Һаҹы Вагифин һәбcханада өлүмү Исламчылары горхутмајыб

 Ијулун 12-дә Азәрбајҹан Ислам Партијасы (АИП) сәдринин тәшкилати мәсәләләр үзрә мүавини Вагиф Абдуллајев Пенитенсиар Хидмәтин Мүалиҹә Мүәссисәсиндә вәфат етди. Ону елә һәмин ҝүн “Аллаһу Әкбәр!”, “Биз өләрик, зүлмә бојун әјмәрик”, “Ганунсуз јерә мөминләри, һиҹаб шәһидләрини зиндана саланлара Аллаһ ләнәт етсин” шүарлары алтында Һөвсан гәбиристанлығында торпаға тапшырдылар. Ган хәрчәнҝиндән әзијјәт чәкән сәдр мүавини һәкимләрин рәјинә бахмајараг һәбсдән азад олунмамышды, өләнә гәдәр орада сахланылды.Дүнән онун јас мәрасиминдә иштирак етмәк үчүн јашадығы үнвана јолландыг. Һәјәтдә бөјүк бир мағар гурулмушду. Мәҹлисдә иштирак едән Гарабағын Азадлығы Уғрунда Ислами Мүгавимәт Һәрәкатынын рәһбәри, АИП иҹтимаи мәсәләләр үзрә мүавини Һаҹы Рөвшән Әһмәдли Һаҹы Вагифин һәбсинин АИП сәдри Вагиф Сәмәдовун мәлум чыхышы илә бағлы олдуғуну деди: “Сонрадан башга мотивләр сечмәк, ишә бир гәдәр башга рәнҝләр гатмаг үчүн Һаҹы Вагифи хүсуси бир групун дүшүндүјү ссенари әсасында һәбс едиб траҝикомик мәһкәмә сәһнәси гурдулар. Онун конкрет олараг нәдә тәгсирләндирилдији бу ҝүнә кими дә бәлли дејил. Һәмин мәһкәмә адлы мәзһәкә боју Һаҹы Вагиф јалныз бир суал верирди - мәни нәдә иттиһам едирсиниз? Һәјатынын сонуна кими онун өзүнә дә нәдә иттиһам едилдији мәлум олмады. Иттиһам актында да Һаҹы Вагифлә бағлы бир дәнә дә олсун иттиһам јохдур”.Һаҹы Рөвшән сахтакарлыгла, ганунлара мәһәл гојмадан ҝүнаһсыз инсанларын зиндана атылмасынын јахшы нәтиҹәләр вәд етмәдијини сөјләди: “Һаҹы Вагифин 60 јашы зинданда тамам олду. О, Русијада али тәһсил алмыш игтисадчы-мүһәндис иди. Азәрбајҹана гајыдандан сонра университетдә дәрс дә демишди. ”Ленкомбинат"да һәмкарлар иттифагынын сәдри олмушду. Өмрүбоју инзибати хәта төрәтмәјән бир инсаны һеч бир әсас олмадан, иттиһам ирәли сүрмәдән 11 ил мүддәтинә азадлыгдан мәһрум етмишдиләр. Онун арамыздан вахтсыз ҝетмәсинин 1-ҹи сәбәби ганунсуз һәбси олду. Һәбсдә ола-ола бизләрә төвсијәләр верирди ки, нараһат олмајын, бу зүлм чох узаг ҝедә билмәјәҹәк".Һаҹы Рөвшән Һаҹы Вагифә өмрүнүн сон ҝүнләриндә јахынлары илә ҝөрүш верилмәмәсини инсанлыға јарашмајан аддым адландырды. Билдирди ки, АИП сәдри Һаҹы Мөвсүм Сәмәдов башда олмагла һәбс олунан бүтүн исламчылар гануна зидд бир әмәл төрәтмәдикләри һалда ганунсуз олараг азадлыгдан мәһрум олунублар: “Дүшүнүрләр ки, зор тәтбиг етмәклә, инсанлары зинданда шәһадәтә јетирмәклә истәдикләринә наил олаҹаглар. Билсинләр ки, зор вә зүлм мәсәләнин һәлли дејил. Нәинки исламчылары, демократик дүшүнҹәли Азәрбајҹан инсанларыны бу ҹүр јолларла һәгигәтдән, дүз јолдан узаглашдыра билмәјәҹәкләр”.Јас мәҹлисини идарә едән АИП-ин сәдр әвәзи Елчин Манафов билдирди ки, Һаҹы Вагифин јохлуғундан нараһат олсалар да, бир мәсәләјә ҝөрә севинирләр: “О бу дүнјадан иззәтлә, ифтихарла көчдү. Биз онун сағлығында вүҹуду, варлығы илә фәхр едирдик. О нәинки исламчылара, бүтүн Азәрбајҹан халгына ифтихар олду. Һаҹы Вагиф өмүр боју һагг уғрунда мүбаризә апарды, әгидәсиндән дөнмәди. Һәбсхана һәјаты ону сындырмады. Аллаһ, ислам, һиҹаб, һагг јолунда шәһид олду”.Е.Манафов исламчыларын тәгиб вә тәзјиглә јолларындан дөндәрмәјин мүмкүнсүз олдуғуну деди: “О кәсләр ки исламчылары һәбс етдирмәклә дүшүнүрдүләр ки, бизләри јолумуздан дөндәрәҹәкләр сәһвә јол верирләр. Өзләринә дә ҝөзәл ајдын олду ки, мүбаризәмизин гаршысыны ала билмәјәҹәкләр”.Мәҹлисдә иштирак едән Нардаран ағсаггалы Мәшәди Натиг В.Абдуллајевин әгидәси уғрунда шәһид олдуғуну деди. О, һөкумәтин етиразчы инсанлара гаршы сәрт аддымлар атдығыны деди: “Һөкумәтин давранышлары гисасчылыға охшар форма алыр. Мәһкәмәләр дә ганунсуз һөкмләр верирләр. Һаҹы Вагифә мәһкәмәдә нәдә иттиһам олундуғуну дејән олмады. Буна АТӘТ-ин просесдә иштирак едән нүмајәндәси дә шаһидлик етди. Елә ситуасија олду ки, һәтта прокурор она иш истәмәји дә унутмушду. Бу адам мүтләг шәкилдә азад олунмалы иди. Чүнки һеч бир ҝүнаһы јох иди. Бизим һакимијјәт бу мәсәләдә чох ләнҝ тәрпәнди”.Мәҹлисдә иштирак едән мәрһумун јахынлары исә Һаҹы Вагифин сағлығында бүтүн фикирләрини иҹтимаијјәтә чатдырдыгларыны, инди исә данышмағын мәнасы олмадығыны дејиб ачыглама вермәкдән имтина етдиләр.