Әһли Бејт -АБНА- хәбәр аҝентлији- “Гарабағ уғрунда мүбаризәни башлајан вә гызышдыран Русија олуб. Һәмин дөврдә дүнјада јеҝанә һәрби, сијаси, малијјә вә кәшфијјат ҝүҹү Русијада иди. Ермәнистанда вә Азәрбајҹанда һакимијјәт уғрунда мүбаризә апаран гүввәләр ја Русијадан асылы идиләр, ја да ки, Русијаја гаршы мүбаризә апаран бејнәлхалг гүввәләр, хүсусилә АБШ вә Гәрб дөвләтләринә истинад едирдиләр. Ортада Гарабағы дүшүнән адам јох иди. Јәни сијаси лидерләрин һеч бирини Гарабағ дүшүндүрмүрдү.” Бу сөзләри ФактХебер.ҹом-а политолог Зәрдүшт Әлизадә сон заманлар мәтбуатда ән чох мүзакирә едилән “6 рајону Гарабаға ким вериб”, суалына мүнасибәт билдирәркән сөјләјиб.
Експерт гејд етди ки, 90-ҹы илләрин әввәлләриндә һәр бир лидер һакимијјәтә ҝәлмәк үчүн илк өнҹә вәзијјәти ағырлашдырмаға чалышырды: “Бундан сонра мүнагишәнин ағырлығына таб ҝәтирмәјән һакимијјәтдәки гүввәләри кәнарлашдырмаг асан олурду. Она ҝөрә дә Азәрбајҹан өзүндән һәм әһали, һәм дә ки, әрази бахымындан бүтүн игтисади ҝүҹү илә 3 дәфә зәиф олан Ермәнистана удузду.”
Зәрдүшт бәј ону да вурғулады ки, һәмин дөврдә һансы гүввәләрин һакимијјәт уғрунда мүбаризә апардығы вә кимләрин Гарабағ ҝедәндән сонра милјонер олмасы һамыја ҝүн кими ајдындыр: “Баш верәнләри һеч ачыгламаға да еһтијаҹ јохдур. Һадисәләрин һамысы ҝөз габағындадыр. Бәзиләри итирилмиш Гарабағын әвәзиндә дашынан-дашынмаз сәрвәт топлајараг милјардлара саһиб чыхыб вә һакимијјәтдә отурараг халгы әзмәклә мәшғулдур. Кимләрин һәмин гүввәнин вә адамын туласы, нөкәри вә ҹасусу олмасы да һамыја ајдындыр. Мәнҹә буну да ачыгламаға еһтијаҹ јохдур."
Диггәт: Хәбәрдән истифадә етдикдә мәнбәјә истинад лазымдыр
