Охуҹулар билирләр, мән һәләм-һәләм өз јухуларымы гәзетә јазан дејиләм. Хошламырам бу үслубу. Адама дејәрләр мәнә нә галыб сән јухуда нә ҝөрүрсән? Она галса бу саат милләтин һамысы јуху ҝөрүр, дуруб данышсалар, өз јухуларыны јазмаг үзрә ҝөркәмли мүтәхәссисләримиздән олан јазычы Әкрәм Әјлисли истефа верәр, Гончаров “Обломов”у ҹырыб атар, Иммануил Босх рәсмләриндән имтина едәр. Анҹаг дүнән ҝеҹә елә әҹаиб јуху ҝөрмүшәм ки, буну мүтләг јазмаг гәрарына ҝәлдим. Бәлкә кимсә инанмајаҹаг, буну ујдурма, фантазија сајаҹаг, анҹаг анд олсун јуху аллаһы Морфејин ганадларына, бу јухуну мән ҝерчәкдән ҝөрмүшәм.
Демәк, ҝөрүрәм чајханаја охшар бир мәканда журналист һәмкарым Шаһвәләд Чобаноғлу илә әјләшиб камали-әдәблә (Дилчилик Институтунун тәклифи илә бу ифадә јахын ҝәләҹәкдә “камали-жалә илә” шәклиндә ишләнәҹәкдир) чај ичирик, өзү дә зоғал мүрәббәси илә. Һәрәмизин дә әлимиздә бир гәзет вар, доғрусу, гәзетин адыны јахшы ҝөрә билмәдим, үзүрлү сајын. Ҝәлән дәфә чалышарам бахым ҝөрүм нә гәзетидир. Узун сөзүн гысасы, чајдан һортдада-һортдада мүталиә еләдијимиз мәгамда бир дәстә полис јахынлашыр, дејирләр ки, сиз бурда гануну позурсунуз. Сорушуруг һансы гануну, полис дејир: “Азәрбајҹанда зоғал мүрәббәси илә чај ичәрәк гәзет охумаг гадағандыр”. Тәсәввүр едирсинизми? Ондан сонра јухуда аләм гарышды бир-биринә, дејәсән, полисләр тәпик вуруб масаны ашырдылар, Шаһвәләд бәји тутуб апардылар, мән исә ҝетмәдим, әзмкарлыгла јухудан ојандым. Јохса хәбәри сизә ким чатдырарды?
Инди сојуг башла отуруб бу јухуну Фрејд үсуллары илә анализ едирәм, анламаға чалышырам. Сөһбәт ондадыр ки, сон бир-ики илдә јапократија Азәрбајҹанда гәзет јајымына ардыҹыл вә амансыз зәрбәләр вурмагдадыр, гәзет көшкләри демәк олар сырадан чыхарылыб, әлдә јајым мәһв едилиб. Јәгин бу сәбәбдән мән јухуда һәтта зоғал мүрәббәли чајла гәзет охумағын гадаған олмасы кими абсурд бир дурумла растлашмышам.
Шаһвәләд Чобаноғлунун јухунун тәркибинә дахил олмасы исә фикримҹә, онун гәзет јајымынын проблемләри илә сон илләр ардыҹыл мәшғул олмасындадыр. Бу мөвзуда һарда тәдбир олса орда Шаһвәләд бәјин дә чыхышына мүтләг јер верирләр. Һәтта кечән ај Шаһвәләд бәјлә Парисә ҝетмишдик, орда франсызлара гәзет јајымында проблемләримиздән данышмышды, онлар да һалымыза бир-ики ағыз ағламышдылар, демишдиләр, мүсјө, башыныз сағ олсун.
Анҹаг зоғал мүрәббәли чај ичәрәк гәзет охумағын ганунла гадаған едилмәси, етираф едим, һәддиндән артыг ағыр сөһбәтдир. Јахшы ки, белә шејләр јухуда олур.
Јери ҝәлмишкән, Бакыда јох едилән әнәнәви гәзет көшкләринин әвәзинә һазырда үзәриндә “Пресс-көшк” јазылан - ҝуја мәтбуат үчүндүр, анҹаг јәгин биз бурдакы “пресс” сөзүнү тәзјиг кими анламалыјыг - јени објектләр јарадылыр. Бунлар һәрби-стратежи објектләрдир, һәр биринин алтындан Хәзәр дәнизинә јералты јол вар, о ҹүмләдән ичиндә ермәниләрә атмаг үчүн ракетләр сахланылыр.
Елә билирсиниз зарафат едирәм? Гәтијјән. Чүнки нечә ајлардыр гәзетләр чалышыр бу көшкләрин кимә, һансы фирмаја мәхсус олдуғуну өјрәнсин, анҹаг өјрәнә билмир. Ортада ҹүрбәҹүр шајиәләр ҝәзир, бири дејир Бәјләр Әјјубовун објектләридир, о бири дејир Әли Һәсәновун фирмасыдыр, башгасы јазыр марсианчикләрин јанаҹагдолдурма мәнтәгәсидир вә саирә. Гәзетләр өз мәһсулларыны кимин сатдығыны (әслиндә сатмадығыны, чүнки бу көшкләр ҝөздән пәрдә асмаг үчүндүр, ичиндә мәтбуатдан башга һәр шеј - ит дырнағындан тутмуш турп тохумуна, дәвә гығындан дирижабл газына гәдәр тапмаг олар) өјрәнә билмир! Белә анормал дурум анҹаг Азәрбајҹанда мүмкүндүр. Елә “Туран” Информасија Аҝентлијинин директору Меһман Әлијев дә бу јахында гәзетимизә ачыгламасында демишди ки, бәлкә бу јени көшкләрдә наркотик сатырлар.
Һамыныза ширин јухулар диләјирәм. Морфеј көмәјимиз олсун...
Замин Һаҹы
Диггәт: Хәбәрдән истифадә етдикдә мәнбәјә истинад лазымдыр
