Әһли Бејт -АБНА- хәбәр аҝентлијинин вердији хәбәрә әсасән бу ҝүн Азәрбајҹан Ислам Партијасынын нөвбәти Баш Мәҹлиси кечирилмишдир. Баш Мәҹлисин ҝүндәлијинә әсасән ашағыдакы мәсәләләр дахил едилмишдир:
- Өлкәдә иҹтимаи-сијаси вәзијјәт;
- Өлкәнин Ганунвериҹилик Һакимијјәтиндә инсан һагларына вә Конститусијаја зидд ганунларын гәбул едилмәси;
- Гаршыдан ҝәлән 2013-ҹү ил президент сечкиси вә АИП-ин бу сечкидә мөвгеји;
- Тәшкилати мәсәлә вә ҹари мәсәләләр.
Баш Мәҹлиси АИП сәдринин биринҹи мүавини Ингилаб Әһәдли ачараг илк нөвбәдә топланты иштиракчыларыны, Баш Мәҹлис адындан халгымызы, бүтүн мүсәлманлары Гәдир-Хум бајрамы мүнасибәтилә тәбрик етмишдир. О, һәмчинин АИП сәдри һаҹы Мөвсүм Сәмәдов вә партијанын сәдр әвәзи Елчин Манафовун салам вә тәбрикини мәҹлис иштиракчыларына чатдырмышдыр.
Ҝүндәликдә дуран мәсәләләр барәдә АИП сәдринин сијаси мәсәләләр үзрә мүавини Акиф Һејдәрли чыхыш едәрәк ҝениш мәлумат вермиш, өлкәдә баш верән сон һадисәләр бахымындан һакимијјәтин иҹра вә ганунвериҹилик органларында дөвләтчилијә зидд аддымларын атылмасыны, хүсусән “Сәрбәст топлашмаг һаггында” гануна мүртәҹе дәјишикликләр вә әлавәләрин Милли Мәҹлисдә гәбул олунмасыны кәскин тәнгид едәрәк партијанын буна ҝөрә етираз бәјанатыны гәбул етмәји тәклиф етмишдир.
Акиф Һејдәрли һәмчинин гаршыдан ҝәлән 2013-ҹү ил президент сечкиләриндә намизәд мәсәләсини мүзакирә едәрәк конкрет гәрар гәбул етмәји, лазым ҝәләрсә, әдаләтли ҹәмијјәт, демократик дөвләт, азад инсан, ән башлыҹасы исә һакимијјәт вә ҹәмијјәт арасында мүнасибәтин милли вә ислами дәјәрләрлә тәнзимләнмәси принсипләри приоритет кими гәбул едилмәси шәртилә ән лајигли намизәди дәстәкләмәк фикрини ирәли сүрмүшдүр.
Бир сыра рајон комитә сәдрләри фәалијјәт шәраитинин јахшылашдырылмасы тәклифини ирәли сүрдү. Ингилаб Әһәдли бу мәсәләләри үзвлүк һагларынын топланмасы васитәсилә һәлл етмәјин ваҹиблијини билдирди.
Баш Мәҹлис тәшкилат мәсәләсинә дә бахды. Һаҹы Рөвшән Әһмәдли Азәрбајҹан Ислам Партријасы сәдринин тәшкилат мәсәләләри үзрә мүавини тәјин вә тәсдиг олунду.
Рөвшән Әһмәдли чыхыш едәрәк ҝүндәликдә дуран мәсәләләр барәдә фикирләрини билдирди.
Диггәт: Хәбәрдән истифадә етдикдә мәнбәјә истинад лазымдыр
