Иман әһли илә күфр әһли арасында мүһүм бир фәрг вар: сон һәдәф иман әһли үчүн ахирәт, күфр әһли үчүн дүнјадыр. Иман әһли ахирәт јолунда дүнјасыны верәр, шәһид олар. Чүнки дүнјаны јуху кими гыса сајыр. Күфр әһли дүнја јолунда чалышар, вурашар, амма һәр нәјиндән кечсә, ҹанындан кечмәз. Чүнки дүнјадан сонраны бош ҝөрүр. Бу бошлуг күфр әһлини горхудур. Иман әһли бир-бири илә вурушмаз. Бу күфр әһлинин сифәтидир. Бир-бири илә вурушанлар ән азы иманы күфрә гатмышдыр. Иман әһли бирдир, күфр әһли дағыныг. Дағыныглығы салан ад-сан, вар-дөвләтдир. Иман әһли үчүн вәзифә дә, шөһрәт дә, сәрвәт дә зәррәҹә дәјәрә малик дејил. Бу һалда нә үчүн вурушалар?! Әҝәр вурушсалар, демәк иддиалары вар. Иддиа исә иман әһлинин шәниндә дејил. Гурана нәзәр салаг:
Онлар һамылыгла сизә гаршы анҹаг мөһкәм шәһәрләрдә, јахуд дивар архасында оларкән дөјүшәрләр. Онларын өз араларындакы вурушмалары (вә дүшмәнчиликләри) исә чох ҝүҹлүдүр. (Ја Пејғәмбәр!) Сән онларын әлбир олдугларыны ҝүман едирсән, лакин онларын гәлбләри дағыныгдыр. Бунун сәбәби онларын ағылсыз бир гөвм олмаларыдыр. (Һәшр, 14)
Аллаһ, дин, Ислам, һиҹаб дүшмәнләри дүнја боју мөминләрин үзәринә һүҹума кечиб. Һүҹума кечиб ки, бу гөвмүн ахырына чыхыб, сәрвәтинә, намусуна саһиб олсун. Нечә јүз ил шејтан бајрағы алтында мүсәлманлары, әдаләтсевәр инсанлары әзиб, нәши үстүндә “һаны сизин Аллаһыныз”, дејә мејдан сулајыблар. Аллаһ-Таала бәшәријјәти имтаһана чәкдији үчүн мөһләт вериб, һәр фәрдин кимлијини онун өзүнә сүбута јетириб.
Иранда ингилаб олду. Хәјанәткар шаһ һәр ан ҝүҹләнән Аллаһу Әкбәр сәдаларынын фыртынасында саман чөпү кими өлкәдән бајыра атылды. Үзәриндән үч он ил өтмүш һамынын дашлашмыш сајдығы әрәб дүнјасынын гәлби дөјүнмәјә башлады. Диктаторлар бир-биринин ардынҹа халга газдыглары гујуја јумбаландылар. Дүнја Ислама доғру ҝедир – күфр әһли истәсә дә, истәмәсә дә!
Дүнјанын диггәти Азәрбајҹан адлы кичик, амма варлы бир мәмләкәт үзәриндә ҹәмләшиб. Бу мәмләкәтдә бир овуҹ гулдур һакимијјәтә саһиб дуруб халгын иликләрини ичинә чәкир, милләтә вәкиллик мандатыны базарда сатыр. Дүнја ҝөзләјир ки, Азәрбајҹан халгы ајаға галхыб талејини өз әлинә алаҹаг. Дүнја ҝөзләмәкдә олсун.
