Әһли Бејт -АБНА- хәбәр аҝентлији- Зилһиҹҹә ајында нәфсини сафлашдыран, төвбә вә бағышланма диләјән, Аллаһын дәрҝаһына үз тутан, рәһмәт вә бәрәкәт истәјән инсанлар үчүн һәгигәтдә бир фөвгәл имканлар вардыр. Инсанлара Аллаһ-Таала фөвгәл имканлар танымышды бу ајда ки, онлар Һәҹҹ зијарәтинин бәрәкәтиндән фајдалансынлар, мүбарәк ајын илк 9 ҝүнүнү оруҹ тутсунлар, Гурбан бајрамында гурбанлар кәсиб Онун (Аллаһ-Тааланын) јолунда имкансыз, фәгир кимсәләрә пајласынлар вә һәмчинин, Гәдири-Хум бајрамыны гејд едиб һәмин ҝүнүн әмәлләрини јеринә јетирсинләр.
Амма, бурада бир мәгам да, вар вә о да, будур ки, бу мүбарәк ајын әламәтдарлыглары тәкҹә Һәҹҹ зијарәти, Гурбанлыг, Гәдири-Хум бајрамлары илә мәһдудлашмыр. Доғрудур ки, чохлары тәрәфиндән белә билинир ки, бу ај Һәҹҹ ајыдыр, ики бајрам – Гурбанлыг вә Гәдири-Хум бајрамлары вар бу ајда, Гурбан бајрамынадәк оруҹ тутмаг мүстәһәбдир бу ајда, Гәдири-Хум бајрамынын ичиндә ибадәтләр вар вә һәм дә, бу ајын мүәјјән ҝүнләриндә мүәјјән әмәлләр вар ки, онлары јеринә јетирмәјин савабы вар. Амма, бу ајда саир әламәтдар вә тарихи һадисәләрин дә баш вердијини билмәк бир мүсәлман олараг вәзифәмиздир. Хүсусилә, бу һадисәләрин Пејғәмбәр (с) аиләсинин мүбарәк әмәл вә рәфтары илә бирбаша бағлантысы олдугда, онлары өјрәнмәмәк, арашдырмамаг зәрәринә олур инсанын. Чүнки елә бир кәс тапмаг олмаз ки, Пејғәмбәр (с) аиләсинин рәфтар вә әмәлләри, она (һәмин кәсә) јол ҝөстәрмәсин, она ибрәт олмасын!
Мәсәлән, дини мәтнләрдә гејд олунмушдур ки, бу ајын 24-ҹү ҝүнү, бир диләнчи Пејғәмбәр мәсҹидинә дахил олуб орадакыларын она јардым етмәсини истәјир. Һеч ким јардым етмәдији һалда, Әли (ә) намазда руку һалында икән бармағындакы үзүјү һәмин еһтијаҹлы кимсәјә верир. Әлбәттә ки, мәшһур тарихи һадисәдир бу. Һәтта, Һәзрәтин (ә) фәзиләтләриндән биридир бу. Һәзрәтин (ә) үстүнлүкләриндән данышаркән, бу һадисә дәлил ҝәтирилир. Гуранда да бу һагда ајә вар. Маидә сурәсинин 55-ҹи ајәсиндә бујурулур: "Сизин рәһбәриниз јалныз Аллаһ, Онун пејғәмбәри вә намазы бәрпа едиб рүку һалында зәкат верән мөминләрдир."
Һәмчинин, һәмин ҝүн вә ја Зилһиҹҹә ајынын 25-и Инсан сурәсинин ендирилдији ҝүндүр. Мәлум сурәнин 5-22 ајәләри Әһли-бејтдән (ә) бәһс едир. Бу она ҝөрә ендирилмишдир ки, Әһли-Бејт (ә) өз тәамыны бир ҝүн мискинә, бир ҝүн јетимә вә нөвбәти ҝүн әсирә вермиш вә өзләри һәмин ҝүнләрдә оруҹ тутмуш, су илә ифтар етмишләр. Һәм дә, өзләри еһтијаҹлы олдуглары һалда. Бу ајәләрин бириндә бу ибрәтлик сәһнә белә ишыгландырылыр: "Онлар өз иштаһалары чәкдији (өзләри јемәк истәдикләри) һалда (вә ја: Аллаһ ризасыны газанмаг уғрунда) јемәји јохсула, јетимә вә әсирә једирәрләр.". (Инсан сурәси, 8) Заһирән бу һадисәләр ади ҝөрүнә биләр. Әл тутмағын бир нөвү, сәдәгә вермәнин бир үсулу һесаб едилә биләр. Амма, белә дејил!
