Әһли Бејт -АБНА- хәбәр аҝентлијинин вердији хәбәрә әсасән Техасдан олан Сара Һикман Азәрбајҹанда инсан һагларынын позулмасы илә әлагәдар Бакыја “Еуровисион” мүсабигәсинә ҝәлмәкдән имтина едиб. Мүғәннијә јахын шәхсләрин "Туран"ын Вашингтон мүхбиринә тәгдим етдикләри бәјанатда дејилир ки, Сара ики һәфтә әввәл ону Остин шәһәриндә гәбул етмиш азәрбајҹанлыларын вә түркләрин гонагпәрвәрлијиндән чох разыдыр.
“Унудулмаз наһар вә маһны үчүн сәмими гәлбдән тәшәккүрүмү билдирирәм. Азәрбајҹан һаггында демәк истәдикләрим һеч бир һалда сизә аид дејил. Чүнки мән инанырам ки, сиз сәмими, сәхавәтли, хејирхаһ инсанларсыныз.
Намәлум шәхсләрин хејирхаһлығы бизә бу вә ја диҝәр тәдбирләрдә иштирак үчүн надир имканлар јарадыр. Бу јахынларда мәним 600 милјондан чох тамашачынын изләјәҹәји популјар “Еуровисион” шоусунда иштирака дәвәтим дә белә олду. Сәфәрлә бағлы бүтүн хәрҹләр Азәрбајҹан Дөвләт Нефт Ширкәтинин һесабына өдәниләҹәк. Мән АБШ-ы башга өлкәдә тәмсил етмәк, дүнјанын бөјүк телешоусунда диггәт мәркәзиндә олмаг, јени танышлыглар вә хатирәләр әлдә етмәк имканлары газандым. Һәр шеј мәним әлимдә иди.
Дүнән исә Аmnesty International-дан алдығым мәктубда Бакыда, үмумиликдә өлкәдә инсан һагларынын аҹынаҹаглы дурумда олдуғу билдирилир. (Http://hereandnow.wbur.org/2012/05/09/eurovision-contest-azerbaijan)
Инсан һагларынын позулмасы илә бағлы проблемләрин чоху мәһз АРДНШ, евләрин сөкүлмәси вә бүтүн бунлар һагда данышмаг истәјән журналистләрин, һүгуг мүдафиәчиләринин, мусигичиләрин дөјүлмәси илә әлагәдардыр. Нә үчүн бүтүн бунлар баш вериб, ондан өтрү ки, мүсабигәнин кечириләҹәји јердә дәјәри 134 млн. долларлыг вә 25 мин јерлик Crystal Hall тикилсин.
Бејнәлхалг тәшкилатларын мәлуматларына ҝөрә, 2012-ҹи илдә Азәрбајҹанда инсан һүгугларынын вәзијјәти 2011-ҹи иллә мүгајисәдә писләшиб. Һөкумәт бүтүн етираз формаларыны боғур, биабырчы мәһкәмә просесләриндән сонра онларла ҝәнҹ фәал һәбсханаја салыныб.
Журналистләрә гаршы бөһтан үзрә ҹинајәт ишләринин сајы азалса да, онларын вә диҝәр тәнгидчиләрин ишләмәси үчүн атмосфер аҹынаҹаглы олараг галыр.
Һөкумәтин Бакынын мәркәзинин абадлашдырылмасы үзрә кампанијасы мәнзилләрин мәҹбурән ганунсуз сөкүлмәсинә ҝәтириб чыхарыб. Етигад азадлығынын мәһдудлашдырылмасы, һәбсдә оланларла амансыз рәфтар, ишҝәнҹәләр давам едир.
Азәрбајҹан Авропа Шурасынын сијаси мәһбуслар үзрә мәрузәчисини өлкәјә бурахмамагда давам едир. Һәр кәс “Азәрбајҹанда инсан һүгугларынын позулмасы” илә бағлы ахтарыш верә биләр вә бу мөвзуда чох шеј ҝөрә биләр.
Мән ора ҝетмәмәји гәрара алмышам. Чүнки мән Азәрбајҹанда өз евләриндән амансызҹасына чыхарылан гардаш вә баҹыларын тәрәфиндә олмаг истәјирәм. Она ҝөрә ҝетмәк истәмирәм ки, сәфәр хәрҹләри АРДНШ тәрәфиндән өдәнилир вә мән инсан һагларынын позулмасынын иштиракчысы олмаг истәмирәм.
Мүсабигә заманы сәһнәдән кәнарда башга сәсләр дә ешидиләҹәк. Үмидварам ки, сиз онлары ешидәҹәксиниз, онларын вә бүтүн дүнјада һүгугларындан мәһрум едилмиш адамларын адындан данышаҹагсыныз”, - Һикман мүсабигә иштиракчыларына мүраҹиәт едиб.
Диггәт: Хәбәрдән истифадә етдикдә мәнбәјә истинад лазымдыр