1988-ҹи илдә мејдана чыхан, залымларын үрәјини силкәләјән халг иди. Онда нә мүхалифәт партијалары варды, нә дини тәшкилатлар, нә дә “хиласкарЈАП”. О заман тәкҹә халг варды. Халг арасында милли, демократик, дини дәјәрләрә сөјкәнән мүбариз инсанлар билмирди ки, ҝүҹ елә бу бирликдәдир. Парчаландылар. Мүхалифәт партијалары јаранды, дини тәшкилатлар, ҹәмијјәтләр мејдана чыхды. Әлијев Һејдәр Әлирза оғлу 1988-дә мејданда олмаса да һамыдан фәрасәтли чыхды. Халгын, мүхалифәтин, диндарларын башы үзәриндән бирбаша шаһлыг тахтына сычрады. Ираны да алдатды, Тураны да. Демократа да јалан једиртди, диндара да. Мүбариз инсанлары әфи мәһарәти илә мәһв едиб Азәрбајҹан һакимијјәти вә халгыны нимчәдә гојду оғлунун габағына.
Ијирми илдир вәтән торпаглары ишғалда, халг да Һејдәр Әлијевин нимчәсиндә парчаланыр, ҝәмирилир, јејилир. Дүнјанын ән варлы халгы диләнчи көкүндә ҹан верир, сәси чыхмыр. Арабир гымылданмаг истәсә дә елә бир зәрбә алыр ки, ајаға галхмағы нечә ил чәкир. Амма…
Амма сон ики илдә бу нимчәдә гандан баш чыхарыб Аллаһу Әкбәр дејәнләр тапылыб. Бу адамлар нефтдән, гызылдан пај истәмир, Аллаһын дүнјасында Һејдәр Әлијев јох, Аллаһ улудур дејир. Ики илә јахындыр ДИНДАРЛАР адланан бу зүмрә шәрләнир, һәбсә алыныр, мин бир ишҝәнҹәјә мәруз галыр, өлдүрүлүр. Бу инсанларын мүтләг горху, дәһшәт сүкутуну јаран сәси 1988-ҹи илдә Азадлыг мејданыны долдуран вә гәтлинә фәрман верилмиш халгын сәсидир. Бу сәс мүхалифәтдән өзүнә јол тапа билмәди, Аллаһ гулларынын синәсини өзүнә јол сечди.
ДИНДАРЛАР адланан бу гөвмү горхутмаг, сусдурмаг Әлијев груплашмасы үчүн гејри-мүмкүн бир иш олуб. Наркотикада шәрләјирләр, хариҹә бағлајырлар, һәбсә алыб ишҝәнҹә верирләр, үрәјини партладырлар, амма чарә олмур.
ДИНДАРЛАР адланан бу зүмрә олсун ки, һәләлик үч ја беш миндән артыг дејил. Амма бу үч-беш мин мүбариз инсан милјонларын јүкүнү чәкир, милјонларын ичиндә боғулмуш арзулары дилә ҝәтирир, залыма залым демәјә ҹүрәт едир.
Сәнин милли сәрвәтдән олан пајыны јејирләр, шәхсијјәтини алчалдырлар, ағзына гыфыл вурурлар. Фәрги јохдур сән кимсән – мүхалифәтсән, Ислам Партијасысан, ја садәҹә бир вәтәндашсан. Сон дәфә 5 октјабрда 500 ҹиварында ДИНДАР Азәрбајҹан адланан, даш атылмыш гурбаға ҝөлүнү хатырладан үстүачыг зиндандан Аллаһу Әкбәр дејә һарај чәкиб, зопалы полисә үз бозартды. Дөјүлдүләр, ганларына гәлтан олдулар, һәбс едилдиләр, тәгибдәдирләр. Ҹанларындан кечдиләр ки, залым режимә бу халгын өлмәдијини ҝөстәрсинләр. Ҝөстәрдиләр дә.
Сән нә едирсән? Мүдафиәләринә галхмысан? Јох, буна ҹүрәтин чатмыр. Онларын фәдакарлығындан данышырсан? Буна да ҝүҹүн јох. Үрәјиндә онлара тәшәккүр едир, Аллаһдан јардым диләјирсән? Јохса бу да сәни горхуја салыр?
Әсил ХАЛГ, һеч бир сијаси иддиасы олмајан садә инсанлар мәмнундур, ләззәт алыр бу беш јүз мөминин гәһрәманлығындан. Амма мүхалифәтли-диндарлы, интилиҝентли-чиновникли сөз саһибләри, телевизија-радиосу, гәзет-журналы, бир сөзлә трибунасы олан бир дәстә горхаглығыны, пахыллығыны ортаја гојду.