Әввәлән, билмәк лазымдыр ки, бу әмәлләр инсанлары Аллаһ јолунда инфаг етмәјә чағырыр, Аллаһ үчүн сәдәгә вермәјә дәвәт едир, имканлары Аллаһ јолунда сәрф етмәји өјрәдир инсанлара. Инсанын паклығыдыр бу, ихлас - халислик вар бу әмәлдә. Нәфсә гаршы ҹиһад вә бу ҹиһадда галиб ҝәлмәклик вар бу әмәлдә. Дүнја малыны бир бүтә чевирән кимсәләрә дәрс верир, заһидлик тәгдим едир, зөһдү инсанлара ҝөстәрир Әһли-бејт (ә). Бу кифајәтдир һәмин ҝүнүн әламәтдарлығына ки, Гуран бәһс етмишдир бу һагда. Гуран анлатмышдыр бу һадисәләри вә инсанлар өрнәк ҝөтүрмәлидирләр өзләри үчүн. Әһли-бејтин (ә) шәнинә Аллаһ-Тәаланын ендирдији бу вә диҝәр ајәләр Пејғәмбәр (с) аиләсинин үстүнлүкләриндән, фәзиләтләриндән, Аллаһ дәрҝаһындакы мәгамындан, мөминләрә бир өрнәк, бир үлҝү олмасындан сөз ачыр.
Һаггын батилә галиб ҝәлдији ҝүн
Бу ајын мүбарәк ҝүнләриндән бири дә, Мүбаһилә ҝүнүдүр. Ајын 24-ҹү ҝүнүдүр бу ҝүн. Бу бәһсимиздә биз мәһз һәмин ҝүн һаггында данышаҹағыг. Чүнки бу ҝүн бир нечә ҹәһәтдән диҝәр ҝүнләрдән үстүнлүјә маликдир. Белә ки, диҝәр ҝүнләр Әһли-бејтин (ә) фәдакарлығы, ихласы, тәгвасы, фәзиләти илә бағлыдырса, Мүбаһилә ҝүнү һәм дә, әлавә олараг, Исламын гәләбәси илә сәҹијјәлидир вә әламәтдарлыг тапыр.
Бу ҝүн Ислам дүнјасында һәгигәтән әламәтдар, мүбарәк бир ҝүндүр. Һәр бир мүсәлман бу ҝүнү билмәли, бу ҝүндә баш верән һадисәдән хәбәрдар олмалыдыр. Чүнки мүсәлманлар кафирләр үзәриндә галибијјәт әлдә етмишдиләр бу ҝүн. Исламын һагг дин олдуғу, Пејғәмбәрин (с) һагг олараг ҝөндәрилдији бир даһа һәм мүсәлманлара вә һәм дә, Нәҹран мәсиһиләринә сүбут олунмушду бу ҝүн.
Бу ҝүн, һәм дә, Пејғәмбәр (с) Әһли-бејтинин (ә) кимләрдән ибарәт олдуғу ашкарланды бир даһа. Онларын (Әһли-бејтин (ә)) мүбарәклији, үстүнлүјү, мәгам вә мәнзиләти, иманы, Пејғәмбәрдән (с) сонра рәһбәрлијә онларын лајиг олдуғу бир даһа ашкарланды. Һәмчинин, Гуранда бир ајә вардыр ки, бу ҝүнү хатырладыр, бу ҝүнүн һадисәсини хатырладыр, Исламын, Пејғәмбәрин (с), Әһли-бејтин (ә) һагг олдуғуну тәсдигләјир.
Пејғәмбәр(с) вә Нәҹран мәсиһиләри
Һәмин ајә Али-Имран сурәсинин 61-ҹи ајәсидир ки, бу ајәни зикр етмәздән әввәл, зәруридир ки, бу ҝүндә һансы һадисәнин баш вердијини нәзәрдән кечирәк. Тарихдә гејд олунур ки, һиҹри 10-ҹу илдә, Һәзрәт Пејғәмбәрлә (с) мүбаһисә етмәк үчүн, Нәҹран мәсиһиләри өз бөјүкләриндән вә алимләриндән ибарәт бир һејәти Мәдинәјә ҝөндәрир. Бу һејәт Һәзрәтлә (с) мүбаһисә едир вә тутарлы дәлилләрлә, ашкар һөҹҹәтләрлә үзләшмәләринә рәғмән, јенә дә, Исламын һагг дин олдуғуну, Пејғәмбәр (с) пејғәмбәрлијини гәбул етмирдиләр. Һәзрәт Исанын (ә) Аллаһын оғлу дејил, бир пејғәмбәр олдуғуну гәбул етмирдиләр. Нәһајәт, ајә назил олур Пејғәмбәрә (с): "(Исанын һаггында) сәнә ҝөндәрилән елмдән сонра, (јенә дә) сәнинлә мүбаһисә едәнләр олса, онлара де ки: "ҝәлин биз дә оғланларымызы, сиз дә оғланларынызы, биз дә гадынларымызы, сиз дә гадынларынызы, биз дә өзүмүзү, сиз дә өзүнүзү чағыраг! Сонра мүбаһилә (гарғыш) едиб јаланчылара Аллаһын ләнәт етмәсини истәјәк!". (Али-Имран сурәсу, 61)
Пејғәмбәр (с) бу тәклифи мәсиһиләрә вердикдә, онлар мөһләт истәдиләр Пејғәмбәрдән (с) ки, бу һагда бир гәдәр фикирләшсинләр. Беләликлә дә, онлар бу гәрара ҝәлдиләр ки, әҝәр, Пејғәмбәр бир орду илә ҝәлсә, демәли, дедикләри әсассыз вә һәгигәтәујғун дејил! Јох әҝәр, аз сајда инсанла ҝәлсә, о Һәзрәтлә (с) мүбаһиләдән чәкинсинләр. Вә онлар ҝөрдүләр ки, тәјин олунмуш вахтда мүбаһилә мәһәллинә Һәзрәт Пејғәмбәр (с) ики ушагла, бир ҝәнҹлә вә бир гадынла ҝәлир. Һәр ики мәзһәбин алимләри билдирирләр ки, ајәдәки "оғланларымыз" кәлмәсиндән мәгсәд Һәсән (ә) вә Һусејн (ә), "гадынларымыз" кәлмәсиндән мәгсәд Ханым Фатимеји-Зәһра (с.ә.), Пејғәмбәрин (с) өзү кими тәгдим едилән шәхс исә – Һәзрәт Әлидир (ә). Јәни, Нәбијји-Әкрәм (с) бу мүбарәк инсанлары өзүјлә мүбаһилә етмәјә - кафирләри нифрин етмәјә апармышдыр.
