Әһли Бејт -АБНА- хәбәр аҝентлијинин вердији хәбәрә әсасән августун 31-дә Сабунчу Рајон Мәһкәмәси диндар, иҹтимаи фәал Меһди Шамиллинин ев дустаглығына бурахылмасы илә бағлы вәсатәтә бахылыб.
Вәкил Ҹавад Ҹавадов бу барәдә дејиб ки, мәһкәмә вәсатәти тәмин етмәјиб: “Просесдә Меһди Шамиллинин һәбсинин ганунсуз вә сифаришли олдуғуну билдирдим. Гејд етдим ки, онун ев дустаглығына бурахылмасы истинтага мане олмур.
Меһди Шамилли дә чыхыш етди. О гејд етди ки, өмрүндә һеч вахт сигарет чәкмәјиб. Деди ки, августун 6-да саһә мүвәккили зәнҝ едиб ону күчәјә чағырыб, автомобилә әјләшдириб бөлмәјә апарыблар, дөјүбләр. Даһа сонра Меһди Шамилли деди: “Орада ҝуја үстүмдән наркотик тапдылар вә буну рәсмиләшдирдиләр. Бу, чох ҝүлмәли ссенаридир. Инди һеч вахт сигарет чәкмәјән адамларын наркотик сахламаг иттиһамы илә һәбс олунмасы тенденсијасы ҝениш јајылыб. Аллаһдан горхмурлар”.
Меһди Шамилли билдирди ки, өзүнүн сәһһәтиндә проблемләр вар, анасы да ағыр хәстәдир, ев дустаглығына бурахылмасы истинтага мане олмајаҹаг. Мүстәнтиг исә Меһди Шамиллинин ев дустаглығына бурахылмасына етираз етди вә һаким һәбс гәрарыны гүввәдә сахлады”.
Һаҹы Меһди Шамилли августун 6-дә Бакынын Забрат гәсәбәсиндәки евиндә һәбс олунуб. Она Ҹинајәт Мәҹәлләсинин 234-ҹү (ганунсуз олараг наркотик васитәләри, психотроп маддәләри вә ја онларын прекурсорларыны һазырлама, истеһсал етмә, әлдә етмә, сахлама, дашыма, ҝөндәрмә вә ја сатма) маддәси илә ҹинајәт иши башланыб. Меһди Шамиллинин үстүндән 6,69 грам марихуана чыхдығы иддиа едилир.
Диггәт: Хәбәрдән истифадә етдијдә мәнбәјә истинад лазымдыр