Бири деди хариҹә ишләјирләр, о бири деди ҹаһилдирләр. Башга бири деди ки, һакимијјәтин өз ојунудур. Еләләри тапылды ки, бу адамлара ҹәза истәди. Ән ағрылысы будур ки, Азәрбајҹан Ислам Партијасынын бәзи јеткилиләри, бәзи дини сималар, иҹма башчылары, дин чөрәји јејәнләр ағыз бүздү ҹанындан кечмиш Мүгавимәт Әсҝәрләринә. Анламадылар ки, бу ҝәнҹләр онларын ишини ҝөрүр, онларын јүкүнү чәкир. Анламадылар ки, онлар да 5 октјабрда мејданда олмалы, зүлмә етираз етмәли идиләр. Анламадылар…
Гуран-Кәримдә бујурулур:
Әҝәр мөминләрдән ики дәстә бир-бири илә вурушса, онлары дәрһал барышдырын. Әҝәр онлардан бири тәҹавүзкарлыг етсә, тәҹавүзкарлыг едәнлә Аллаһын әмринә (итаәтинә) гајыдана гәдәр вурушун. (Тәҹавүзкарлыг едән Аллаһын әмринә) гајытса, һәр ики дәстәнин арасыны әдаләтлә дүзәлдин вә инсафла һәрәкәт един. Шүбһәсиз ки, Аллаһ инсафлылары севәр! (Һуҹурат, 9)
Нә дүшүнүрсүнүз? Неҹә олаҹаг бу халгын талеји? 5 октјабр сон һарај олаҹаг? Олмајаҹаг, ГАРДАШЛАР, БӘЈЛӘР, ҸӘНАБЛАР!
О беш јүз фәдаи бир ҝүн беш мин, әлли мин јумруг, дәјәнәк, ким билир, бәлкә дә Зүлфүгарла мејдана ҝирәҹәк вә бу сон олаҹаг мафиоз Әлијев груплашмасы үчүн. Онлар Аллаһын әмрини јеринә јетирир: Фитнә арадан галхана гәдәр вә дин анҹаг Аллаһа мәхсус едиләнәдәк онларла вурушун; әҝәр онлар сон гојарларса (сиз дә онларла вурушмагдан ваз кечин!), чүнки дүшмәнчилик анҹаг зүлм едәнләрә гаршы олур. (Бәгәрә, 193)
Ахыр сөз һакимијјәт адланан групадыр: Сон гојун бу фитнәкарлыға, күфрә. Анд олсун шәһидләрин руһуна, одла ојнајырсыныз. Бу од ҝеҹ-тез һәр биринизи ағушуна алаҹаг. Пешманчылығыныз фајда вермәјәҹәк.
Ағлыныза белә ҝәлмәсин ки, дин, һиҹаб проблемини унутдура биләҹәксиниз ҹәмијјәтә. Бу сизин үчүн сатдығыныз Гарабағ олмајаҹаг. Шејтанын гуҹағындан дүшүн вә мәнтиглә фикирләшин. Бу һарајын көкү Азәрбајҹанда дејил ки, ону балталаја биләсиниз. Бу һарај ҝөјдән ҝәлән чағырыша ЛӘББЕЈК ҹавабыдыр. Аллаһ бу торпагдан һәмин ҹавабы алмајаҹағы ҝүн сон фүрсәти әлдән верәҹәксиниз. Төвбә јолу ачыгдыр. Аллаһын дүнјасында Аллаһла вурушмагдан чәкинин. 5 октјабр сон дејил. Гаршыда гәфил вә зәлиледиҹи бир зәрбә вар. Тәләсин! Кәнардан сејр едән диндарлар, сиз дә!
Исҝәндәр Һүсејнзадә
“Нур” Нәшријјат Евинин тәсисчиси вә директору
Диггәт: Хәбәрдән истифадә етдикдә мәнбәјә истинад лазымдыр
