60 иллик јубилејини зинданда гаршылајан Һаҹы Вагиф Абдуллајев једдинҹи ониллијин илк илини даһа мүгәддәс мәканда гејд еләди.
“Шәһид тарихин гәлбидир”. Бу сөзләр даһи мүтәфәккир Әли Шәриәтијә аиддир. Јазымы белә дәјәрли кәламларла башламағымын сәбәби тарихин гәлбинә чеврилән илк һиҹаб шәһиди Һаҹы Вагифин доғум ҝүнү илә әлагәдардыр.
Бәли, Вагиф Абдуллајев һәгигәтән тарихин һәм дили олду, һәм үрәји. Тәкҹә бу ады чәкмәк кифајәтдир ки, өтән бир нечә илдә мүсәлманларын башларына ҝәтирилән мүсибәтләри хатырлајасан.
Һәмин фаҹиәләрин ичиндә Аллаһын јаратдығы каинатда «јер тапылмадығындан» сөкүлән мәсҹидләр, кәсилән азан сәсләри, башларында һиҹаб олдуғу үчүн мәктәбә бурахылмајан шаҝирдләрин ҝөз јашы, ҝејиминдә Ислами гајдалара ујдуғу үчүн дәрс сорушулмајан вә бунунла да психоложи тәзјигләрә мәруз галан тәләбәләрин һагг сәси, тәсәттүрүнә ҝөрә ишә ҝөтүрүлмәјән ханымларын гәзәби вар.
Һаҹы Вагиф бу әдаләтсизлији ҝөз јума билмәди. Өмрүнүн аһыл чағынын олмасына бахмајараг, Аллаһын кәламынын ајаглар алтына алынмасына дөзмәди, һагг сәсини уҹалтды. Ону сындырмаг истәдиләр. Һәбсә атдылар. 60 јашыны орда гејд етди. Сынмады. Шаһиди белә, олмадығы һалда онун үчүн өмүрлүк һәбсә бәрабәр 11 ил иш вердиләр, јенә сынмады. Һәр заман мәһкәмәләрдә дәмир бармаглыглар ардындан аиләсинә дөзүм, сәбр ирадә еләмәсини тапшырды, нәвәләрини ојнатды: «Мән лап јахшыјам. Нараһат олмајын», - деди. Әслиндә һеч дә јахшы дејилди. Сәһһәтиндә бир сыра проблемләр вар иди. Буна ҝөрә дәфәләрлә мүалиҹә дә алмышды. Амма өзүнү тох тутурду.
Ону сындырмаг үчүн астма хәстәси олдуғуну биллә-билә күләкләрин түғјан еләдији Гобустана јолладылар. Вәзијјәти лап ағырлашанда шәһәрә ҝәтирдиләр. Амма сон вәсијјәтини етмәк үчүн балаларыны јанына бурахмадылар. Ондан беләҹә интигам алмаг истәдиләр…
Амма Аллаһы унутдуглары үчүн бир шеји анламадылар. Јарадан һәр шејә гадирдир. Ҹисмани шәкилдә бизимлә, аиләси илә ҝөрүшә билмәди. Амма јухумуза ҝәлди. Габағындакы масада ҹүрбәҹүр немәтләрдән јејәрәк, бизимлә шад-хүррәм сөһбәт еләди. Јеринин лап јахшы олдуғуну деди вә билдирди ки, бундан сонра узағы бир нечә ил јашајаҹагды, ону да Аллаһ јолунда сәрф етдији үчүн шаддыр.
Бурада бир мәсәләни гејд етмәк јеринә дүшәрди. Бу јахынларда интернет сајтларынын бириндә Евровисион маһны мүсабигәсинә кәскин етираз етдији үчүн феврал ајынын 17-дә һәбс олунан Ҹәлилабад рајон сакини, руһани Һаҹы Илгар Әлијевин мәктубуну охудум. Мәктубда дејилирди: «Мән Һаҹы Вагифлә сон дәфә мај ајынын 12-дә Күрдәханы тәҹридханасында ҝорүшдүм. Биз Сејид Фәрамәзин имамәти илә, Һаҹы Мөвсүм, Руһуллаһ, Дәјанәт вә диҝәр дустагларла бирликдә ҹәм намазы гылдыг. Өмрүмүн ән ҝөзәл намазыны зинданда гылдым. Намазы гуртарандан сонра Һаҹы Вагиф мәним алнымдан өпүб деди: “Мән бундан сонра бәлкә дә узағы 2 ил јашајаҹагдым. Нә јахшы олду ки, бу 2 ил өмрүмү Аллаһ јолунда сәрф етдим”.
Јухарыдакы ики һадисәни гаршылашдыранда, әслиндә бунун бизә ҝөндәрилмиш месаж олдуғуну анладым. Бәли, атам сон анына гәдәр Аллаһын дини уғрунда мүбаризә апарды вә бу јолда шәһид олду. О, инди ҹисмани шәкилдә јанымыздан ајрылса да, әбәди дүнјада бизләри ҝөзләјир. Һәгигәтән дә «Аллаһ јолунда өлдүрүләнләри әсла өлмүш санма. Әксинә, (онлар) диридирләр; өзләринин Рәбби јанында онлара рузи верилир. Онлар Аллаһын Өз лүтфүндән онлара вердији немәтләрә севинир, архаларынҹа ҝәлиб һәлә онлара чатмамыш кәсләрин һеч бир горху илә гаршылашмајаҹагларына вә онларын кәдәрләнмәјәҹәкләриә фәрәһләнирләр. Онлар Аллаһын немәтинә, лүтфкарлығына, һәм дә Аллаһын мөминләрин мүкафатыны һечә чыхармајаҹағына севинирләр» («Али-Имран», 169 – 171)
Диггәт: Хәбәрдән истифадә етдијдә мәнбәјә истинад лазымдыр
