Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасынын (АИП) сәдр мүавини Вагиф Абдуллајев сахланылдығы 12 сајлы ҹәзачәкмә мүәссисәсиндән Пенитенсиар хидмәтин Мүалиҹә Мүәссисәсинә апарылыб.
Абдуллајевләр аиләсиндән верилән мәлумата ҝөрә, онлар дүнән мүалиҹә мүәссисәсиндә олублар. Ҝүлзар ханымын билдирдијинә ҝөрә, ҝөрүшдә һәјат јолдашы ону танымајыб: “Һаҹынын вәзијјәти чох ағырдыр. Һәлә мәһкәмәси ҝедән заман о, инфаркт кечирдији үчүн бир дәфә тәҹили јардымла елә һәмин мүәссисәјә апарылыб. Бир аја јахын мүалиҹә алыб. Даһа сонра да бир нечә дәфә елә Күрдәханыдаҹа мүалиҹә олунуб. Инди дә Мәрәзәдә јерләшән 12 сајлы һәбсханаја салыныб. Һаҹы һәм дә бронхиал асмадыр. Азадлыгда оларкән даим мүалиҹә алтында олуб. Елә һәбс едиләндә дә мүалиҹәси ҝедирди. Мәрәзәнин тоз-торпаглы һавасы онун сәһһәтини даһа да ағырлашдырыб. Тәгрибән 20 ҝүн әввәл ҝөрмүшдүм ону. Бизлә ҝөрүшдән сонра һәбсханада амбулатор мүалиҹә алыб. Амма сәһһәтиндә һеч бир ирәлиләјиш омадығы үчүн шәһәрә ҝәтирибләр. Дүнән ону ҝөрәндә дәһшәтә ҝәлдим. Ҝөрүш отағында мәни танымајыб башга адамын үстүнә ҝетди. Һәрәкәт етмәк габилијјәти демәк олар ки, тамамилә итиб. Ону орада олан јолдашлары голундан тутуб ҝәтирдиләр. Әлиндә әса олса да, тәкбашына јеримәкдә чәтинлик чәкир. 61 јашына аз галыб. Бу бир аилә башчысы үчүн нә јашдыр ки? Ҝөзүмүзүн габағында әријир. Әлимиз дә һеч јерә чатмыр. Санки һамы үзүнү биздән чевириб”.
Хатырладаг ки, Вагиф Абдуллајев 2011-ҹи илин јанварын 7-дә јол полиси тәрәфиндән сахланылыб вә барәсиндә Нәриманов рајон мәһкәмәси тәрәфиндән 15 сутка инзибати һәбс тәнбеһ тәдбири тәтбиг едилиб. Даһа сонра барәсиндә 3 ајлыг һәбс гәти имкан тәдбири сечиләрәк, Азәрбајҹан Республикасы Ҹинајәт Мәҹәлләсинин 28, 214.2.1, 28, 214.2.3, 228.3 вә 278-ҹи маддәләри үзрә истинтага ҹәлб едилиб. Бакы Ағыр Ҹинајәтләр мәһкәмәсинин 7 октјабр 2011– ҹи ил тарихли һөкмү илә Вагиф Абдуллајев 11 ил мүддәтинә азадлыгдан мәһрум едилиб. АИП функсионеринин апеллјасија шикајәти тәмин олунмајыб.
Диггәт: Хәбәрдән истифадә етдикдә мәнбәјә истинад лазымдыр
