Әһли Бејт -АБНА- хәбәр аҝентлијинин вердији хәбәрә әсасән Милли Мәҹлисдән верилән мәлумата ҝөрә, бунунла бағлы "Өлкәдән ҝетмәк, өлкәјә ҝәлмәк вә паспортлар һаггында" Гануна дәјишикликләрлә бағлы ганун лајиһәси һазырланыб.
Лајиһәдә гејд олунур ки, үмумвәтәндаш паспорту вәтәндаш мүраҹиәт етдикдән сонра 10 иш ҝүнү мүддәтиндә верилмәлидир. Гејд едәк ки, һазырда гүввәдә олан ганунда бу мүддәт бир ај нәзәрдә тутулуб.
Диҝәр бир дәјишикликдә исә ҝөстәрилир ки, үмумвәтәндаш паспорту алынаркән вәтәндаш мүвафиг гурума фотошәкил тәгдим етмәјәҹәк.
Һәмчинин вәтәндаш өлкәдән јеткинлик јашына чатмамыш ушаглары илә бирликдә ҝедәрсә, бу һалда онун үмумвәтәндаш паспортуна һәмин ушагларын јазылмасы вә фотошәкилләринин јапышдырлмасыны нәзәрдә тутан мүддәанын да ганундан чыхарылмасы нәзәрдә тутулуб.
Үмумвәтәндаш паспортларынын 1 јашадәк, 1-3 јашадәк, 3-18 јашадәк вә 18 јашынадәк ушаглара верилмәси тәклиф олунуб.
Паспортларын 1 јашадәк ушаглар үчүн 1 иллик, 1-3 јашадәк ушаглар үчүн 3 иллик, 3-18 јашадәк 5 иллик, 18 јашына чатмыш шәхсләр үчүн исә 10 илллик мүддәтә верилмәси нәзәрдә тутулур.
Јени сәнәддә гејд олунур ки, хидмәти паспортун алынмасы вә дәјишдирилмәси үчүн дөвләт рүсуму алынмајаҹаг.
Паспортда ҝөстәрилән мәлуматлар сырасында паспортун серијасы, вәтәндашла бирҝә ҝедән 18 јашына чатмамыш ушагларын сојады, ады, ҹинси вә доғулдуғу тарих сөзләри чыхарылыр, мәлуматлар сырасына "фәрди идентификасија нөмрәси" вә "етибарлылыг мүддәти" сөзләри әлавә олунур.
Паспортда електрон дашыјыҹы (чип) јерләшдирилир. Електрон дашыјыҹыја паспорт саһибинин имзасы истисна олмагла, мүвафиг мәлуматлар, паспорт саһибинин үз тәсвири, ики әл-бармаг изи дахил едилир.
Паспорт алмаг истәјән вәтәндашын әл-бармаг изләринин ҝөтүрүлмәси вә фотошәкилинин чәкилмәси паспорту верән дөвләт органында һәјата кечирилир.
Паспортун етибарлылыг мүддәти битдикдә, јахуд вәтәндашын ады, атасынын ады, сојады дәјишдикдә вә ја паспорт, онун електрон дашыјыҹысы јарарсыз һала дүшдүкдә, јахуд паспортун үзәриндәки вә ја електрон дашыјыҹысындакы мәлуматларын сәһв олдуғу мүәјјәнләшдирилдикдә, паспорт дәјишдирилмәлидир.
Паспортун үзәриндәки вә ја електрон дашыјыҹысындакы мәлуматларын сәһв олдуғу мүәјјәнләшдирилдикдә, һәмин паспорт тәгдим едилдији вахтдан бир ҝүн мүддәтиндә дөвләт рүсуму алынмадан дәјишдирилмәлидир.
Ганун лајиһәси гәбул олунарса, 2013-ҹү ил ијунун 1-дәк верилән паспортлар етибарлылыг мүддәти битәнәдәк вә ја вәтәндашын сојады, ады, атасынын ады дәјишәнәдәк, јахуд паспорт итәнәдәк, јарарсыз һала дүшәнәдәк вә ја паспортун үзәриндәки мәлуматларын сәһв олдуғу мүәјјәнләшдириләнәдәк гүввәдә галыр. Ганун лајиһәси Милли Мәҹлисин Һүгуг сијасәти вә дөвләт гуруҹулуғу комитәсинин бу ҝүн кечириләҹәк иҹласында мүзакирәјә чыхарылаҹаг.
Диггәт: Хәбәрдән истифадә етдикдә мәнбәјә истинад лазымдыр
