Әһли Бејт -АБНА- хәбәр аҝентлији- Бу јахынларда сајтларын бириндә јерләшдирилән хәбәр диггәтими ҹәлб етди. Түркијәдә ичкили һалда сүкан архасына отуран гадын сүрүҹүләр мәсулијјәтдән јајынмаг үчүн полис нәзарәт мәнтәгәләринә јахынлашаркән һиҹаб ҝејинәрәк өзләри һаггында мөминә ханым тәсәввүрү јарадырлар. Чох тәәссүфләр олсун ки, һиҹаб кими илаһи дәјәрдән артыг белә һијләләрдә истифадә едилир.
Амма әслиндә бу һијләјә јол ачан әсас амил ганунун дузҝүн ишләмәмәсидир. Сүкан архасына отуран һәр бир сүрүҹү – ҹинсиндән, хариҹи ҝөрүнүшүндән, дини мәнсубијјәтиндән асылы олмајараг ганун гаршысында өзүнү бәрабәр вә мәсулијјәтли һисс етмәлидир. Бу ҹүр фитнәләрә имкан јарадан полис хидмәтчиләри буну әсас тутараг јол һәрәкәти гајдаларыны позан истәнилән шәхслә ејни ҹүр рәфтар етсәләр, һеч бир гадын сүрүҹү һиҹаб ҝејәрәк маскаланыб мәсулијјәтдән гачмағы ағлына ҝәтирмәз. Һиҹаблы олмаг сүрүҹү олараг гајда позмаға һеч бир әсас вермир вә диҝәр сүрүҹүләрә нисбәтән һеч бир имтијаз газандырмыр. Әксинә бу, ханымлары мүсәлман кимлијинә дәлаләт едән бир атрибут дашыјыҹысы олараг даһа сәлигәли вә мәсулијјәтлы сүрүҹү олмаға тәшвиг едир.
Азәрбајҹанда белә ајры-сечкилик әсасән дөвләт мәмурларына вә шоу-бизнес нүмајәндәләринә тәтбиг олунур. Ади сүрүҹүнүн автомобилинин тәкәринин јарысы гоша хәтти кәсмәјә ҹәһд едән кими буну ҝөздән гаҹырмајан полисләр, иҹазә верилән максимум сүрәт һәдди 60 км/саат олан јолларда 100 км/саатла һәрәкәт едән сүрүҹүнү сахлајиб онун мәһшур мүғғәни олдуғунү ҝөрәндә тәнтәнәли сурәтдә үзр белә истәјиб, јола салырлар.
Ҝејиминә, кимлијинә ҝөрә гаршылајыб јола салмаг, ҝејимдән истифадә едиб һоггабазлыг етмәк һәјатын бүтүн саһәләриндә вар.
Бу хәбәри охујанда ајлар өнҹә өз садәлөһвлүјүм уҹбатындан башыма ҝәлән һадисәни хатырладым. Евдән чыхыб дајанаҹаҝа ҝедирдим. Јолда чох сәлигәли ҝејимдә - тәртәмиз ағ көјнәк, тәмиз ајаггаби, галстук тахмыш бир шәхс мәнә јахынлашыб аҹизанә шәкилдә билдирди ки, онун бүтүн сәнәдләрини, һәмчинин портмонесини ҹибиндән оғурлајыблар. Вә она евә ҝедиб чатмаг үчүн 80 гәпик пул лазымдыр. Һеч тәрәддүд етмәдән ҹыхарыб пул вердим, һәлә бир јазығым да ҝәлди ки, јәгин нә гәдәр ваҹиб сәнәдләри оғурланыб. Автобуса миниб јол боју ҝетдикҹә бир дә фикир вердим ки, һәмин о “јазыг зәрәршәкмиш” артыг үчүнҹү адама ејни һијләни ишләдиб пул алыр. Јәгин ки, һамы онун ҝејиминә, мәдәни данышығына алданырды.
Һоггабаз маклерләр, дәрман мөһтәкәрлији едәнләр, бир чох ҹинајәткарлар ҝејимдән истифадә едәрәк јаланчы тәсәввүрләр јарадыб өз чиркин ишләриндә бу садә варианты тәтбиг едирләр. Һамысы она ҝөрәдир ки, ҝејим инсанын һәјат тәрзини, идеолоҝијасыны әкс етдирән ваҹиб факторлардан биридир вә инсанлар да бу амилә истәр-истәмәз диггәт едирләр. Һәлә бир бу һиҹаба аид едиләндә, нормал инсанлар бу ҹур ҝејимли ханымлара етимад едәрәк онларын ички ичмәләрини еһтимал етмәк истәмирләр. Лакин бу ҝејим тәрзи һиҹаблы ханымларын мәсулијјәтдән гачмалары үчүн онлара һеч бир үстүнлүк газандырмыр. Белә һалларда онлара ҝүзәштә ҝедән полис ишчиләри баш верә биләҹәк гәзаларда ејни дәрәҹәдә ҝүһаһкардырлар.
Истәнилән мүсбәт ҝејимдән пис нијјәтләрдә истифадә етмәк - бу ҝејимләрин һәгиги дашыјыҹыларынын үзәринә бөјүк көлҝә салыр вә онлара етибары азалдыр. Лакин бу һал һиҹаб кими илаһи әманәтә аид едиләндә, вәзијјәт даһа урәкағрыдыҹы олур. Ҹүнки, бу иши ҝөрән корланмыш дүшүнҹәли инсанлар нәинки һәгиги мөминә ханымларын һаггыни тапдалајырлар, ичкили һалда мүгәддәс сајылан һиҹабы мурдарлајырлар, һәмчинин диҝәрләрини диндән гачырмаг вә ијрәндирмәк үчүн кимләринсә әлинә бәһанә дә верирләр.
Аллаһ һәгиги мөминәләри белә фитнәкарларын һијләсинә ҝөрә ҝөздән дүшмәкдән узаг еләсин, һиҹабла “һиҹаблы” арасындакы фәрги дујмағы инсанлара нәсиб еләсин, бу ҹүр провокасија характерли һијләләрдән ҹәми мүсәлманлары аманда сахласын. Амин.
Ҝүнел Һүсејнли
Диггәт: Хәбәрдән истифадә етдијдә мәнбәјә истинад лазымдыр
