрли, тәшкилат мәсәләләри үзрә сәдр мүавини Р.Әһмәдли, гурумун гадынлар шурасынын сәдри Н.Ибраһимова, Һәбс Олунмуш Исламчыларын Һүгугларынын Мүдафиә Комитәсинин сәдри Н.Кәримов иштирак етдиләр.
Елә һәмин ҝүн АИП-ин зона мүшавирәси кечирилди. Мүшавирәдә гурумун Ҹәнуб Бөлҝәси Координасија Шурасы тәсис олунду. Мүшавирәјә АИП Астара, Ләнкәран, Биләсувар, Нефтчала, Салјан, Јардымлы вә Ҹәлилабад рајон комитә сәдрләри дәвәт олунмушдулар. Мүзакирәләрдән сонра гурумун Ҹәнуб бөлҝәси үзрә әлагәләндириҹиси комитә сәдрләринә тәгдим олунду. АИП рәһбәрлијинин тәјин етдији, етимад ҝөстәрдији, бундан әввәл гурумун Ҹәлилабад Рајон Комитәсинә рәһбәрлик едән Тәјјар Әлијев мүшавирә иштиракчыларына АИП Ҹәнуб Бөлҝәси Үзрә Коорданасија Шурасынын сәдри кими тәгдим олунду. Мүшавирә иштиракчылары гаршыдан ҝәлән президент сечкиләри, вәзифәләр, перспективләр һагда данышараг мүзакирәләр апардылар.
Бунунла да мүшавирә ишини јекунлашдырды.
Диггәт: Хәбәрдән истифадә етдикдә мәнбәјә истинад лазымдыр