Динин тәмсилчиләр
Һәр ики мәзһәбин алимләри иттифаг етмишләр бу мәсәлә үзәриндә ки, һәгигәтән дә, Пејғәмбәрлә (с) мүбаһиләјә ҝедәнләр Әли (ә), Фатимә (с.ә), Һәсән (ә) вә Һусејн (ә) олмушдур. Бунлар һәмин инсанлардыр ки, "Тәтһир" ајәси онларын һаггында ениб вә Пејғәмбәр (с) бу инсанлары өз әбасы алтына алараг "Аллаһым, бунлар мәним Әһли-Бејтимдир" бујурмушдур. Вәһј бу инсанларын евинә назил олмушдур. "Тәтһир" ајәсинин чатдырышына әсасән, һәр нөв ҝүнаһ вә хәтадан пак инсанлардыр бунлар.
Һәзрәт Әли (ә) һаггында бир инҹәлијә диггәт јетирәк. Ислами дөјүшләрдә Әлинин (ә) ҝүҹү, шүҹаәти, фәдаилији, мәғлубедилмәзлији Ислам тарихиндә мәшһурдур. Әмр ибни Әбдүвәди, Мәрһәби, Һариси ҹәһәннәмә васил етмишди Һәзрәт Әли (ә). Ҹиһадлардакы наилијјәтләри дилләрдә әзбәр олмуш Әли (ә), кафирләрин ордусу илә мүбаһилә етмәк үчүн ҝәлмәјә биләрдими?! Ҝүҹлү иманы, вәсфәсығмаз тәгвасы, бу сәфәр Әлини (ә) гылынҹсыз, ҝәтирмишди дөјүшә.
Бир вахт мәлум сәбәбләр үзүндән Исламын хиласы үчүн сүлһүн зәрури олдуғуну ҝөрүб дүшмәнлә бәзи шәртләр әсасында сазиш бағлајаҹаг шәхс – Имам Һәсән (ә) һәмин ҝүн 7 јашында, 50 ил сонра Исламын дирчәлиши үчүн, зүлмә бојун әјмәјиб етираз сәсини уҹалдан, сонракы нәсилләр үчүн мәктәб гојуб ҝедән, фәдаиләрини, 6 ајлыг көрпәсини вә өз ҹаныны Аллаһ јолунда гурбан верән Һусејн (ә) исә 6 јашында иди. Онлар Ислам динини тәмсил едирдиләр. Мүбарәк динин тәмсилчиләри идиләр. Аллаһын ордусуну тәшкил едән 5 кимсәдән икиси идиләр.
Һалбуки, Пејғәмбәрдән (с) сонра гәдри билинмәди бу инсанларын, саһиб чыхмадылар, еһтирамыны горумадылар бу инсанларын. Лајиг олмајанлар вәзифә вә мәгам иддиасы етдиләр. Һаггы тапдаланды, зүлм едилди Әһли-бејтә (ә). Аллаһын ордусунун гүдрәти олан Әһли-Бејтә (ә). Мүбаһилә ҝүнүнүн гәһрәманлары олан Әһли-бејтә (ә). Һансы ки, Әли (ә) Пејғәмбәрин (с) өзү кими гәләмә верилир бу ајәдә. Һәсән (ә) вә Һусејн (ә) ҹәннәт ҹаванларынын ағасыдыр. Фатимә (с.ә.) ҹәннәт ханымларынын ән үстүнү, дүнја ханымларынын ән фәзиләтлисидир. Бир мәгама саһибдирләр ки, онлары инҹидәнләр Пејғәмбәри (с), Пејғәмбәри дә, инҹидәнләр Аллаһы инҹитмиш сајылырлар.
Нәҹранлыларын етирафлары
Бу инсанларын үстүнлүкләрини, јүксәк мәгамларыны, Аллаһа олан бағлылыгларыны биз Нәҹран мәсиһиләринин дилиндән дә ешидирик. Мүхалифләр етираф едир Әһли-Бејтин (ә) әзәмәтини, мәгамыны. Илк өнҹә Пејғәмбәрин (с) мүбарәк кәламына диггәт е
